NA SAME 45 - Vakavakadewa Vou kei na iVola tale eso

¹ Sa sinai na gusuqu ena veivosa talei, Ena noqu bulia na qaqa ni sere oqo me baleta na tui; Me vaka na nona peni na daunivola i vola vinaka, Sa tu vakarau vakakina na serekali me laiva na yamequ.

² Na kemuni i rairai sa uasiviti ira na turaga musudonu kecega; Ka o ni sa turaga gusu laulau ena vosa. Sa dau vakalougatataki kemuni tikoga na Kalou.

³ Mo ni vauca e tolomuni na nomuni i seleiwau, kemuni saka na tui qaqa; Ni o ni sa kaukauwa ka cecere sara.

⁴ Mo ni vodo yani ena lagilagi kei na qaqa, Ena vuku ni dina, na yalomalumalumu, kei na dodonu. Me vakatakila na ligamuni matau na nomuni cakacaka lelevu.

⁵ Sa gata sara na nomuni gasau ni dakaititi, Ka sa coba ki na utodra na kemuni meca; Era sa bale e ruku ni yavamuni na veimatanitu.

⁶ Na i dabedabe vakatui sa solia vei kemuni na Kalou Ena tudei ka sega ni mudu! O ni sa lewa na nomuni matanitu ena lewa dodonu,

⁷ O ni sa taleitaka na ka e dodonu ka cata sara na ka ca. Sa i koya oqo sa digitaki kemuni kina na Kalou, o koya na nomuni Kalou Ka sa sovaraka vakalevu duadua ga vei kemuni na marau Ka qai lailai vei ira na vo ni tui.

⁸ Sa kuvuraka na i boi ni mura, yasi kei na kasia ena nomuni i sulu; Ka ra vakamarautaki kemuni na daunivakatagi ena valenitui sa ukutaki ena ivori.

⁹ O ira na raluve era sa tiko kei ira na marama ena nomuni vale, Ka sa tucake tu na ranadi ena yasa i matau ni dabedabe vakatui, Ka sa daramaka na veiukuuku koula dina.

¹⁰ Kemuni na ranadi ni rogoca mada na noqu vosa, Guilecavi ira mada na kai nomu kei ira na wekamuni.

¹¹ Na kemuni totoka ena vakavuna me vinakati kemuni kina na tui; Sa i koya na nomuni turaga ka sa dodonu mo ni talairawarawa vua.

¹² Era sa kauta mai vei kemuni na veika ni loloma na tamata mai Taia, Ka ra sa sega ni tamata vutuniyau mo ni vinakati ira.

¹³ Sa tiko na raluve ena valenitui — sa totoka dina na kena i rairai! Ka sa tali na nona i sulu ena wa koula.

¹⁴ Sa kau yani vua na tui, ni sa dara tu na nona i sulu rairai totoka, Ka ra muri koya yani na nona goneyalewa dauveiqaravi.

¹⁵ Era sa lako yani ena reki kei na marau, Ka la'ki curu sara ki na valenitui.

¹⁶ Oi kemuni, na noqu tui, ena lewe vuqa na luvemuni tagane, Me ra na sosomitaki ira na nomuni qase, Ka o ni na lesi ira me ra lewa na vuravura kecega.

¹⁷ Na noqu sere ena vakavuna me dau nanumi tikoga na yacamuni, Ka ra na vakacaucautaki kemuni na tamata kecega ena veigauna kecega e muri. Vua na i liuliu ni sere. A nodra na luve i Kora. A Sere ena Alamoca.