NA SAME 12 - Vakavakadewa Vou kei na iVola tale eso

¹ Kemuni Jiova, ni vakabulai keimami! Sa sega tale ni vo e dua na tamata dodonu, Ka sa sega tale ni kune rawa na tamata yalodina eso.

² Era sa lasu na tamata kecega vei ira na dui wekadra. Ka veivakaisini vakai ira ena vosa veicavilaki.

³ Kemuni Jiova, ni vagaluya na yame dauveicavilaki, Ka sogota na gusu dokadoka era sa kaya,

⁴ “Keimami na tukuna ga na ka keimami via cavuta, Ena sega ni dua me na tarovi keimami. O cei me rawa ni tukuna vei keimami na ka me keimami kaya?”

⁵ A sa kaya o Jiova, “Au sa na lako yani Baleta ni ra sa vakararawataki na dravudravua, Era sa tagi ena vutugu o ira era sa vakararawataki. Au na solia vei ira na galala era gadreva tu!”

⁶ Na veivosa ni yalayala i Jiova sa yaga me vakadinati. Era sa ka dina me vaka na siliva, Era sa vakasavasavataki vakavitu ena kena lovo.

⁷ Oi kemuni Jiova, o ni na maroroi keimami; O ni na taqomaki keimami ena i tabatamata oqo ka sega ni mudu.

⁸ Era sa robota na tamata ca na veivanua taucoko Ka ra sa vakalevulevuya na ca na tamata kecega. Vua na i liuliu ni sere. A Same i Tevita.