NA SAME 33 - Vakavakadewa Vou kei na iVola tale eso

Na Cecere kei na Vinaka ni Kalou

¹ Ni marau oi kemuni kece na yalododonu Ena vuku ni ka sa cakava o Jiova; Ni vakacaucautaki koya oi kemuni kece o ni talairawarawa vua.

² Ni vakavinavinaka vei Jiova ena api Ni sere vua ena i vakatagi vakawa.

³ Seretaka vua e dua na sere vou, Ni qiria vakavinaka na api ka laga sere vakadomoilevu!

⁴ Sa dina na vosa i Jiova Ka sa tudei na veika kecega e vakayacora.

⁵ Sa lomana o Jiova na ka vinaka ka dodonu; Sa vakasinaiti na vuravura ena nona loloma tudei.

⁶ Sa bulia na matanisiga, na vula kei na kalokalo Ena nona vosa ga.

⁷ Sa binia vata na wai ni wasaliwa ena dua na yasana, Ka maroroya na wasa titobu ena valeniyau.

⁸ Ni rerevaki Jiova, na vuravura taucoko! Ni rerevaki koya, na tamata kecega e vuravura!

⁹ Ni sa vosa ga, sa buli sara na vuravura; Ka sa rairai mai na ka kecega ena nona i vakaro.

¹⁰ Sa vakadaroya na nodra i naki na veimatanitu o Jiova, Ka sa tarovi ira me ra kakua ni cakava na veika era nanuma.

¹¹ Ia, sa tudei ga na nona i naki ka sega ni mudu, Ena sega talega ni takali rawa na veika sa nakita.

¹² Sa kalougata na matanitu sa nona Kalou o Jiova; Era na kalougata na tamata sa digitaki ira o koya me ra nona.

¹³ Sa rai sobu mai o Jiova mai lomalagi, Ka raici ira na tamata kecega.

¹⁴ Sa rai sobu mai o koya mai na vanua e vakataulewataki mai kina, Me raici ira kece era tiko e vuravura.

¹⁵ Sa bulia kecega na ka era vakasamataka, Ka kila na veika kece era cakava.

¹⁶ Sa sega ni qaqa e dua na tui ena vuku ni nona mataivalu qaqa; E sega ni qaqa e dua na sotia ena vuku ni nona kaukauwa.

¹⁷ Sa sega ni yaga na ose me rawa kina na qaqa; E sega ni rawa ni veivakabulai na nodra kaukauwa levu.

¹⁸ Na mata i Jiova sa dau wanonovi ira era sa rerevaki koya, O ira era sa nuitaka na nona loloma tudei.

¹⁹ Sa vakabulai ira mai na mate, Ka maroroi ira mai na dausiga.

²⁰ Keimami sa vagolea na neimami vakanuinui vei Jiova, Sa i koya sa dau vukei keimami ka taqomaki keimami.

²¹ Keimami a marau ena vukuna, Ka vakadinata na yacana tabu.

²² Me qai tiko ga kei keimami na nomuni loloma tudei, Ni keimami sa nuitaki kemuni, i Jiova.