NA SAME 30 - Vakavakadewa Vou kei na iVola tale eso

¹ Au sa vakacaucautaki kemuni Jiova baleta ni o ni a vakabulai au, Ka tarovi ira na kequ meca me ra marau ena vukuqu.

² Au a tagica na nomuni veivuke na Turaga na noqu Kalou, O ni a qai vakabulai au.

³ O ni sa la'ki vakasukai au lesu mai na nodra vanua na mate. Au a sa wili vata kei ira era lako sobu ki bulu, A o ni sa qai maroroya na noqu bula.

⁴ Ni laga sere ni vakacaucautaki Jiova oi kemuni na nona tamata yalodina. Ni nanuma mada na ka sa cakava na Le Dua Yalo Savasava ka vakavinavinaka vua.

⁵ Na nona cudru sa dau oti ga ena dua na gauna lekaleka Na nona vinaka sa dau taura na gauna ni bula taucoko. Ena rawa ni ia tiko na tagi ena bogi Ia, sa basika ga na reki ena kida ni mataka.

⁶ Au vakila ni'u sa vagalalataki, “Au na sega ni rawa ni vakadrukai.”

⁷ O ni sa rui vinaka vei au Jiova O ni sa taqomaki au me vaka e dua na bai ulunivanua. Ia ni o ni vunitaki kemuni vei au Au sa sinai ena rere.

⁸ Au a masu vei Jiova Ka'u a kerea na nomuni veivuke.

⁹ A cava na kena yaga na noqu mate? A cava na kena yaga na noqu lako sobu ki na i bulubulu? E rawa li me ra vakacaucautaki kemuni na mate? E rawa li me ra na tukuna na nomuni loloma tudei?

¹⁰ Ni rogoci au, i Jiova, ka yalololoma vei au! Kemuni Jiova, ni vukei au mai!

¹¹ O ni sa vukica na noqu rarawa me meke ni marau. O ni sa kauta tani na noqu i sulu ni vakaloloku Ka solia vei au na i sulu ni marau.

¹² Sa i koya oqo au sa na sega ni galu kina; Au na laga sere ni vakacaucautaki kemuni. I Jiova, na noqu Kalou, Au na vakavinavinaka tikoga vei kemuni ka sega ni mudu. Vua na i liuliu ni sere. A Same i Tevita.