NA SAME 5 - Vakavakadewa Vou kei na iVola tale eso

¹ I Jiova, mo ni vakatudaliga ki na noqu vosa, Ka kauwaitaka na noqu vakanananu.

² Sa i kemuni na noqu Tui kei na noqu Kalou, Ka mo ni rogoca mai na domo ni noqu tagi Ni'u sa masu ga vei kemuni.

³ I Jiova, o ni sa rogoca na domoqu ena kida ni mataka, Ena kida ni mataka, au sa masu yani vei kemuni, Ka'u sa wawa ka namaka tiko na kena i sau.

⁴ O ni sa Kalou ka o ni sega ni rekitaka na i valavala ca; Ka sega ni laiva na ca me vakayacori e matamuni.

⁵ O ni sa sega ni laiva na tamata dokadoka me tu e matamuni Ka cati ira kece na tamata i valavala ca.

⁶ O ni sa cati ira na tamata lasulasu kecega me tu e matamuni Ka i vakarau kaukauwa ka lawaki ca.

⁷ Ia oi au, au sa lako mai ki na nomuni vale Ena vuku ga ni nomuni loloma levu.

⁸ Au na cuva sobu vei kemuni ena vakarokoroko Ni tuberi au me'u vakayacora na lomamuni, Ka vakadodonutaka e mataqu na nomuni sala me'u muria.

⁹ Na ka era kaya na kequ meca ena sega ni vakadinati Era sa dau vinakata ga me ra veivakarusai. Na gusudra sa vaka e dua na i bulubulu sa dola tu Ia na nodra vosa sa veicavilaki ka veivakacalai.

¹⁰ Ni vakarusai ira ka totogitaki ira na Kalou; Ni vakadaroya na nodra i naki ca e vuqa. Ni viritaki ira tani mai na matamuni Baleta na nodra i valavala ca e vuqa Kei na nodra veisaqasaqa kei kemuni.

¹¹ Era na marau o ira kecega o ni sa taqomaki ira Ka ra dau laga sere tikoga ena marau. O ni sa taqomaki ira era sa lomani kemuni Ka ra sa marau dina me baleti kemuni.

¹² O ni vakalougatataki ira era sa talairawarawa vei kemuni Jiova, Ka taqomaki ira ena nomuni yalovinaka me vaka e dua na i sasabai.