NA SAME 148 - Vakavakadewa Vou kei na iVola tale eso

Me Vakacaucautaka na Kalou o Vuravura

¹ Ni vakacaucautaki Jiova! Ni vakacaucautaki Jiova mai lomalagi, Oi kemuni o ni tiko ena yasana cecere sara!

² Ni vakacaucautaki koya na nona agilosi kecega, Oi kemuni kece na nona mataivalu vakalomalagi.

³ Drau vakacaucautaki koya na matanisiga kei na vula; Ni vakacaucautaki koya na veikalokalo sa serau tu.

⁴ Ni vakacaucautaki koya na veilomalagi cecere sara, Kei na wai ena dela ni maliwa lala e cake.

⁵ Me ra vakacaucautaka kece na yaca i Jiova! E a vosa ga o koya ka ra sa buli sara,

⁶ Ena nona vosa wale ga era sa dui vakatikori kina Ena dui nodra i tutu ka sega ni mudu, Ka ra sega ni rawa ni talaidredre.

⁷ Ni vakacaucautaki Jiova mai vuravura, Oi kemuni na manumanu lelevu ni wasawasa;

⁸ Na bukawaqa, na uca cevata, na wai cevata kei na o, Kei na cagi kaukauwa o ni muria na nona i vakaro!

⁹ Ni vakacaucautaki koya, na veidelana kei na veiulunivanua, Na kau vuata kei na veikau;

¹⁰ Na manumanu kecega, o ira era manoa kei ira era kila, Na manumanu era qasi voli kei ira na manumanu vuka!

¹¹ Ni vakacaucautaki koya, na tui eso kei na tamata taucoko, Na luvenitui kei ira kece na dauveiliutaki;

¹² Na cauravou, na goneyalewa, Kemuni na qase kei kemuni talega na gone.

¹³ Me ra vakacaucautaka kecega na yaca i Jiova. Sa cecere na yacana mai na ka kecega; Kei na nona i serau sa sivita na vuravura kei na lomalagi.

¹⁴ Sa vakaukauwataka na nona matanitu, Me ra vakacaucautaki koya kece kina na nona tamata, O ira na Isireli, era sa rui ka talei sara vua. Ni vakacaucautaki Jiova!