NA SAME 32 - Vakavakadewa Vou kei na iVola tale eso

¹ Sa kalougata na tamata sa bokoci na nona i valavala ca, Ka sa buluti na nona caka cala.

² Sa kalougata na tamata sa sega ni beitaki koya o Jiova me i valavala ca, Ka sa galala mai na veivakaisini kecega.

³ Ni'u a sega ni vakatusa na noqu i valavala ca, Au sa malumalumu mai ena tagi ena siga kei na bogi.

⁴ Ena siga kei na bogi o ni sa totogitaki au kina; Sa takali yani na noqu kaukauwa Me vaka na mamaca ni tegu ena vula i katakata.

⁵ Ia, au sa qai vakatusa vei kemuni na noqu i valavala ca, Ka'u sega ni vunia na noqu caka cala. Au sa nakita me'u vakatusa vei kemuni, O ni sa qai bokoca kece sara na noqu i valavala ca.

⁶ Sa dodonu kina me ra dau masuti kemuni kina o ira na nomuni tamata yalodina ena gauna ni leqa. Ni yaco mai e dua na waluvu levu ena sega ga ni yacovi ira.

⁷ Sa i kemuni na noqu i vunivuni; O ni na vakabulai au mai na leqa. Au na seretaka vakadomoilevu na nomuni veivakabulai Baleta ni o ni sa taqomaki au.

⁸ A sa kaya o Jiova, “Au na vakavulici iko ena sala e dodonu mo lako kina; Ka'u na vakaroti iko ka vakasalataki iko.

⁹ Kakua ni tawa vuku me vaka na ose se na meuli Sa dau tarovi ena wa ni kena i tarovi ena gusuna, Me talairawarawa kina vei iko.”

¹⁰ E sotava na ka rarawa na tamata ca, Ia o ira era vakadinati Jiova Era sa taqomaki ena loloma tudei.

¹¹ Ni reki ka marau vei Jiova oi kemuni kece na yalododonu Ena vuku ni veika sa cakava o koya! Ni kaila ena marau oi kemuni kece sa talairawarawa vua.