NA SAME 135 - Vakavakadewa Vou kei na iVola tale eso

A Sere ni Vakacaucau

¹ Ni vakacaucautaki Jiova! Ni vakacaucautaka na yacana, oi kemuni na tamata i Jiova,

² Oi kemuni sa tucake tu ena vale i Jiova, Ena lomanibai ni Valenisoro ni noda Kalou.

³ Ni vakacaucautaki Jiova, ni sa rui vinaka o koya, Ni sere ena vakacaucautaka na yacana, ni sa yalovinaka o koya.

⁴ Sa digitaki Jekope ga o koya me nona, Io, o ira na Isireli me ra nona i yau talei.

⁵ Au sa kila ni sa cecere o Jiova, Sa cecere cake o koya mai vei ira kecega na veikalou.

⁶ Sa cakava na ka ga e vinakata o koya, Mai lomalagi, se e dela i vuravura, E wasawasa, se ena boto ni wasawasa.

⁷ Sa kauta mai na kabu mai na i yalayala kei vuravura, Sa vakavuna me tibi na liva me tau kina na uca, Ka sa kauta mai na cagi mai na nona vale ni yau.

⁸ Mai Ijipita, sa vakamatei ira kina na ulumatua Ni tamata vata kei na manumanu.

⁹ Sa cakava mai kea o koya eso na i vakatakilakila Kei na cakacaka veivakurabuitaki eso, Me totogitaki tui Ijipita kina kei ira na nona tamata.

¹⁰ Sa vakarusa o koya e vuqa na veimatanitu, Ka vakamatea ira na tui qaqa ni veivanua eso.

¹¹ O Sioni na nodra tui na Amoraiti, O Oki na tui Pasani, Kei ira kece na tui eso mai Kenani.

¹² A sa solia na nodra vanua vei ira na nona tamata; Sa solia ga o koya vei ira na Isireli.

¹³ I Jiova, era na kila tikoga na tamata ena veigauna kece ni sai kemuni ga na Kalou; Era na nanumi kemuni na veitabatamata kecega.

¹⁴ O Jiova ena totaki ira na nona tamata; Ena vueti ira na nona dauveiqaravi.

¹⁵ Na nodra veikalou matakau na veimatanitu era sa buli ga ena siliva kei na koula; Era sa cakava ga na liga ni tamata.

¹⁶ Sa tu na gusudra, ia era sega ni vosa rawa, Ka tu na matadra ia era sega ni rai rawa.

¹⁷ Sa tu na daligadra, ia era sa sega ga ni rogo rawa, A sa sega na i cegu ena gusudra.

¹⁸ Me qai veiucui ga vakataki ira na matakau o ya o ira yadua era sa bulia ka ra vakararavi kina!

¹⁹ Kemuni na Isireli, ni vakacaucautaki Jiova, Kemuni na nona bete na Kalou, ni vakacaucautaki koya.

²⁰ Kemuni na Livai, ni vakacaucautaki Jiova, Ni vakacaucautaki Jiova, oi kemuni kece sa cuva vua.

²¹ Ni vakacaucautaki Jiova mai Saioni, O koya sa tiko e Jerusalemi. Ni vakacaucautaki Jiova!