NA SAME 60 - Vakavakadewa Vou kei na iVola tale eso

A Masu ni Qaqa ni Oti na Druka

Vua na i liuliu; me vaka na i lagalaga ni “Na Viavia ni Veiyalayalati.” A Mikitami i Tevita, me i vakavuvuli; ni sa kabai o Arami Naraimi (Mesopotemia) kei Arami Soba (Siriasopa), ni sa lesu mai o Joape ka vakamatei ira na kai Itomi era lewe tinikarua na udolu ena Buca ni Masima.

¹ O ni sa biuti keimami na Kalou, ka vakadrukai keimami. O ni a cudruvi keimami, ia oqo, ni gole mai vei keimami!

² O ni vakavuna me uneune na vanua, o ni qai sea rua; Ia oqo mo ni sema vata tale baleta ni sa voleka ni kavida rua.

³ O ni sa vakavuna me ra vakaloloma na nomuni tamata; Ka keimami sa taceba wavoki ga me vaka na mateni.

⁴ O ni sa vakasalataki ira oti era sa rerevaki kemuni, Me rawa ni ra dro tani kina mai na veivakacacani.

⁵ Ni vakabulai keimami ena nomuni kaukauwa; Ni sauma mai na neimami masu, Me ra sereki rawa kina na tamata o ni sa lomana.

⁶ A sa kaya na Kalou ena nona vale tabu, “Au na wasei Sikemi ena reki ni qaqa, Ka wasea na buca o Sukoci vei ira na noqu tamata.

⁷ Sa noqu o Kiliati ka vakakina o Manasa; Sa noqu i sala kaukauwa o Ifereimi, Ka sa noqu i titoko vakatui o Juta.

⁸ Ia, au na vakayagataki Moapi me noqu beseni ni vuluvulu, Kei Itomi, au na viritaka vua na noqu i vava, Me i vakatakilakila ni sa noqu o koya. E nanuma beka o Filisitia me na kaila ena qaqa vei au?”

⁹ Kemuni na Kalou, o cei ena kauti au ki na lomanikoro vakabai? O cei ena kauti au ki Itomi?

¹⁰ Kemuni na Kalou, o ni sa biuti keimami dina li? O ni na sega beka ni tayabe vata yani kei na neimami mataivalu?

¹¹ Ni vukei keimami ena neimami valuti ira na meca Ni sa sega ni yaga na veivuke vakatamata!

¹² Ni sa tovata kei keda na Kalou, ena noda ga kina na qaqa; Ena vakadrukai ira na keda meca o koya. Vua na i liuliu: kei na i yaya ni vakatagi vaka-wa. A nei Tevita.