NA SAME 25 - Vakavakadewa Vou kei na iVola tale eso

¹ Au sa vakacabora na noqu masu vei kemuni Jiova.

² Au sa vakadinati kemuni na noqu Kalou. Ni vakabulai au mai na madua ni druka; Ni kakua ni laivi ira na kequ meca me ra marau ena vukuqu.

³ Era na sega ni druka na dau vakararavi vei kemuni. Ia vei ira ga era dau totolo ni saqati kemuni.

⁴ Kemuni Jiova, ni vakavulici au ena nomuni sala, Ni vakatakilai ira vei au me'u kila.

⁵ Ni vakavulici au me'u kila na veika dina baleta ni sai kemuni na noqu i vakabula. Au na vakadinati kemuni ena loma ni siga taucoko

⁶ Kemuni Jiova, ni nanuma na nomuni yaloveivosoti kei na nomuni loloma tudei, O ni a sa vakaraitaka mai oqo ena gauna makawa sara.

⁷ Ni bokoca laivi na noqu i valavala ca kei na noqu caka cala ni'u sa cauravou. Ni nanumi au Jiova, ena vuku ni nomuni loloma tudei kei na nomuni yalovinaka.

⁸ Sa yalododonu ka vinaka o Jiova; Sa vakavulici ira na i valavala ca ena sala e dodonu me ra lako kina.

⁹ Sa tuberi ira na yalo malumalumu ena sala dodonu Ka vakavulici ira ena ka e vinakata.

¹⁰ Sa tuberi ira era muria na nona veiyalayalati kei na nona i vakaro ena loloma tudei kei na yalodina.

¹¹ Ni nanuma na nomuni vosa ni yalayala i Jiova Ka bokoca na noqu i valavala ca, Ni sa rui ka levu sara.

¹² O ira kece era talairawarawa vei Jiova era na vulica mai vua na sala e dodonu me ra muria

¹³ Era na tiko vinaka ena veigauna kecega ka ra na taukena na vanua na nodra kawa.

¹⁴ O Jiova sa nodra i tokani era talairawarawa vua, Ka sa vakatavulici vei ira na nona veiyalayalati.

¹⁵ Au sa dau gole vei Jiova me veivuke ena veigauna kecega, Ka na dau vakabulai au mai na leqa.

¹⁶ Ni gole mai vei au, i Jiova, ka yalololoma vei au, Baleta ni'u sa tu taudua ka malumalumu.

¹⁷ Ni sereki au mai na noqu loma ocaoca kecega, Ka vakabulai au mai na noqu leqa taucoko sara.

¹⁸ Ni nanuma na noqu vakararawataki kei na noqu leqa kecega, Ka bokoca kece na noqu i valavala ca.

¹⁹ Ni raici ira kece mada na kequ meca Ka raica na levu ni nodra cati au.

²⁰ Ni taqomaki au ka vakabulai au, Ni maroroi au me'u kakua ni vakadrukai, Baleta ni'u sa lako mai vei kemuni me'u taqomaki.

²¹ Me taqomaki au na noqu yalovinaka kei na noqu yalododonu, Baleta ni'u vakararavi vei kemuni.

²² Kemuni na Kalou ni vakabulai ira na nomuni tamata Mai na nodra leqa kecega. A nei Tevita.