NA SAME 37 - Vakavakadewa Vou kei na iVola tale eso

¹ Kakua ni taqaya ena vukudra na tamata ca; Kakua ni vuvutaki ira era daucaka cala;

² Era na takali yani me vaka na co madu, Ka ra na mate me vaka na kau sa malai.

³ Mo vakadinati Jiova ga ka cakava na ka dodonu, O na qai tawana tikoga na vanua ka taqomaki vinaka.

⁴ Vakasaqara na nomu marau vei Jiova Ena qai solia vei iko o koya na ka sa gadreva na yalomu.

⁵ Mo solia na nomu bula vei Jiova; Vakadinati koya, ena qai vukei iko o koya;

⁶ Ena cakava o koya me serau na nomu vinaka me vaka na rarama, Kei na nomu yalododonu me vaka na rarama ni siga ena sigalevu tutu.

⁷ Tiko vakanomodi ena mata i Jiova ka waraki koya tiko; Kakua ni loma leqa ena vukudra era tiko vinaka Se ena vukudra era rawata vinaka na nodra i naki ca.

⁸ Kakua ni rawai ena lomaleqa kei na cudru; Ena tini ga ki na leqa.

⁹ O ira era vakadinati Jiova era na taukena na vanua; Ia, o ira ga na tamata ca era na vakasavi tani.

¹⁰ Ena sega soti ni dede era sa na takali yani na tamata ca, O na qai vaqarai ira, ia o na sega ga ni raici ira tale.

¹¹ Ia, o ira sa yalomalua era na taukena na vanua, Ka marautaka na bula sautu.

¹² Sa bukiveretaka na tamata yalododonu o koya na tamata ca Ka marautaka na bula sautu.

¹³ Ia, ena dredrevaka koya na Turaga, baleta ni sa kila ni sa vakarau vakarusai.

¹⁴ Era sa ucuna na nodra i seleiwau na tamata ca, ka loveca na nodra dakaititi, Me ra vakamatei ira kina na dravudravua kei na vakaloloma, Ka mokuti ira na tamata daucakacaka vakadodonu;

¹⁵ Ia, era na lausua ga ena nodra i seleiwau, Ka musulaki na nodra dakaititi.

¹⁶ Sa vinaka cake na ka lailai e taukena na tamata yalododonu Mai na i yau levu e taukena na tamata sega ni yalododonu,

¹⁷ Ni na kauta tani o Jiova na nodra kaukauwa na tamata ca, Ia, ena taqomaki ira ga na tamata i vakarau dodonu.

¹⁸ Sa taqomaki ira era talairawarawa vua o Jiova Ka ra na taukena na vanua ka sega ni mudu.

¹⁹ Era a sega ni sotava na ka rarawa ena veigauna ca, ka na levu tu ga na kedra ena gauna ni dausiga.

²⁰ Ia, era na vakamatei ga na tamata i tovo vakasisila; Kei ira na meca i Jiova era na takali yani me vaka na senikau ni vanua ni veikau; Era na seyavu yani me vaka na kubou.

²¹ Ni ra dinau na tamata ca, era sa sega ni dau sauma lesu tale; Ia, sa dau lomasoli ga ka yalovinaka na tamata yalododonu.

²² O ira sa vakalougatataki ira na Turaga era na tiko ka taqomaki vinaka ena nodra vanua. Ia, era na vakasavi tani yani o ira era sa cudruvi mai vua.

²³ Sa dau tubera na tamata o Jiova ena sala sa dodonu me lako kina, Ka sa taleitaka na nona i valavala.

²⁴ Kevaka sa bale, ena sega ni davo tu ga Baleta ni na vakaturi koya cake tale o Jiova.

²⁵ Au sa qase mai oqo oi au; ka'u sa bula balavu mai, Ia, e sega mada ni'u se bau raica me biuti ira tu na yalododonu o Jiova, Se me ra kere kakana tu na luvedra.

²⁶ Era sa dau lomasoli ga ena veigauna kecega ka dau soli-ka vei ira na tani, Ka ra sa yaco me ra ka ni veivakalougatataki na luvedra.

²⁷ Gole tani mai na ca ka cakava na ka vinaka, O na qai bula sautu tiko ena veigauna kecega,

²⁸ Baleta ni vinakata o Jiova na ka dina Ka sega ni biuti ira na nona tamata yalodina. Sa dau taqomaki ira tikoga, Ia, na luvedra na tamata ca era na vakasavi tani yani.

²⁹ Era na taukena na vanua na yalododonu Ka ra tiko ga kina ka sega ni mudu.

³⁰ Sa vosataka na vosa vuku na tamata yalododonu, Ka tukuna na veika dina.

³¹ Sa maroroya na lawa ni Kalou ena yalona o koya Ka sa sega ni gole tani mai kina.

³² Sa dau vakaraica matua na yalododonu na tamata ca, Ka sa dau saga me vakamatea.

³³ Ia, ena sega ni soli koya vua na tamata ca o Jiova Se soli koya me vakacacani ena nona vakatovolei.

³⁴ Mo vakadinati Jiova ga ka muria na nona i vakaro; Ena solia vei iko na kaukauwa mo taukena na vanua, O na raica talega na nona vakasavi tani na tamata ca.

³⁵ Au a dau kila e dua na tamata ca ka i tovo kaukauwa sara, Sa tubu sivisiviti ira kecega me vaka na sitari mai Lepanoni.

³⁶ Ia, sa qai yali ga ena noqu lako sivita ena dua na gauna e muri Ni'u a qai vakasaqarai koya, ka'u sa sega ga ni kunea.

³⁷ Vakadikeva na tamata yalododonu, ka raica na tamata vinaka; Ena dau tiko ga na nodra kawa na tamata yalomalua.

³⁸ Ia o ira na tamata i valavala ca era na vakarusai vakadua, Ka ra na vakawabokotaki na nodra kawa.

³⁹ Sa vakabulai ira na yalododonu o Jiova Ka taqomaki ira ena gauna ni leqa.

⁴⁰ Sa dau vukei ira ka sereki ira; Sa dau vakabulai ira mai vei ira na tamata ca o Jiova Baleta ni ra sa dau vakaruru ga e rukuna. A Same i Tevita. E dua na kerekere.