NA SAME 38 - Vakavakadewa Vou kei na iVola tale eso

¹ Kemuni Jiova ni kakua ni vunauci au ena nomuni cudru! Ni kakua ni totogitaki au ena nomuni rarawa!

² Ni sa vakamavoataki au na nomuni gasau ni dakaititi; O ni sa mokuti au sobu.

³ Au sa mosi vakalevu sara ena vuku ni nomuni cudru: Sa tauvimate kece na yagoqu ena vuku ni noqu caka cala.

⁴ Sa luvuci au na levu ni noqu i valavala ca, Ka sa bibi sara me vaka e dua na i colacola bibi vei au.

⁵ Sa boi ca ka nana na noqu vidikoso Ena vuku ni noqu lialia.

⁶ Au sa vakalairoro sara, ka cuva ki ra, Ka tagi voli ena veisiga taucoko.

⁷ Sa tauvi au na katakata, Ka'u sa tauvi mate bibi sara.

⁸ Au sa malumalumu sara ka vakadrukai; Sa leqa na yaloqu ka'u sa vutugu ena rarawa.

⁹ Kemuni Jiova o ni sa kila na ka kece au gadreva; O ni sa rogoca kece na noqu vutugu.

¹⁰ Sa vadugu na utoqu, ka sa takali na noqu kaukauwa; Sa takali talega na rarama ni mataqu.

¹¹ Era sa sega ni toro voleka mai vei au na wekaqu kei ira na noqu i tokani baleta na noqu vidikoso. Ka ra sa tu vakayawa mai vei au na wekaqu voleka.

¹² O ira era via vakamatei au sa cakava na nodra dai me'u coko kina, Ka vakakina o ira era via vakamavoataki au; Era sa sega ni cegu ena nodra nakicataki au voli.

¹³ Au sa vaka na tamata didivara, sa sega ni rogo rawa; Ka vaka na tamata galu, sa sega ni vosa rawa.

¹⁴ Au sa vakataki ira sa sega ni dau sauma na vosa Baleta ni ra sa sega ni rogoca rawa e dua na ka.

¹⁵ Ia, au sa vakadinati kemuni ga i Jiova; Sa i kemuni ga, na Turaga na noqu Kalou, o ni na rogoci au.

¹⁶ Ni kakua ni laivi ira na noqu meca me ra marau ena vuku ni noqu rarawa. Ni kakua ni laivi ira me ra dokadoka ena noqu bale.

¹⁷ Sa voleka ni'u bale, Ka sa tiko dei ga vei au na noqu vutugu.

¹⁸ Au sa vakatusa na noqu i valavala ca e vuqa, Ka ra sa vakalomaocaocataki au.

¹⁹ Era sa bulabula ka kaukauwa na kequ meca; Sa lewe vuqa era cati au ka sega na vuna.

²⁰ O ira era sauma na noqu vinaka ena ca, Era sa saqati au baleta ni'u saga me'u cakava na ka dodonu.

²¹ Ni kakua ni biuti au, i Jiova, Ni kakua ni yawa tani mai vei au, na noqu Kalou.

²² Ni mai vukei au oqo na Turaga na noqu i vakabula. Vua na i liuliu ni sere; vei Jitucuni. A Same i Tevita.