NA SAME 71 - Vakavakadewa Vou kei na iVola tale eso

A Masu ni Tamata sa Qase Cake Sara

¹ Kemuni i Jiova, au sa lako mai vei kemuni me'u taqomaki; Ni kakua ni laivi au me'u vakamadualaki!

² Ni vukei au ka vakabulai au ena vuku ni nomuni yalododonu. Ni rogoci au ka vakabulai au!

³ Mo ni noqu i vakavakaruru tudei, Ka noqu bainivalu kaukauwa me taqomaki au. Sa i kemuni na noqu i drodro ka dau taqomaki au.

⁴ Kemuni na noqu Kalou, Ni vakabulai au mada mai vei ira na tamata ca, Mai na ligana na tamata i tovo ca ka i vakarau kaukauwa.

⁵ Oi kemuni Jiova na Turaga, sai kemuni ga na noqu i nuinui, Ka'u sa vakadinati kemuni mai na gauna au se gone kina.

⁶ Au sa vakararavi ga vei kemuni ena noqu bula taucoko; Sa i kemuni talega ka sa maroroi au mai na kete i tinaqu. Au na dau vakacaucautaki kemuni tikoga.

⁷ Na noqu bula sa yaco me i vola dusidusi vei ira na lewe vuqa, E baleta ga ni o ni sa noqu dauniveitaqomaki qaqa.

⁸ Au na vakacaucautaki kemuni ena veisiga kecega, Ka tusanaka voli ga na nomuni lagilagi.

⁹ Ni kakua ni cati au ni'u sa qase mai oqo; Ni kakua ni biuti au ni'u sa malumalumu sobu oqo.

¹⁰ Era sa gadreva na kequ meca me ra vakamatei au; Era sa veivosaki ka bukiveretaki au.

¹¹ Era sa kaya, “Sa biuti koya na Kalou, Me da muri koya ka vesuka, Baleta ni sa sega ni dua me vakabulai koya.”

¹² Ni kakua ni yawa mai vei au, na Kalou; Na noqu Kalou, ni mai vukei au vakatotolo mada!

¹³ Me ra vakadrukai ka vakarusai o ira era ravuti au! Me ra vakamaduataki ka vakasewasewani o ira Era saga me ra vakamavoataki au.

¹⁴ Au na dauvakanuinui tikoga vei kemuni, Au na vakavinavinaka vakalevu cake tikoga vei kemuni.

¹⁵ Au na tukuna tikoga na nomuni yalododonu, Au na tusanaka tikoga ena veisiga kecega na nomuni veivakabulai, E dina ga ni sa levu cake mai na ka au rawa ni kila.

¹⁶ Au na vakacaucautaka na nomuni kaukauwa i Jiova na Kalou; Ka'u na tusanaka na nomuni yalododonu sa nomuni taudua ga.

¹⁷ O ni sa vakavulici au me tekivu sara mai na gauna au se gone kina, Ka'u na dau tukuna tikoga na nomuni cakacaka veivakurabuitaki.

¹⁸ Ia oqo au sa qase mai ka sa vulavula mai na uluqu, Ni kakua sara ni biuti au, na Kalou! Ni tiko ga kei au ni'u kacivaka na nomuni kaukauwa kei na qaqa Vei ira na veitabatamata kecega.

¹⁹ Na nomuni yalododonu na Kalou sa yaco ki na maliwa lala. O ni sa cakava na veika lelevu; Sa sega tale ni dua me vakataki kemuni.

²⁰ O ni sa vakavuna na noqu leqa kei na noqu rarawa, Ia, o ni na qai vakalesuya tale mai na noqu kaukauwa; Ka tarovi au mai na lako yani ki na i bulubulu.

²¹ O ni na qai vakalevutaka tale na noqu dokai, Ka na ia talega na veivakacegui.

²² Au na vakacaucautaki kemuni vakaidina ena api, Au na vakacaucautaka na nomuni yalodina, na noqu Kalou. Au na vakatagitaka na sere ena noqu api vei kemuni, Oi kemuni na Yalo Savasava ni Isireli.

²³ Au na kaila ena marau ni vakatagi tiko vei kemuni; Ka'u na sere voli ena yaloqu taucoko, Baleta ni o ni sa vakabulai au.

²⁴ Au na tukuna voli na nomuni yalododonu ena veisiga yadua, Ni ra sa vakadrukai ka vakamaduataki ga O ira era saga me ra vakacacani au. A nei Solomoni.