NA SAME 77 - Vakavakadewa Vou kei na iVola tale eso

¹ Au a tagi vakadomoilevu vua na Kalou; Ka sa rogoci au o koya.

² Ena gauna ni leqa au a masu vua na Kalou Au laveta cake na ligaqu ka masu ena veibogi kece, Ia, au sa sega ga ni kunea na vakacegu.

³ Au vakasamataka na Kalou, ka'u sa qai madua, Au a vakasama vakatitobu, ka sa tarai au na yalolailai.

⁴ Sa sega ni laivi au o koya me'u moce vinaka ena bogi, Au sa taqaya ka'u sega ni vosa rawa.

⁵ Au vakasamataka na veisiga sa sivi yani Ka vakananuma na veiyabaki ki muri sara.

⁶ Au sa dau ia ga na vakanananu titobu ena bogi; Io, au sa vakanananu ga ka taroga e lomaqu na ka oqo:

⁷ “Ena cati au tiko beka na Turaga? Ena sega beka ni vinakati au tale?

⁸ Sa mudu beka na nona loloma tudei? Sa oti beka na yaga ni nona vosa ni yalayala?

⁹ Sa guilecava beka na Kalou me dau yalololoma? Sa taura beka na i tutu ni nona yalololoma na cudru?”

¹⁰ Ia au a qai kaya e lomaqu, “Na ka mosimosi duadua vei au oqo, Ni sa veisau na liga i matau nei Koya sa Cecere sara.”

¹¹ Au na nanuma tikoga na nomuni cakacaka lelevu, i Jiova; Ka vakananuma lesu na ka veivakurabuitaki o ni a vakayacora ena gauna sa oti yani.

¹² Au na dau nanuma tikoga na ka o ni a cakava; Ka'u na vakasamataka vakatitobu na nomuni cakacaka kecega.

¹³ Na ka kece o ni cakava na Kalou e savasava! E sega ni dua na Kalou me cecere cake vei kemuni!

¹⁴ Sa i kemuni na Kalou o ni sa daucakava na cakacaka mana; O ni sa vakaraitaka oti na nomuni kaukauwa ena kedra maliwa na veimatanitu.

¹⁵ O ni sa vakabulai ira na nomuni tamata ena nomuni qaqa, O ira na kawa i Jekope kei Iosefo.

¹⁶ Ni ra raici kemuni na Kalou na wai era sa rere sara, Ka sa sautaninini na veivanua titobu e wasawasa.

¹⁷ Sa sovaraka mai na uca na o; A sa vadugu na kurukuru mai na maliwa lala, Ka tibi na livaliva ena veiyasana kecega.

¹⁸ Na domo ni nomuni kurukuru ena covulaca, Sa vakararamataka na vuravura na tibi ni livaliva, Sa sautaninini na vuravura.

¹⁹ O ni a lako kosova na wasawasa, Ka kosova na wasawasa titobu; Ia sa sega ni bau laurai na mawe ni yavamuni.

²⁰ O ni sa tuberi ira na nomuni tamata me vaka na i vakatawanisipi, Ka rau a veiliutaki kina o Mosese kei Eroni. A Masikili i Esava.