NA SAME 18 - Vakavakadewa Vou kei na iVola tale eso

A Sere ni Qaqa i Tevita

Vua na i liuliu ni sere. A Same i Tevita na tamata i Jiova, o koya sa cavuta na qaqa ni sere oqo vei Jiova ena siga sa vakabulai koya kina o Jiova mai na ligadra kecega na nona meca, kei na liga i Saula.

¹ I Jiova, sa ka levu na noqu lomani kemuni, Oi kemuni na vu ni noqu kaukauwa.

² Sa noqu i vakabula na Kalou, Ka sai koya na noqu bainivalu kaukauwa. Sa noqu dauveitaqomaki na Kalou; Ka'u sa maroroi vinaka mai vua. Sa taqomaki au me vaka e dua na i sasabai; Sa maroroi au ka taqomaki au vinaka.

³ Au a masu vei Jiova, Ka sa vakabulai au mai vei ira na kequ meca. Me vakacaucautaki na Turaga!

⁴ Sa vesuki au vakaukauwa ena wa ni mate, Ka sa ubi au na ua ni veivakarusai.

⁵ Sa vesuki au vakaukauwa ena nona wa ni mate Ka vakatura e mataqu na nona dai ni bulubulu.

⁶ Au a qai masu vei Jiova ena noqu leqa; Ka'u kerea na noqu Kalou me veivuke mai. Sa qai rogoca o koya na domoqu mai na nona vale tabu, Ka sa yaco sara ki daligana na noqu kere veivuke.

⁷ Ia sa qai uneune ka yavala na vuravura; Sa yavala ka veitosoyaki na yavu ni veiulunivanua, Baleta ni sa cudru na Kalou

⁸ Sa lako mai na kubou mai na ucuna, Ka dua na yameyame ni buka kei na qilaiso waqa mai na gusuna.

⁹ Sa biliga na lomalagi me lako sobu mai, Ka sa dua na o loaloa ena ruku ni yavana.

¹⁰ Sa vuka vakatotolo yani ena jerupi: Ka veitosoyaki voli ena bati ni cagi.

¹¹ Sa ubi koya o koya ena butobuto, Sa wavoliti koya na o vavaku sa sinai ena wai.

¹² A sa botea mai na o loaloa, Na uca cevata kei na qilaiso waqa Mai na i serau ni matana.

¹³ Sa qai kuru mai lomalagi o Jiova; Ka rogo mai na domo i Koya sa Cecere Sara.

¹⁴ Sa vanataka na nona gasau ni dakaititi o koya Era sa veiseyaki kina na kena meca; Ka sa vakacicivi ira ena tibi ni liva.

¹⁵ A sa vakaraitaki mai na boto ni wasawasa, Ka sa laurai na yavu kei vuravura, Ni o ni sa cudruvi ira na kemuni meca Jiova Ka vunauci ira ena nomuni cudru waqawaqa.

¹⁶ Sa talatala mai cake o Jiova, ka tauri au; A sa vueti au cake mai na wai titobu.

¹⁷ Sa vakabulai au mai na noqu meca kaukauwa, Kei ira kece era cati au; Era sa kaukauwa sara mai vei au.

¹⁸ Ni'u leqa tu era a qai ravuti au, Ia, sa qai taqomaki au ga o Jiova,

¹⁹ Sa vakabulai au mai na leqa o koya; E sa vakabulai au o koya; baleta ni sa vinakati au.

²⁰ Sa saumi au o Jiova baleta ni'u sa yalododonu, Sa vakalougatataki au baleta ni'u sa tawa cala.

²¹ Au sa dau muria na lawa i Jiova, Ka'u sega ni dau saqata na noqu Kalou.

²² Au sa muria kece na nona lawa, Ka'u sega ni talaidredre ki na nona i vakaro.

²³ Sa kila o koya ni'u sa tawa cala, Ka dau tarovi au mai na veika ca.

²⁴ A sa saumi au o koya ni'u sa yalododonu, Ka sa kila o koya ni'u sa tawa cala.

²⁵ O ni sa yalodina, i Jiova, vei ira era sa yalodina, Ka vinaka vei ira era sai vakarau vinaka.

