NA SAME 139 - Vakavakadewa Vou kei na iVola tale eso

¹ Kemuni Jiova, o ni sa dikevi au ka kilai au,

² O ni sa kila na veika kecega au cakava, O ni sa kila sara mai vakayawa na noqu vakanananu kecega.

³ O ni sa raici au, se'u cakacaka tiko se'u vakacegu; O ni sa kila na noqu cakacaka kecega.

⁴ Ni'u sa bera mada ga ni vosa, O ni sa kila na ka au na tukuna.

⁵ O ni sa tiko ena veiyasaqu kecega, ka voliti au; O ni sa taqomaki au ena nomuni kaukauwa.

⁶ Na nomuni kilai au sa rui veivakurabuitaki, Sa sega ni rawa vei au me'u kila.

⁷ Me'u na lako ki vei me'u na dro tani rawa kina mai na yalomuni? Me'u na lako ki vei me'u na yali kina mai na matamuni?

⁸ Kevaka au na lako cake ki lomalagi, o ni sa tiko mai kina; Kevaka au lako sobu ki bulu, o ni sa tiko talega mai kina.

⁹ Kevaka au vuka sivita yani na i cabecabe ni siga, Se'u la'ki tiko sivia sara yani na i dromudromu ni siga,

¹⁰ O ni sa tiko mai kea mo ni tuberi au, O ni na tiko mai kea mo ni vukei au.

¹¹ Kevaka au kerea me vunitaki au na butobuto, Se me vuki me bogi na rarama sa wavokiti au

¹² Ia sa sega ni buto vei kemuni na butobuto, Ka sa serau vei kemuni na bogi me vaka na siga.

¹³ O ni sa bulia na veitikiqu kecega; O ni sa vakacokovatataki au ena kete i tinaqu.

¹⁴ Au sa vakacaucautaki kemuni ni sa dodonu mo ni rokovi; Sa veivakurabuitaki ka talei na ka kecega o ni cakava. Au sa kila taucoko sara ena yaloqu.

¹⁵ O ni sa raica na kena sema vata na suiqu, Na kena biu vata vakamaqosa ena kete i tinaqu, Ena gauna au sa tubu vuni tiko kina.

¹⁶ O ni a sa raici au ni'u se bera ni sucu, Na veisiga kece sa buli me'u na bula kina sa volai kece tu ena nomuni vola, Ni se bera ni se bau tekivutaki e dua vei ira.

¹⁷ Kemuni na Kalou, Sa dredre dina vei au me'u kila na nomuni vakasama; Sa ka levu sara na kena i wiliwili!

¹⁸ Kevaka au na wilika, ena levu cake mai na mataninuku. Ni'u sa yadra cake, au sa tiko ga kei kemuni.

¹⁹ Kemuni na Kalou, Au gadreva mada ga mo ni vakamatei ira na i valavala ca. Au gadreva me ra biuti au vakamalua na tamata i tovo kaukauwa.

²⁰ Era sa tukuna na veika ca me baleti iko, Era sa tukuna na veika ca me vakacacani kina na yacamuni.

²¹ Kemuni Jiova, au sa cati ira dina era cati kemuni, Ka'u beci ira era saqati kemuni!

²² Sa ka taucoko sara ga na noqu cati ira; Au sa okati ira me ra kequ meca.

²³ Ni dikevi au na Kalou, ka kila na noqu vakasama; Ni vakatovolei au, ka kunea na nanuma ni lomaqu.

²⁴ Ni raica mada de tiko na veivakaisini e lomaqu, Ka tuberi au ena sala ka sega ni mudu. Vua na i liuliu ni sere. A Same i Tevita.