NA SAME 65 - Vakavakadewa Vou kei na iVola tale eso

¹ Kemuni na Kalou, sa dodonu ga mo ni vakacaucautaki mai Saioni, Ka me keimami maroroya na neimami yalayala vei kemuni,

² Baleta ni o ni sa dau sauma na masu. Era na lako mai vei kemuni na tamata ni veivanua kecega

³ Ena vuku ni nodra i valavala ca. Sa vakadrukai keimami na neimami i tovo ca, Ia, o ni sa vosoti keimami ga.

⁴ Era sa kalougata na tamata o ni sa digitaka O ira sa kau vakavoleka mai me ra tiko ena nomuni vale tabu.

⁵ O ni sa dau sauma na neimami masu mai na nomu dausolia na qaqa ena i valu, Ka dau vakayaco-ka me keimami vakabulai kina. Na tamata ena dela i vuravura taucoko Kei ira mai na wasa era tu yawa sa vakadinati kemuni.

⁶ O ni sa vakatura na veiulunivanua ena dui kedra i tutu ena nomuni kaukauwa, Me vakaraitaka na nomuni kaukauwa levu.

⁷ O ni sa vakamaravutaka na seuseua ni wasawasa Kei na rorogo ni vadugu ni veibiau, O ni sa vakamaravutaka talega na nodra maue na tamata.

⁸ Sa domobula na vuravura taucoko, Baleta na veika lelevu o ni sa vakayacora. Sa vakavuna na kaila ni marau na nomuni cakacaka, Mai na dua na yasa i vuravura me yaco ki na yasana kadua.

⁹ O ni sa vakaraitaka na nomuni kauwaitaka na vuravura Ena nomuni vakatauca na uca; O ni sa vakavutuniyautaka na qele ka vakabulabulataka. Sa sega ni bau maca na uciwai o ni sa solia mai; Sa solia ki na vuravura na i tei. Sa i koya o ya na ka o ni sa cakava:

¹⁰ O ni sa vakatauca vakalevu na uca ena veivanua sa siviyara tu, Ka vakasuasuataka ena wai; O ni sa vakasuasuataka na qele ena uca Ka vakavuna me ra tubu mai na kau lalai.

¹¹ O ni sa vakavuna me vuavuai vinaka sara na i teitei. Io, sa sautu ga na vanua kecega o ni sa lako kina.

¹² Sa robo sara na vanua veico ena qele ni manumanu; Sa sinai ena marau na veiyasa ni ulunivanua.

¹³ Sa robota na vanua veico taucoko na sipi, Ka sa sinai na veibuca ena witi; Era sa kaila ga ka laga sere ena marau na ka kecega. Vua na i liuliu ni sere. A Sere. A Same.