NA SAME 118 - Vakavakadewa Vou kei na iVola tale eso

A Masu ni Vakavinavinaka ni sa Rawati na Qaqa

¹ Ni vakavinavinaka vei Jiova, ni sa yalovinaka o koya; Ka sa sega ni mudu na nona loloma!

² Me ra kaya o ira na Isireli, “Sa sega ni mudu na nona loloma.”

³ Me ra kaya na nona bete na Kalou, “Sa sega ni mudu na nona loloma.”

⁴ Me ra kaya kecega era sa rerevaki Jiova, “Sa sega ni mudu na nona loloma.”

⁵ Au a masu vei Jiova ena noqu rarawa, Ka sa sauma mai o koya, ka mai sereki au.

⁶ Sa tiko kei au o Jiova ka'u na sega sara ni rere; Na cava era rawa ni cakava vei au na tamata?

⁷ Sa tiko kei au o Jiova me vukei au, Ka'u na raici ira na kequ meca ni ra vakadrukai.

⁸ Sa vinaka cake na vakararavi vei Jiova Mai na noda vakararavi ki na tamata.

⁹ Sa uasivi cake na vakadinati Jiova, Mai na vakararavi vei ira na luvenitui.

¹⁰ Era sa wavoliti au na kequ meca, Ia, au sa vakarusai ira ga ena kaukauwa i Jiova.

¹¹ Era sa vakavolivoliti au ena veiyasana kece sara, Ia, au a qai vakarusai ira ena kaukauwa i Jiova.

¹² Era sa vakavolivoliti au mai me vaka na qele ni vi, Ia, era sa kama totolo ga me vaka na buka ena wa vakavotona, Ka'u sa vakarusai ira ena kaukauwa ga i Jiova.

¹³ Au sa biliraki vakaukauwa sara ka voleka ni vakadrukai, Ia, sa qai vukei au ga o Jiova.

¹⁴ Sa vakaukauwataki au o Jiova me'u kaukauwa ka qaqa; Sa noqu i vakabula o koya.

¹⁵ Ni rogoca mada na kaila ni reki ena qaqa Ena nodra veivale kece na tamata ni Kalou.

¹⁶ Sa vakavuna me da qaqa na nona kaukauwa, Sa vuna na noda qaqa na kaukauwa levu i Jiova.

¹⁷ Au na sega ni mate, ia au na bula tiko, Me'u tukuna na veika sa cakava o Jiova.

¹⁸ Sa vakatotogitaki au vakabibi sara o koya, Ia, sa sega ga ni laivi au me'u mate.

¹⁹ Ni dolava vei au na matamata ni vale tabu Me'u curu kina ka vakacaucautaki Jiova.

²⁰ Sa i koya oqo na matamata i Jiova, Era rawa ga ni curu kina na tamata yalododonu.

²¹ Au sa vakacaucautaki kemuni na Turaga, baleta ni o ni sa rogoci au mai, Ka solia vei au na qaqa.

²² Na vatu era sa cata na matai ni vale Sa yaco me vatu ni vakadei ena tutu ni vale.

²³ Sa cakava na ka oqo o Jiova, Ka sa totoka dina ni da raica.

²⁴ Sa i koya oqo na siga a bulia o Jiova, Me da ia na reki ka marau kina.

²⁵ Kemuni Jiova, keimami kerei kemuni mo ni vakabulai keimami. Ni solia vei keimami na tiko vinaka.

²⁶ Me qai vakalougatataki o koya sa lako mai ena yaca i Jiova. Keimami sa vakavinavinakataki kemuni mai na Valenisoro i Jiova.

²⁷ Sa Kalou ga o Jiova, ka sa vakararamataki keda. Ni taura na tabanikau e ligamuni, ka tekivuna na solevu, Ka yabeta wavoki na i cabocabonisoro.

²⁸ Sa i kemuni ga na noqu Kalou, ka'u na vakavinavinaka vei kemuni. Au na dau vunautaka na nomuni cecere.

²⁹ Ni vakavinavinaka vei Jiova, ni sa rui vinaka o koya, Ka sa sega ni mudu na nona loloma.