NA SAME 143 - Vakavakadewa Vou kei na iVola tale eso

¹ I Jiova, mo ni vakarorogo ki na noqu masu, Ka rogoca na noqu kerekere! Mo ni rogoci au ena nomuni yalododonu kei na lomadina.

² Ni kakua ni veilewaitaki au; Sa sega sara ni dua me sega ni cala e matamuni.

³ Sa vakararawataki au na kequ meca Ka vakadrukai au sara vakadua. Sa biuti au o koya ena vale ni veivesu butobuto, Ka'u sa vakataki ira era sa mate makawa sara.

⁴ Sa vakarau sara ga me'u sa soro Ka'u sa domobula sara vakalevu.

⁵ Au sa qai nanuma na veisiga sa oti yani; Au mani vakasamataka na veika kece o ni a cakava; Ka'u sa nanuma na nomuni cakacaka kecega.

⁶ Au a qai laveta cake na ligaqu vei kemuni ena masu; Me vaka na kena gadreva na wai na qele mamaca, sa viagunu vakakina vei kemuni na yaloqu.

⁷ I Jiiova, mo ni sauma mai oqo na noqu masu! Sa oti vakadua kece sara na noqu i nuinui! Ni kakua ni vunitaki kemuni vei au, De'u na qai kune ena kedra maliwa era sa lako sobu ki bulu, Io, ki na nodra vuravura na mate.

⁸ Au sa vakanuinui vei kemuni, Ni vakadeitaka vei au ena veimataka lailai ena nomuni loloma tudei. Sa lako cake yani vei kemuni na noqu masu; Ni qai vakaraitaka vei au na sala me'u muria.

⁹ Au sa lako mai ki na nomuni veitaqomaki, Jiova; Ni vakabulai au mai vei ira kece na kequ meca.

¹⁰ Sa i kemuni ga na noqu Kalou; Ni vakavulici au me'u vakayacora na lomamuni. Mo ni yalovinaka ga vei au, ka tuberi au ena sala dodonu.

¹¹ Ni vakabulai au Jiova me vaka na nomuni vosa ni yalayala; Ni vakabulai au mai na noqu leqa ena nomuni vinaka.

¹² Ni qai vakamatei ira na kequ meca ena vuku ni nomuni lomani au, Ka vakarusai ira kece era vakararawataki au, baleta ni'u sa nomuni tamata. A nei Tevita.