NA SAME 52 - Vakavakadewa Vou kei na iVola tale eso

Na Nodra Lewai na Tamata Ca

Vua na i liuliu ni sere; a Masikili. A Same i Tevita ni sa lako mai o Toeki na kai Itomi vei Saula ka tukuna vua, “Sa lako mai o Tevita ki na vale i Eiimeleki.”

¹ O iko na tamata qaqa, Na cava o rui cibitaka kina na nomu i tovo vakasisila? Na yalodina ni Kalou ena ia tikoga ka sega ni mudu.

² O sa ia na buki vere mo vakarusai ira na tani; Na yamemu sa vaka na batinitoro gata. O sa daubuli lasu voli ga.

³ O sa taleitaka vakalevu cake na ca mai na vinaka, Kei na veika lasu mai na veika dina.

⁴ O sa dau taleitaka mo vakacacani ira na tamata ena nomu vosa lasu.

⁵ Sa i koya oqo ena vakarusai iko kina na Kalou ka sega ni mudu; Ena tauri iko ka kauti iko tani mai na nomu valelaca; Ena kauti iko tani mai na nodra vanua na bula.

⁶ Era na raica na ka oqo na tamata yalododonu ka ra rere; Era na dredrevaki iko ka kaya,

⁷ “Raica, sai koya oqo e dua na tamata sa sega ni via vakararavi ki na veitaqomaki ni Kalou; Ia, sa vakararavi ga ki na nona i yau levu Ka vaqara me taqomaki ena nona i tovo ca!”

⁸ Ia, au sa vaka ga na vuniolive sa tubu tiko ena vale ni Kalou; Ka'u sa vakadinata ga na nona loloma tudei ka sega ni mudu.

⁹ Au na dau vakavinavinaka tikoga vei kemuni, na Kalou ena vuku ni veika o ni sa vakayacora; Au na dau tukuna tikoga na nomuni vinaka e matadra na nomuni tamata. Vua na i liuliu ni sere: me vaka na Maalaca; a Masikili i Tevita.