NA SAME 73 - Vakavakadewa Vou kei na iVola tale eso

Ai Katolu ni i Vola ( Same 73–89 ) Na Lewa Dodonu ka Matau ni Kalou

A Same i Esava.

¹ Sa vinaka dina na Kalou ni Isireli, Vei ira era sa yalosavasava!

² Ia oi au, au sa vakarau bale sobu; Sa vakarau me tidara na yavaqu,

³ Baleta ni'u a vuvutaki ira na viavialevu, Ka raica ni ra vutuniyau na tamata ca.

⁴ Era sa sega ni bau sota kaya na rarawa; Era kaukauwa ka bulabula.

⁵ Era sega ni bau leqa me vakataki ira na tamata tale eso, Ka sega ni bau tauvi mate me vakataki ira na tani.

⁶ Ia era sa taubena na dokadoka me vaka na salusalu, kei na i tovo kaukauwa me vaka na i ubi balavu.

⁷ Sa sovaraka mai na yalodra na ca Ka sa sinai na nodra vakasama ena veinaki ca.

⁸ Era sa vakalialiai ira na tani ka veivosakitaka na veika ca; Era sa dokadoka ka veivosakitaka na nodra vakacacani na tani.

⁹ Era sa vosacataka na Kalou mai lomalagi Ka ra vakarota na veilewa viavialevu e vuravura,

¹⁰ Ia era sa gole mai kina vei ira na tamata ni Kalou Ka ra vakabauta sara na ka era kaya.

¹¹ Era sa kaya, “Ena sega ni kila na Kalou, Ena sega ni kunea o koya sa Cecere Sara.”

¹² Era sa vakaoqo na tamata ca, Sa levu na ka e tu vei ira, ka ra sa kumukumuni tikoga.

¹³ E sega li na kena yaga na noqu maroroi au me'u savasava, Kei na noqu sega ni vakayacora na i valavala ca?

¹⁴ Kemuni na Kalou, o ni sa vakavuna na noqu rarawa ena veisiga; O ni sa totogitaki au voli ena veimataka.

¹⁵ Kevaka au sa kaya na veika vaka o ya, Au na sega sara kina ni vaka na nomuni tamata.

¹⁶ Ni'u a tovolea vakaukauwa me'u walia na leqa oqo, Ia, sa rui dredre ga vei au

¹⁷ Me yacova na noqu a qai cabeta kina na nomuni Valenisoro. Au sa qai kila kina na ka ena yacovi ira na i valavala ca.

¹⁸ O ni sa biuti ira dina ki na vanua dravidravia Ka vakavuna me ra bale ki na rusa!

¹⁹ Sa sega ni bera na nodra vakarusai Ka lako sobu yani ki na dua na i cavacava rerevaki.

²⁰ Era sa vaka ga na tadra ka sa yali tale yani ena mataka; Ni o ni sa yadra cake, na Turaga, era sa takali ga yani.

²¹ Ena gauna sa rarawa kina na yaloqu Ka mosi vakalevu na yaloqu,

²² Au a sa lialia ga me vaka na manumanu; Ka'u sa sega ga ni kila rawa na lomamuni.

²³ Ia, au sa dau tiko raviti kemuni ga, Ka o ni sa qumia tikoga na ligaqu i matau.

²⁴ O ni sa tuberi au ena nomuni i vakasala Ka o ni na ciqomi au ena doka e muri.

²⁵ Na cava tale e noqu e tu mai lagi, ia oi kemuni ga? Ni o ni sa noqu, na cava tale au se gadreva e vuravura?

²⁶ Na noqu vakasama kei na yagoqu ena malumalumu mai, Ia, sa noqu vu ni kaukauwa ga na Kalou; Ni sai koya ga ka'u sa gadreva ena vuravura taucoko.

²⁷ O ira kece era biuti kemuni era na rusa vakaidina; O ni na vakarusai ira era sa sega ni yalodina vei kemuni.

²⁸ Ia vei au, sa ka talei duaduaga na tiko volekata na Kalou, Ka vakararavi ki na veitaqomaki loloma ni Turaga o Jiova, Ka kacivaka voli na veika kecega sa vakayacora o koya! A Masikili i Esava.