NA SAME 145 - Vakavakadewa Vou kei na iVola tale eso

¹ Au na tusanaka na nomuni cecere, oi kemuni na noqu Kalou ka noqu Tui; Au na vakavinavinaka vei kemuni ka sega ni mudu.

² Au na vakavinavinaka vei kemuni ena veisiga kecega; Au na vakacaucautaki kemuni ka sega ni mudu.

³ Sa cecere o Jiova ka sa dodonu me vakacaucautaki vakalevu sara; Sa sega ni yacova rawa na noda vakasama na nona cecere.

⁴ Na nomuni cakacaka ena vakacaucautaki ena dua na i tabatamata ki na i tabatamata ka tarava; Era na tusanaka voli na cakacaka ni ligamuni kaukauwa.

⁵ Era na tukuna voli na tamata na nomuni lagilagi kei na nomuni ukuuku vakaturaga, Ka'u na dau vakananuma na nomuni veicakacaka veivakurabuitaki.

⁶ Era na tukuna voli na tamata na nomuni veicakacaka kaukauwa, Ka'u na tusanaka na nomuni cecere.

⁷ Era na dau tukuna voli na nomuni vinaka kecega Ka seretaka na nomuni yalovinaka.

⁸ Sa yalovinaka ka dau mataloloma o Jiova; Sa dau berabera ni cudru ka sa sinai ena loloma tudei.

⁹ Sa yalovinaka ga o Jiova vei ira na tamata kecega, Ka sa yalololoma ki na ka kecega sa bulia.

¹⁰ Ena vakacaucautaki kemuni Jiova na veika kece o ni sa bulia, Ka ra na vakacaucautaki kemuni na nomuni tamata.

¹¹ Ena tukuna voli na lagilagi ni nomuni matanitu, Ka veivosakitaka na nomuni qaqa;

¹² Me ra na kila kina na nomuni cakacaka mana na tamata kecega, Kei na lagilagi vakaturaga ni nomuni matanitu,

¹³ Sa sega ni yalani na nomuni matanitu, Ka o ni na tui tikoga ka sega ni mudu.

¹⁴ Sa vukei ira kecega era leqa, Ka vueti ira cake era tabaki sobu.

¹⁵ Era sa rai vei Jiova ena vakanuinui ena ka kecega Ka sa solia vei ira na kedra ena gauna era gadreva kina.

¹⁶ Sa dodoka yani na ligana, Ka vakamamautaka na ka bula kecega ena ka era gadreva.

¹⁷ Sa dodonu o Jiova ena ka kecega e cakava, Ka yalololoma ena nona cakacaka kecega.

¹⁸ Sa dau voleka o Jiova vei ira kece era dau masu vua, O ira sa dau masuti koya ena yalodina.

¹⁹ Sa dau solia na ka era gadreva na tamata era rerevaki koya, Sa dau rogoca na nodra masu ka vakabulai ira.

²⁰ Sa taqomaki ira kecega era lomani koya, Ia, era na vakarusai ga o ira kece na tamata ca.

²¹ Au na dau vakacaucautaki Jiova tikoga; Me ra vakacaucautaka na yacana na ka buli kecega ka sega ni mudu.