NA SAME 40 - Vakavakadewa Vou kei na iVola tale eso

¹ Au a waraka tikoga na veivuke i Jiova; Sa qai vakatudaliga mai vei au ka rogoca na noqu tagi.

² Sa dreti au cake mai na dua na qara rerevaki, Io, mai na dua na qara lolobo sara! A sa vakatikori au ena dela ni vatu Ka sa vakadeitaka na yavaqu.

³ Sa vakavulici au me'u lagata e dua na sere vou, Na sere e vakacaucautaki kina na noda Kalou. Era lewe vuqa era na raica na ka oqo ka ra na rere, Ka ra na yaco me ra vakadinati Jiova.

⁴ Sa kalougata na tamata sa vakadinati Jiova, Ka sa sega ni goleva na veikalou matakau, Se duavata kei ira era qarava na veikalou lasu.

⁵ Kemuni Jiova na neimami Kalou, Sa vuqa sara na ka o ni sa cakava vei keimami, Sa sega tale e dua me vakataki kemuni! Sa vuqa na i naki vinaka o ni sa tuvana vei keimami, Kevaka au via vakamacalataka kece Au sa na sega ni wilika rawa na kedra levu!

⁶ O ni sa sega ni vinakata na i soro kei na i soro kama: O ni sa sega ni gadreva me vakamai taucoko ena i cabocabonisoro na veimanumanu; Era vakacabori ena i cabocabonisoro se na i soro me bokoci kina na i valavala ca. Ia, o ni sa solia ga vei au na daliga me'u rogoci kemuni kina.

⁷ Ka'u a qai sauma yani, “Oi au oqo; Sa tu na nomuni vakaro me baleti au ena nomuni vola ni lawa.

⁸ Au rekitaka dina me'u vakayacora na lomamuni na noqu Kalou! Io, ka'u sa tugana na nomuni vakavuvuli ki na vu-ni-yaloqu.”

⁹ Au sa tukuna oti na i tukutuku vinaka ni veivakabulai i Jiova, Ena nodra soqoni levu na nomuni tamata. O ni sa kila ga, i Jiova Ni'u na sega ni cegu ena noqu tukuna tikoga.

¹⁰ Au na sega ni vunia tikoga e lomaqu na i tukutuku ni nomuni veivakabulai; Au na dautukuna tikoga na nomuni yalodina kei na veivuke. Au sega ni dau galuvaka na nomuni loloma tudei, Kei na nomuni yalodina ena nodra soqoni na nomuni tamata.

¹¹ Kemuni Jiova, Ni kakua ni muduka na nomuni yaloveivosoti vei au. Ka me taqomaki au ga na nomuni loloma tudei kei na yalodina.

A Masu ni Kere Veivuke

¹² Sa wavoliti au e vuqa sara na leqa, Ka sa sega ni wili rawa! Sa vesuki au na noqu i valavala ca Ka'u sa sega kina ni rai rawa; Sa levu cake mai na i wiliwili ni drau ni uluqu, Ka'u sa yalo lailai sara ga kina.

¹³ Ni yalovinaka, i Jiova, mo ni vakabulai au! Me yaco totolo mai vei au na nomuni veivuke.

¹⁴ O ira era saga me ra vakamatei au Me ra vakadrukai ga ka me ra veilecayaki; Me ra vakasukai lesu ka vakamadualaki O ira sa vinakata me ra vakamavoataki au.

¹⁵ Me ra vakalolomataki ena vuku ni nodra madua O ira era sa dredre ni veivakalialiai vei au.

¹⁶ Me ra reki ka marau O ira kece era lako mai vei kemuni; Me ra kaya tikoga o ira era lomana na nomuni veivakabulai, “Sa cecere ga o Jiova!”

¹⁷ Au sa leqa ka dravudravua, Ia, sa nanumi au ga na Turaga. Sa i kemuni na noqu i dauniveivukei ka dauniveiseki; Ni kakua ni vakaberabera, na noqu Kalou. Vua na i liuliu ni sere. A Same i Tevita.