NA SAME 35 - Vakavakadewa Vou kei na iVola tale eso

¹ Kemuni Jiova, ni saqati ira era saqati au, Ka valuti ira era valuti au.

² Ni taura na nomuni sasabai kei na nomuni yaragi Ka lako mai mo ni vukei au.

³ Ni laveta cake na nomuni moto kei na nomuni matau ni vala vei ira era vakasavi au. Ni tukuna vei au ni o ni sa noqu i vakabula!

⁴ Me ra vakadrukai ka vakamaduataki O ira era tovolea me ra vakamatei au. Me ra vakalesui tale ka vakaveilecayakitaki O ira era bukia na kequ vere!

⁵ Me ra vaka na qa ni sila sa cagina ena cagi Ni sa vakasavi ira na agilosi.

⁶ Me buto ka dravidravia na nodra gaunisala Ena gauna sa mokuti ira kina na agilosi i Jiova.

⁷ Era sa cakava na kequ dai ka sega ni dua na vuna vinaka, Ka kelia e dua na qara me'u sikalutu kina.

⁸ Ia ena vesuki ira na veivakarusai ni bera ni ra kila, Era na coko ga ena nodra dai Ka sikalutu ena qara era kelia.

⁹ Ia au na qai reki ena vuku i Jiova; Au na marau baleta ni sa vakabulai au.

¹⁰ Au na kaya vei Jiova ena yaloqu taucoko, “Sa sega tale ni dua me vakataki kemuni! O ni sa taqomaki koya sa malumalumu mai vua sa kaukauwa, Io na dravudravua kei na luveniyali mai vua sa vakacacani koya!”

¹¹ Era sa vakadinadina na tamata ca ena ka au beitaki kina, Ka beitaki au ena veika ca au sa sega ni bau kila.

¹² Era sa cakava na ka ca vei au me i sau ni vinaka, Ka'u sa kidroa vakalevu kina.

¹³ Ia, ena gauna era tauvi mate kina, Au sa vakaisulu ena i sulu ni vakaloloku Ka'u mai sega yani ni kana Au sa vakacuva ulu ga ni'u sa masu,

¹⁴ Me vaka au masu vua e dua na noqu i tokani se taciqu. Au cuva ka lako voli ena vakaloloku Me vaka e dua sa vakalolokutaka na tinana.

¹⁵ Ena gauna au leqa kina, era sa marau kecega Ka ra wavokiti au me ra vakalialiai au: Era sa buturaki au na vulagi Ka mokulaki au tikoga.

¹⁶ Era sa vakavuna me'u sota kei na ka rarawa, Ka ra qai vakalialiai au ka wanonovi au ena yalo ca.

¹⁷ A cava na kena dede, oi kemuni i Jiova, mo ni vakararai walega mai kina? Ni vakabulai au mada mai na nodra veivakacacani; Ni taqomaka na noqu bula mai vei ira na laione oqo.

¹⁸ Ia, au na vakavinavinaka vei kemuni ena kedra maliwa na lewenivanua, Ka vakacaucautaki kemuni ena matadra kecega.

¹⁹ Ni kakua ni laivi ira na noqu meca, O ira na tamata lasulasu oqori me ra rekitaka na noqu malumalumu. Ni kakua ni laivi ira sa cati au ka sega na vuna Me ra dredre ena marau baleta na noqu rarawa.

²⁰ Era sa sega ni bau vosa vakavinaka, Ia, era sa dau bulia ga na veimataqali lasu kecega me baleti ira na tamata era sa gadreva na tiko vinaka.

²¹ Era sa beitaki au, ka ra kailavaka; “Sa i koya! Keimami sa raica na ka o a cakava!”

²² Oi kemuni Jiova, o ni sa raica tu na ka oqo, O koya oqo, noqu Turaga, mo ni kakua kina ni galu; Mo ni kakua sara ni tiko vakayawa!

²³ Mo ni yavala mai, na Turaga, ka taqomaki au; Ni tucake, na noqu Kalou, ka totaki au.

²⁴ O ni sa yalododonu ga i Jiova, na noqu Kalou, Ni vakaraitaka ni sa sega na noqu cala, Ni kakua ni laivi ira na noqu meca me ra marau ena vukuqu.

²⁵ Ni kakua ni laivi ira me ra kaya e lomadra, “Sa i koya sara ga o ya na ka keimami vinakata!” Ni kakua ni laivi ira me ra kaya, “Keimami sa vakadrukai koya”

²⁶ O ira kecega sa marautaka na noqu sotava na ka rarawa Me ra vakadrukai sara ka veilecayaki. Me ra qai sinai ena madua kei na rogo ca O ira kecega era sa vakacerecerei ira cake vei au.

²⁷ O ira kecega sa vinakata me'u sereki Me ra kaila ena marau ka kaya tikoga, “Sa cecere ga o Jiova!, Ni sa dau taleitaka na nodra rawa-ka na nona tamata.”

²⁸ Io au na qai tukuna tikoga na nomuni yalododonu, Ka vakacaucautaki kemuni ena veisiga taucoko. Vua na i liuliu ni sere. A nei Tevita na tamata i Jiova.