NA SAME 48 - Vakavakadewa Vou kei na iVola tale eso

¹ Sa Cecere ga o Jiova ka dodonu me vakacaucautaki vakalevu Ena koro ni nodra Kalou, ena nona ulunivanua tabu.

² Sa cecere ka totoka na ulunivanua ni noda Kalou, o Saioni; Sa kauta mai na reki ki na vuravura taucoko na nona koro na Tui cecere.

³ Sa vakaraitaka na Kalou ni sa tu vua na veitaqomaki vinaka ena veitikotiko sa lesi me ra i drodro ena loma ni koro.

⁴ Era sa soqoni vata na tui, Ka ra mai valuta na ulunivanua o Saioni.

⁵ Ia, era sa qai kurabui ga ni ra sa sarava; Ka sa tuburi ira mai na rere ka ra veidroyaki.

⁶ A sa yacovi ira na rere kei na taqaya e kea Me vaka e dua na yalewa sa vakarau vakasucu.

⁷ Me vaka na vakarusai ni waqa lelevu ena cagi kaukauwa.

⁸ Keimami a dau rogoca na ka e dau cakava na Kalou, Ka keimami sa qai vakadinadinataka oqo Ena koro ni noda Kalou o Jiova ni lewevuqa; Ena taqomaki vinaka na koro o koya ena veigauna kecega.

⁹ Ena loma ni nomuni Valenisoro, oi kemuni na Kalou, Keimami sa vakananuma kina na nomuni loloma tudei.

¹⁰ O ni sa vakacaucautaki mai vei ira na tamata mai na veivanua kecega Ka sa tete yani na kemuni i rogorogo ki na vuravura taucoko. O ni sa dauvakataulewa ga ena dina kei na dodonu;

¹¹ Ni laiva me ra marau na lewe i Saioni! O ni sa dau vakotora na lewa dodonu; Ni laiva me yaco na reki ena veikoro e Juta!

¹² Oi kemuni na tamata ni Kalou, Ni lako wavokiti Saioni ka wilika na kena veivale cere-i-cake;

¹³ Dikeva mada na kena bai ka vakaraica vinaka na kena lalaga. Ka mo ni qai talanoataka vei ira na i tabatamata e tarava.

¹⁴ Ni Kalou oqo e noda Kalou ka sega ni mudu; Ena liutaki keda tikoga ena veigauna kecega sa bera mai. Vua na i liuliu ni sere. A nodra Same na luve i Kora.