NA SAME 36 - Vakavakadewa Vou kei na iVola tale eso

¹ Sa vosa na i valavala ca ki na vu ni yalona na tamata ca, Sa vakanadakuya kina na Kalou ka sega ni rokova.

² Sa dau dokai koya ga vakaikoya ena nona vakasama, Ka nanuma ni na sega ni kunea na nona i valavala ca na Kalou, ka vakarusa.

³ Sa ca na nona vosa ka sa sinai ga ena lasu; Sa sega ni vuku rawa me cakava na ka vinaka.

⁴ Sa dau nakita na veika ca ena nona i davodavo; Sa sega ni vinaka na nona i tovo, Ka sa sega ni cata na ka ca.

Na Vinaka ni Kalou

⁵ Kemuni Jiova, sa yaco sara ki lomalagi na nomuni loloma tudei, Ka sa tete yani ki na maliwa lala na nomuni yalodina.

⁶ Sa cecere na nomuni yalododonu me vaka na veiulunivanua; Na nomuni lewa sa vaka na wasa titobu. O ni sa maroroya talega na bula ni tamata kei na manumanu.

⁷ Sa ka talei dina na nomuni loloma tudei. Na tamata kecega era sa kunea na nodra taqomaki ena yaloyalo ni tabamuni.

⁸ Era sa vakamamautaki ena levu ni ka sa tu ena nomuni vale; Ka o ni sa solia me ra gunu mai na uciwai ni nomuni vinaka.

⁹ Sa i kemuni sa vakavuna na bula kecega, Ka keimami sa raica rawa na rarama mai na nomuni rarama.

¹⁰ Ni lomani ira tikoga era sa kilai kemuni, Ka cakava na ka vinaka vei ira sa yalododonu.

¹¹ Ni kakua ni laivi ira na tamata viavialevu me ravuti au, Se o ira na tamata ca me ra vakasavi au tani.

¹² Ni raica mada na vanua era sa bale kina na tamata ca. Era na bale e kea ka sega ni tucake rawa tale. A nei Tevita.