NA SAME 50 - Vakavakadewa Vou kei na iVola tale eso

¹ O koya sa Kaukauwa, na Kalou o Jiova, Sa kaci yani ki vuravura taucoko mai tokalau ki na ra.

² Sa serauni na Kalou mai Saioni, Na koro sa uasivi sara ena kena i rairai totoka.

³ Sa lako tiko mai na noda Kalou, ia sa sega ga ni lako lo mai; Sa tu e matana na bukawaqa rerevaki Ka wavoliti koya na cava kaukauwa.

⁴ Sa kacivi lomalagi kei vuravura me rau i vakadinadina Me rau raici koya ni sa veilewaitaki ira na nona tamata.

⁵ Sa kaya o koya, “Kumuni ira vata mai na noqu tamata yalodina vei au, O ira era sa cakava vata kei au e dua na veiyalayalati ena nodra vakacabora vei au na i soro.”

⁶ Sa tukuna na lomalagi ni sa yalododonu na Kalou, Ka sai koya taudua ga na turaganilewa.

⁷ “Ni vakarorogo mada na noqu tamata, ka'u sa na vosa yani. Au sa na vakadinadinataka na nomuni cala na Isireli. Oi au na Kalou na nomuni Kalou.

⁸ Au sa sega ni vunauci kemuni me baleta na nomuni i soro, Kei na veisoro kama o ni dau kauta mai vei au.

⁹ Au na sega ni vinakata na bulumakau tagane mai na nomuni lomanibai ni manumanu, Se na me mai na nomuni qele ni me.

¹⁰ Era sa noqu kece sara na manumanu ni veikau Kei na bulumakau ena udolu na veidelana.

¹¹ Na manumanu vuka kila kece era sa noqu, Kei na veika bula kecega ni dela ni vanua.

¹² “Kevaka au a viakana au na sega ni tukuna vei kemuni Baleta ni vuravura kei na veika kece era tu kina sa noqu.

¹³ Au dau kania li na lewe ni bulumakau, Se gunuva na dra ni me?

¹⁴ Ni cakava na vakavinavinaka me nomuni soro vua na Kalou, Ka solia vua sa Cecere sara na veisolisoli o ni sa yalataka.

¹⁵ Ni masu mai vei au ni sa yaco mai na leqa, Au na vakabulai kemuni, Ia o ni na qai vakacaucautaki au.”

¹⁶ Ia sa kaya na Kalou vei ira na tamata ca, “Na cava o ni cavuta kina na noqu i vakaro? Na cava o ni veivosakitaka kina na noqu veiyalayalati?

¹⁷ O ni sega ni vinakata me'u vakadodonutaki kemuni, Ka cata na noqu i vakaro.

¹⁸ Ni o ni raica e dua na daubutako, O ni yaco sara mo ni nona i tokani,

¹⁹ “Ka lesu vata kei ira na dauveibutakoci Ka sega ni wawa ni o ni tukuna na veika lasu.

²⁰ O ni sa dau vakarau tu ga mo ni beitaka na wekamuni Ka vakaraica na nodra cala.

²¹ O ni sa cakava na ka kece oqo, ka'u a galu ga, Ka o ni nanuma kina ni'u sa vakataki kemuni. Ia oqo ka'u sa vunauci kemuni kina, Ka vakotora vakamatata e matamuni na nomuni cala.

²² “Mo ni rogoca mada oqo, Oi kemuni na dautalaidredre vei au, De'u qai ravuti kemuni, Ka sega e dua me vueti kemuni.

²³ Na vakavinavinaka sai koya na i soro ka'u sa rokovi kina, Ka'u na vakabulai ira vakaidina sa talairawarawa vei au.”