NA SAME 27 - Vakavakadewa Vou kei na iVola tale eso

¹ A vu ni noqu rarama ka noqu i vakabula o Jiova; O cei me'u rerevaka? Sa taqomaki au o Jiova mai na leqa kecega; Au na sega sara ni taqaya.

² Ni ra valuti au na tamata ca ka tovolea me ra vakamatei au, era na tarabe ga ka bale.

³ Kevaka sara mada ga e wavoliti au e dua na mataivalu taucoko, au na sega ga ni rere; Kevaka sara mada ga era ravuti au na meca, au na vakadinata tikoga na Kalou.

⁴ Au a kerea vei Jiova e dua na ka: Me'u tiko ga ena vale i Jiova Ka qoroya na nona vinaka, Ka me'u dau taroga na nona i vakasala mai kea.

⁵ Ena veigauna ni leqa ena vakarurugi au o koya; Ena taqomaki au vinaka ena nona Valenisoro Ka vakataudeitaki au ena dela ni vatu cecere.

⁶ Au na qaqa vei ira na noqu meca era wavoliti au. Ena domo ni kaila ni marau kei na reki, ka'u na vakacaboisoro kina ena nona Valenisoro; Au na sere voli, ka'u na vakacaucautaki Jiova.

⁷ Ni rogoci au Jiova ni'u masu yani vei kemuni! Ni yalololoma ka rogoci au!

⁸ Ena nomuni a kaya, “Lako mai ka sokalou vei au.” Io, na matamuni i Jiova ka'u sa vakasaqara.

⁹ Ni kakua ni vunitaki kemuni vei au. Ni kakua ni cudruvi au, Ni kakua ni vakatala tani na nomuni tamata. O ni sa dau vukei au, Ni kakua ni laivi au, ni kakua ni biuti au, Na noqu Kalou ka noqu i vakabula!

¹⁰ Sa biuti au na tamaqu kei na tinaqu, Ia o Jiova ena maroroi au.

¹¹ Ni vakavulici au Jiova ena ka o ni vinakata me'u cakava, Ka tuberi au ena sala me'u na taqomaki kina, Baleta ni sa levu sara na kequ meca.

¹² Ni kakua ni biuti au vei ira na kequ meca, O ira era ravuti au ena lasu kei na veika kaukauwa, Me ra na cakava vei au.

¹³ Au na bula dina tiko me'u raica Na vinaka i Jiova vei ira na nona tamata.

¹⁴ Vakadinati Jiova! Vakabauta, kakua ni yalo lailai, Vakadinati Jiova tikoga. A nei Tevita.