²⁶ O ni sa yalosavasava vei ira sa yalosavasava, Ka cudruvi ira era sai valavala ca.

²⁷ O ni sa vakabulai ira era yalo malumalumu, Ka vakamalumalumutaki ira era viavialevu.

²⁸ Sa solia vei au o Jiova na rarama: Sa vakasava tani na noqu butobuto na noqu Kalou.

²⁹ Sa solia vei au na kaukauwa o koya me'u ravuti ira kina na kequ meca Kei na kaukauwa me'u lako baleta kina na nodra bai.

³⁰ Sa uasivi sara na nona i tovo na Kalou oqo, Ka sa dau vakadinati me i nuinui na nona vosa. Sa vaka e dua na i sasabai o koya, Vei ira kece era qara na nona veitaqomaki.

³¹ Sa Kalou taudua ga o Jiova, Sa noda dauveitaqomaki ga na Kalou.

³² Sa i koya ga na Kalou sa vakaukauwataki au, Ka taqomaka na noqu sala.

³³ Sa i koya sa cakava na yavaqu me vaka na dia, Ka sa taqomaki au ena i valu. Me'u rawa kina ni vakayagataka na dakaititi kaukauwa duadua.

³⁴ Sa vakavulici au o koya me'u ia na i valu, Ka sa rawa kina me'u loveca na dakaititi parasa e ligaqu.

³⁵ O ni sa solia vei au na i sasabai ni nomuni veivakabulai, Ka sa vakataudeitaki au na ligamuni i matau; Ka sa taqomaki au me'u bula ena nomuni kaukauwa.

³⁶ O ni sa taqomaki au me'u kakua ni kau vakavesu. Ka'u sa sega kina ni bau bale.

³⁷ Au sa vakasavi ira na kequ meca ka vesuki ira Ka'u sega mada ni bau cegu me yacova sara ni'u sa vakadrukai ira.

³⁸ Au sa mokuti ira ki ra, era sa sega ni tucake rawa Ka ra sa mai davo druka koto tu yani ena yavaqu.

³⁹ O ni sa solia vei au na kaukauwa me'u vala kina, Ka vakadrukai ira na kequ meca.

⁴⁰ O ni sa vakavuna me ra dro tani na kequ meca mai vei au; Ka'u sa vakarusai ira era sa cati au.

⁴¹ Era sa tagica na veivuke ia sa sega ni dua me vakabulai ira; Era sa masu vei Jiova ia sa sega ni sauma mai o koya.

⁴² Au sa vakavurumemeataki ira me vaka na kuvu ni soso Sa cagina tani ena cagi. Au sa butulaki ira me vaka na soso ena gaunisala.

⁴³ O ni sa vakabulai au mai na dua na matatamata dauveisaqasaqa, Ka lesi au me'u liutaki ira na veimatanitu; Ka ra sa vakarorogo vei au na tamata au sega ni kilai ira.

⁴⁴ Ni ra rogoca na noqu vosa era na muria Ka ra na cuva vei au na kai veimatanitu tani.

⁴⁵ Era sa datuvu Ka lako sautaninini mai ena nodra bainivalu

⁴⁶ Sa bula tiko o Jiova, me vakacaucautaki o koya sa dautaqomaki au. Sa noqu i vakabula na Turaga! Me vakacaucautaki na nona qaqa.

⁴⁷ Sa solia vei au me'u vakadrukai ira na kequ meca Ka vakadrukai ira sobu na tamata ki rukuqu,

⁴⁸ Ka sa vakabulai au mai vei ira na kequ meca. Sa i kemuni na Turaga o ni sa solia vei au me'u qaqa vei ira na kequ meca Ka taqomaki au mai vei ira na tamata i tovo kaukauwa.

⁴⁹ Au na vakacaucautaki kemuni ena kedra maliwa na veimatanitu, Ka'u na sere ni vakalagilagi kemuni.

⁵⁰ Sa solia eso na qaqa levu vua na nona tui, Ka vakaraitaka na nona loloma tudei vei koya sa digitaka, Vei Tevita kei ira na nona kawa ka sega ni mudu. Vua na i liuliu ni sere. A Same i Tevita.