NA SAME 44 - Vakavakadewa Vou kei na iVola tale eso

¹ Kemuni na Kalou, keimami sa rogoca e daliga i keimami, Ka ra sa tukuna vei keimami na neimami qase Na veika lelevu o ni a cakava ena nodra gauna e liu:

² Na nomuni a vakasavi ira tani na tawa vakabauta Ka qai vakatikori ira na nomuni tamata ena nodra vanua; Na nomuni a totogitaki ira na veimatanitu Ka vakavuna me ra tiko vinaka na nomuni tamata.

³ Era a sega ni rawata na vanua na nomuni tamata ena nodra i seleiwau; Ka ra sega ni qaqa ena nodra kaukauwa ga; Ia, ena nomuni kaukauwa ga kei na nomuni qaqa, Ena vakadeitaka ni o ni sa tu voleka, Ka sa vakaraitaka oqo na nomuni lomani ira.

⁴ Sa i kemuni na noqu Tui kei na noqu Kalou; O ni sa solia na qaqa vei ira na nomuni tamata.

⁵ Sa vakadrukai ga na keimami meca mai na nomuni kaukauwa; Ka ra vakamalumalumutaki ena yacamuni.

⁶ Au sa sega ni vakararavi ki na noqu dakaititi, Se nuitaka na noqu i seleiwau me vakabulai au;

⁷ Ia, o ni sa vakabulai keimami mai vei ira na meca, Ka vakadrukai ira era sa cati keimami.

⁸ Keimami na dauvakacaucautaki kemuni tikoga, Ka vakavinavinaka vei kemuni ka sega ni mudu.

⁹ Ia oqo, kemuni na Kalou, o ni sa biuti keimami, Ka laiva me keimami vakadrukai; O ni sa sega ni lako vata kei ira na neimami mataivalu.

¹⁰ O ni sa vakavuna me keimami dro tani mai vei ira na keimami meca, Ka ra taura na veika keimami taukena.

¹¹ O ni sa laivi keimami me keimami vakamatei me vaka na sipi, Ka vakasevi keimami ki na veimatanitu.

¹² O ni sa volitaki ira na nomuni tamata ena dua na i sau lailai, Ka sa sega na tubu e rawa mai kina.

¹³ Era sa raica na neimami i tokani na ka o ni sa cakava vei keimami, Ka ra sa vakalialiai keimami ka veiwalitaki keimami talega.

¹⁴ O ni sa cakava me dua na ka ni veivakamaduataki ena kedra maliwa na veimatanitu; Ka ra sa kurea na uludra ena nodra beci keimami.

¹⁵ Au sa vakamaduataki ena gauna kecega, Ka'u sa luvuci sara ena madua,

¹⁶ Ena noqu rogoca na nodra veivakalewai kei na veivakacacani na kequ meca.

¹⁷ Na veika kece oqo sa yacovi keimami, Ka dina ga ni keimami sega ni guilecavi kemuni Se voroka na nomuni veiyalayalati kei keimami.

¹⁸ Keimami sa sega ni bau gole tani mai vei kemuni Ka sega ni bau talaidredre ki na nomuni veivakaro.

¹⁹ Ia, o ni sa laivi keimami tu ga e matadra na manumanu kila Ka biuti keimami duadua tu ena vanua butobuto sara.

²⁰ Kevaka keimami a muduka na qaravi koya na neimami Kalou Ka masuta tale e dua na kalou tani,

²¹ O ni na qai kila deivaki ga Baleta ni o ni sa kila na i naki vuni ni loma i keimami.

²² Io, ena vukumuni keimami sa vakamatei kina ena gauna kecega, Ka okati me vaka na sipi me la'ki vakamatei.

²³ Ni yadra mai, na Turaga! Na cava o ni moce tiko kina? Ni tucake! Ni kakua ni biuti keimami vakadua!

²⁴ Na cava o ni vunitaki kemuni tiko kina vei keimami? Ni kakua ni guilecava na neimami vakararawataki kei na neimami leqa!

²⁵ Keimami sa lutu ka dasila ena qele; Keimami sa davo druka tu ena soso.

²⁶ Ni tucake ka vukei keimami! Ni vakabulai keimami ena vuku ni nomuni loloma tudei. Vua na i liuliu ni sere. A nodra Masikili na luve i Kora. A sere ni veidomoni.