NA SAME 64 - Vakavakadewa Vou kei na iVola tale eso

¹ Kemuni na Kalou, au sa leqa tu, ni rogoca na noqu masu! Ni vakabulai au mai na nodra veivakacacani na meca.

² Ni taqomaki au mai na nodra vere ca na tamata ca, Kei na nodra i tovo kaukauwa na tamata i valavala ca.

³ Era sa vagatara na yamedra me vaka na i seleiwau Ka vakadodonutaka na nodra vosa me vaka na gasau ni dakaititi.

⁴ Era sa vanataka mai na gasau ni dakaititi mai na nodra i vunivuni, Era sa vana mai vakasauri ka sega ni rere.

⁵ Era sa veivakayaloqaqataki vakai ira ena nodra vere ca Ka veivosakitaka na vanua me na caka kina na nodra dai. Era sa kaya, “Me kakua sara ni dua me raici keda.”

⁶ Era sa bukia na vere ca ka kaya, “Keimami sa nakita me cakava e dua na i tovo ca qaseqase sara.” Sa ka veivakurabuitaki dina na yalodra kei na vakasama ni tamata!

⁷ Ia sa vanai ira na Kalou ena nona gasau ni dakaititi, Ka ra sa mavoa sara vakasauri.

⁸ Ena vakarusai ira baleta na nodra vosa O ira kece era na raici ira era na kuretaka na uludra.

⁹ Era na rere taucoko sara, Era na tukuna na ka sa cakava na Kalou, Ka vakasamataka na veika sa cakava.

¹⁰ Era na marau kece na tamata yalododonu Baleta na ka sa cakava o Jiova, Era na taqomaki kece mai vua; Era na vakacaucautaki koya kece na tamata yalododonu. Vua na i liuliu ni sere. A Same i Tevita. A Sere.