NA SAME 28 - Vakavakadewa Vou kei na iVola tale eso

¹ I Jiova na noqu uluvatu, au sa tagi yani oqo vei kemuni. Ni rogoci au mai ni'u sa masuti kemuni! Kevaka o ni na sega ni rogoci au, au sa na vakataki ira sa tiko ena nodra vanua na mate.

² Ni rogoca mada na noqu masu ni kere veivuke, Ka'u sa dodoka yani na ligaqu ki na nomuni vale tabu.

³ Ni kakua ni vakarusai au vata kei ira na tamata ca O ira era sa dau kitaka na i valavala ca; O ira sa daumaka na nodra vosa, ia, na yalodra sa sinai sara ena veicati.

⁴ Ni totogitaki ira ena vuku ni veika era cakava, Na veika ca kece era vakayacora. Ni totogitaki ira ena vuku ni veika kece era sa cakava Ni sauma vei ira na veika e dodonu me tau vei ira.

⁵ Era sa sega ni bau kauwaitaka na ka sa cakava o Jiova, Ena veika sa bulia; Ia ena totogitaki ira o koya, Ka vakarusai ira me tawa mudu.

⁶ Au na vakacaucautaki Jiova, Ni sa rogoca na noqu masu ni kere veivuke!

⁷ Sa taqomaki au ka maroroi au o Jiova, Au sa vakadinati koya. Sa vukei au o koya, ia ka'u sa marau Ka laga sere me'u vakacaucautaki koya.

⁸ Sa taqomaki ira na nona tamata o Jiova Sa taqomaka ka vakabula na nona tui digitaki.

⁹ Kemuni na Turaga, ni vakabulai ira na nomuni tamata, Ka vakalougatataki ira era sa nomuni. Mo ni sa nodra i vakatawanisipi, Ka maroroya na nodra bula me tawa mudu. A Same i Tevita.