NA SAME 62 - Vakavakadewa Vou kei na iVola tale eso

¹ Au sa vakararavi duadua ga vua na Kalou; Sa vu ga mai vua na noqu vakabulai.

² O koya duadua ga sa taqomaki au ka sa noqu i vakabula; Sa dau taqomaki au o koya, Au na sega sara ni vakadrukai rawa.

³ A cava na kena dede mo ni ravuta tikoga kina e dua na tamata Io, e dua ka nona kaukauwa e vaka ga na bai sa kabasu tu?

⁴ O ni sa gadreva mo ni biuti koya sobu mai na nona dokai; O ni sa dau taleitaka na lasu. O ni sa dau vosataka na vosa ni veivakalougatataki, Ia, o ni sa cudruvi koya ka rukaka ga ena lomamuni.

⁵ Au sa vakararavi taudua ga vua na Kalou; Au sa vakanuinui ga vua.

⁶ Sa i koya taudua ga sa dau taqomaki au ka sa noqu i vakabula; Sa viribaiti au o koya, Ka'u sa na sega sara ni vakadrukai.

⁷ Sa vakatautaki ga vua na Kalou na noqu vakabulai kei na noqu dokai; Sa i koya ga na noqu i sasabai kaukauwa; O koya talega na noqu i drodro.

⁸ Kemuni na noqu tamata, ni vakadinata na Kalou ena veigauna taucoko sara. Ni tukuna vua na nomuni leqa kecega, ni sai koya ga na noda i drodro.

⁹ Na tamata sa vaka ga e dua na i cegu cagi; Sa ka tawayaga ga na tamata. Biuti ira mada ena i vakarau, ka sa sega na kedra bibi; Era sa mamada cake mai na i duabulu na i cegu.

¹⁰ Kakua ni vakadinata na i valavala kaukauwa; Kakua ni nuitaka mo rawata e dua na ka ena butako, Veitalia sara ga kevaka e levu cake kina na nomu i yau, Kakua sara ni vakararavi kina.

¹¹ Au sa rogoca vakavuqa ni sa kaya vakaoqo na Kalou Ni sa nona ga na Kalou na kaukauwa,

¹² Ka sa vakakina na nona loloma tudei. Oi kemuni ga, na Turaga, o ni sa sauma na tamata yadua me vaka na i sau ni nona i valavala.