NA SAME 59 - Vakavakadewa Vou kei na iVola tale eso

A Masu me Vagalalataki mai vei Ira na Meca

Vua na i liuliu; me vaka na i lagalaga ni “Kakua ni Vakarusa.” A nei Tevita. A Mikitami, ni sa talaki ira na nona tamata o Saula me ra la'ki yadrava na vale i Tevita me ra vakamatei koya kina.

¹ Kemuni na Kalou, ni vakabulai au mai vei ira na kequ meca; Ni taqomaki au mai vei ira era valuti au.

² Ni vakabulai au mai vei ira na tamata ca o ya; Ni vagalalataki au mai vei ira na daulaba o ya!

³ Ni raica! Era sa wawa toka me ra mokuti au; Era sa soqoni vata mai na tamata ca me ra veivala kei au.

⁴ E sega ni vakavuna e dua na ka ca, se cala au cakava, E sega talega ni baleti au se baleta na noqu ca, Ka ra sa dui cici yani ki na nodra i tutu.

⁵ Ni tucake, i Jiova ni lewevuqa, ka mai vukei au; Ni raica mada oqo, oi kemuni na nodra Kalou na Isireli! Ni yadra cake ka totogitaki ira na veimatanitu; Ni kakua ni vosoti ira na tamata dauveidabui!

⁶ Era lesu tale mai ena yakavi, Ka tagi voli me vaka na koli ni ra lako voli e lomanikoro.

⁷ Rogoca mada na ka era kaya! Na yamedra sa vaka na i seleiwau ena gusudra, Ia era sa kaya, “O cei ena rogoci keda?”

⁸ Ia o ni sa dredrevaki ira Turaga, O ni sa vakalialiai ira na veimatanitu!

⁹ O ni sa dautaqomaki au, Au sa maroroi mai vei kemuni; Kemuni na Kalou, sai kemuni na noqu i drodro.

¹⁰ Sa daulomani au na noqu Kalou ka na lako mai vei au; Ena vakayacora me'u raica na nodra vakadrukai na noqu meca.

¹¹ Ni kakua ni vakamatei ira na Kalou me ra kakua ni guilecavi ira kina na kai noqu. Ni veibiuyaki ira ena nomuni kaukauwa ka vakarusai ira, Kemuni na Turaga, na neimami i sasabai.

¹² Sa tu na ca ena tebe ni gusudra; sa ca kecega na nodra vosa; Me ra vesu mada ga ena nodra viavialevu! Ena vuku ni nodra ruru kei na vosa lasu,

¹³ Mo ni vakarusai ira kina ena nomuni cudru; Me ra sa vakarusai vakadua sara ga. Era sa qai kila na tamata kecega ni sa veiliutaki na Kalou e Isireli, Ka sa tete yani na nona lewa ki na vuravura taucoko!

¹⁴ Era sa lesu tale mai na kequ meca ena yakavi Ka tagi voli me vaka na koli era lako voli ena lomanikoro.

¹⁵ Era lako voli ena vaqara kakana Ka vosa kudrukudru ni sega ni levu na ka era kania.

¹⁶ Ia, au na seretaka ga na nomuni kaukauwa; Ka'u na seretaka vakadomoilevu na nomuni loloma tudei ena kida ni dua na mataka vou. Ni o ni sa dau noqu i drodro, ka i vakavakaruru ena gauna ni noqu leqa.

¹⁷ Au na vakacaucautaki kemuni sa dau taqomaki au; Ni sai kemuni ga, na Kalou, na noqu i drodro, Io, na Kalou sa dau vakatakila vei au na nona loloma tudei.