NA SAME 39 - Vakavakadewa Vou kei na iVola tale eso

¹ Au a kaya, “Au na qarauna na ka au cakava, Ka'u na sega tale ni laiva na yamequ me i valavala ca; Au na sega ni kaya e dua na ka, Ni ra tu volekati au na tamata ca.”

² Au na galu ka sega ni kaya e dua na ka vinaka. Ia sa qai toro sobu ga na ka rarawa au sota kaya.

³ Sa sinai na lomaqu ena nuiqawaqawa. Na levu ga ni noqu vakasamataka, na levu ni noqu leqa, Ka'u sa qai dolava kina na gusuqu, ka kaya:

⁴ ‘Kemuni Jiova, ena vakacava soti na dede ni noqu bula?’

⁵ Sa lekaleka dina na bula o ni solia vei au! Ni sa sega ni dua na ka e matamuni na noqu veiyabaki. E dina sara, ni sa vaka ga e dua na i cegu cagi na tamata.

⁶ E dina ga, ni sa lako voli na tamata me vaka na i yaloyalo ga ni dua na ka. Na veika kece e cakava sa ka wale ga; Sa kumuna vata na i yau, ia, sa sega ni kila se o cei ena taukena.

⁷ Noqu Turaga, me'u na vakanuinui tale ena cava? Au sa vakanuinui ga vei kemuni.

⁸ Ni vakabulai au mai na noqu i valavala ca kecega, Ka kakua ni laivi ira na lialia me ra vakalialiai au.

⁹ Au na galu ka'u na sega ni kaya e dua na ka Baleta ni o ni sa lewa me'u sota kaya na ka oqo.

¹⁰ Ni kakua tale ni totogitaki au; Au sa voleka ni mate ni sa mokuti au na ligamuni!

¹¹ O ni sa cudruva na neimami i valavala ca mai na nomuni veivunauci, Ka o ni sa vakacacana me vaka na sarasara na ka sa talei vei keimami; Sa dina sara, ni da sa vaka ga e dua na i cegu cagi!

¹² Ni rogoca na noqu masu i Jiova Ka vakatudaliga mo ni rogoca na noqu kerekere, Ni kakua ni galu ni'u tagi yani vei kemuni! Au sa vakataki ira ga na noqu qase Ni'u sa nomuni vulagi ga vakalekaleka.

¹³ Ni laivi au taudua, me'u rawa ni bau marau mada Ni bera ni'u qai lako tani yani ka sega ni kune tale. Vua na i liuliu ni sere. A Same i Tevita.