NA SAME 68 - Vakavakadewa Vou kei na iVola tale eso

¹ Me lamata cake na Kalou ka vakavuna me ra talabusese na nona meca. Me ra dro tani e matana o ira sa cati koya.

² Me vaka na kubou sa biliga tani na cagi, Sa biligi ira tani vakakina o koya; Me vaka na waicala ni kadrala ena mata ni bukawaqa, Era sa rusa vakakina na tamata ca ena mata ni Kalou.

³ Ia, era sa marau ga na yalododonu Ka vakavinavinaka ena mata ni Kalou; Io, sa malaude na yalodra ena reki.

⁴ Dou sere vua na Kalou, dou seretaka na yacana; Dou caramaka na sala i koya sa vodoka na veio. Na yacana o Jiova, ka mo dou reki e matana!

⁵ Na Kalou, o koya ka sa tiko ena nona vale tabu, Sa tamadra na luveniyali ka taqomaki ira na yada.

⁶ Sa solia vua sa galili na vanua me vakaitikotiko kina, Ka liutaki ira sa vesuki ki na bula sereki kei na marau; Ia era sa tiko ga ena vanua dravuisiga na tamata be.

⁷ Kemuni na Kalou, Ena nomuni kauti ira yani na nomuni tamata, Ena nomuni lako kosova na vanua lala,

⁸ A sa yavavala o vuravura, ka vakatauca o lomalagi na uca, Ena mata ni Kalou, na Kalou ni Saineai, Ena mata ni Kalou, na Kalou ni Isireli.

⁹ O ni sa vakavuna me tau vakalevu na uca Ka vakabulabulataka tale na nomuni qele sa matemate tu.

¹⁰ Era sa la'ki vakaitikotiko mai kea na nomuni tamata; Ka o ni sa veivakarautaki ga na Kalou Ena nomuni vinaka ki vei ira na dravudravua.

¹¹ Sa solia na i vakaro na Turaga, Ka ra lewe vuqa sara era sa kauta yani na kena i tukutuku.

¹² “O ira na tui kei na nodra mataivalu sa dro vakusakusa yani,” Ka sa veivotayaki na i toki ni valu e loma ni nodra i tikotiko.

¹³ Kevaka dou sa moce koto ena maliwa ni buka e tautuba, Na noqu ruve sa ukutaki na tabana ruarua ena siliva, Ka sa tatalivaliva na vutina ena koula dina.

¹⁴ Ni sa vakavuna o Koya sa Kaukauwa na nodra veiseyaki na tui ni veivanua, Oqo sa vaka na wai cevata vulavula e Ului Salimoni,

¹⁵ Sa ulunivanua cecere o Basani, A ulunivanua sa levu na kena ucuna momoto!

¹⁶ Oi kemuni sa veiulunivanua sukusukura, A cava li o ni rai vakatani mai kina Ki na ulunivanua sa digitaka na Kalou me tiko kina Me dautiko kina o Jiova ka sega ni mudu?

¹⁷ Sa lako mai Saineai na Turaga ki na vanua tabu Ena nona qiqi ni valu kaukauwa e udolu vakaudolu

¹⁸ A sa lako cake o koya ki na vanua cecere, Ka kauti ira yani e lewe vuqa na bobula ena nona qiqi; Sa taura na i solisoli mai vei ira na tamata. Ena tiko e kea o Jiova na Kalou.

¹⁹ Me vakacaucautaki na Turaga, O koya sa colata na nodra i colacola ena veisiga; Sa i koya na Kalou sa vakabulai keda.

²⁰ Na noda Kalou e dua na Kalou dauveivakabulai; Sa i Jiova, na noda Turaga Sa sereki keda mai na mate.

²¹ Na Kalou ena vorolaka na uludra na kena meca; O ira era vakayacora tikoga na nodra i tovo ca.

²² A sa kaya o Jiova, “Au na kauti ira lesu tale mai na kemuni meca mai Pasani. Au na vakalesui ira mai na loma ni wasawasa,

²³ Me sisili kina na yavamuni ena nodra dra, Ka ra dramica na nomuni koli na kedra i votavota.”

²⁴ Na nomuni tayabe ni qaqa, na Kalou, Era sa sarava na tamata kecega, Io, na nomuni i lakolako na Kalou, na noqu tui, ki na nomuni i tikotiko tabu.

²⁵ Era duri tu mai liu na matasere, Ka duri e dakudra na daunivakatagi, Era sa qai toka maliwai ira na goneyalewa dauqiri tibereli.

²⁶ “Me vakacaucautaki na Kalou ena nodra soqo vata mai na nona tamata; Mo ni vakacaucautaka na Kalou, oi kemuni kece na kawa i Jekope!”

²⁷ A sa liu mai o Penijamini, na yavusa lailai taudua, Sa qai tarava mai o ira na i liuliu e Juta kei ira na nodra i lawalawa, Ka ra sa tarava sara na i liuliu ni yavusa o Sevuloni kei Navitalai.

²⁸ Ni vakaraitaka mada na nomuni kaukauwa na Kalou, Na kaukauwa o ni dauvakayagataka ena vuku i keimami.

²⁹ Mai na nomuni Valenisoro mai Jerusalemi, Na vanua era dau kau ka ni loloma yani kina na tui.

³⁰ Vunauci Ijipita mada, na manumanu kila ni veigasau o ya; Ni vunauci ira mada na veimatanitu, na qele ni bulumakau o ya kei ira na dui luvedra Me yacova ni ra sa cuva sobu kece ka cabora vei kemuni na siliva. Ni vakasavi ira tani ga na tamata era dau vinakata na i valu!

³¹ Era na lako mai na mata mai Ijipita; Era na laveta cake na ligadra na kai Eciopea ena nodra masu vua na Kalou.

³² Ni sere vua na Kalou na veimatanitu e vuravura, Mo sere ena vakacaucautaka na Turaga.

³³ Vei koya sa vodo ena maliwa lala; Na maliwa lala makawa. Ni rogoci koya sa kaila ena domo levu.

³⁴ Ni kacivaka na kaukauwa ni Kalou; Sa tu ena dela i Isireli na nona i ukuuku, Ka sa tu na nona qaqa ena maliwa lala.

³⁵ Sa dua na ka talei ni sa tiko na Kalou ena nona vale tabu, Na nodra Kalou na Isireli! Sa dau solia o koya na qaqa kei na kaukauwa vei ira na nona tamata. Ni vakacaucautaka na Kalou. Vua na i liuliu ni sere: me vaka na i lagalaga ni “Viavia.” A nei Tevita.