NA SAME 17 - Vakavakadewa Vou kei na iVola tale eso

¹ Kemuni Jiova, ni rogoca mada na noqu kerekere vakadodonu, Ka kauwaitaka na noqu kaci veivuke! Ni rogoca na noqu masu Ni sa sega na veivakaisini e lomaqu.

² Ni lewai au ena nomuni totaki au Ni o ni sa kila na ka dodonu.

³ O ni sa kila na lomaqu, o ni sa lako mai vei au ena bogi; O ni sa dikevi au vakavinaka, O ni sa sega ni kunea vei au na vere ca,

⁴ Me vaka era sa cakava na tani, me vaka na vosa ni tebe ni gusumuni, Au sa sega ni muria na nodra sala Na tamata i tovo kaukauwa.

⁵ Au sa dau muria tikoga na nomuni sala Ka sega ni lako tani mai kina.

⁶ Au sa masu vei kemuni na Kalou baleta ni o ni na sauma mai, O koya oqo mo ni gole mai kina vei au ka rogoca na noqu masu.

⁷ Kemuni na i Vakabula, ni vakaraitaka na talei ni nomuni loloma; Keimami sa vakarurugi ena yasamuni mai vei ira na keimami meca.

⁸ Ni taqomaki au me vaka na nomuni taqomaka na yaloka ni matamuni, Ka vunitaki au ena yaloyalo ni tabamuni, Mai vei ira na tamata ca era via vakacacani au.

⁹ Era sa wavoliti au na kequ meca; Era sa sinai ena yalo ca.

¹⁰ Sa sega vei ira na loloma, Ka ra sa vosa vakaviavialevu.

¹¹ Era sa wavoliti au ena vanua kecega au lakova Ka vaqara e dua na gauna me ra vakabalei au kina.

¹² Era sa vaka na laione era vinakata me ra dresulaki au vakamatailalai, Ka vaka na luve ni laione era waraki au toka ena nodra i vunivuni.

¹³ Ni lako mai Jiova mo ni saqati ira na kequ meca ka vakadrukai ira. Ni vakabulai au mai na tamata ca ena nomuni seleiwau;

¹⁴ ni vakabulai au mai vei ira ena nomuni kaukauwa, mai vei ira era sa rawata na veika era vinakata ena bula oqo. Ni totogitaki ira me ra na vakararawataki o ni sa maroroya tu me baleti ira; Me tu talega na kena me rauti ira na luvedra, Ka me vo tu eso me baleti ira na nodra kawa.

¹⁵ Au na raici kemuni baleta ni'u sa yalododonu; Ia ni'u sa yadra cake au sa na marau ni'u sa raici kemuni.