NA SAME 115 - Vakavakadewa Vou kei na iVola tale eso

Na Kalou Dina Le Duabau Ga

¹ Me caka vei kemuni taudua ga Jiova na veivakalagilagi; Me caka vei kemuni taudua ga ka me kakua ni caka vei keimami, Ena vuku ni nomuni loloma tudei kei na nomuni yalodina.

² A cava me ra tarogi keimami kina na veimatanitu, “Evei na nomuni Kalou?”

³ Sa tiko mai lomalagi na neimami Kalou, Ka cakava ga na ka e vinakata.

⁴ Na nodra Kalou sa caka mai na siliva kei na koula Ka cakava ga na liga ni tamata.

⁵ Sa tu na gusudra, ia era sa sega ni vosa rawa, Ka tu na matadra, ia era sa sega ni rai rawa.

⁶ Sa tu na daligadra ia era sega ni rogoca rawa e dua na ka, Ka tu na ucudra ia era sega ni boica rawa e dua na ka.

⁷ Sa tu na ligadra ia era sega ni tara rawa e dua na ka, Ka tu na yavadra ia era sega ni lako rawa, Ka ra sega ni cakava rawa e dua na rorogo.

⁸ O ira era buli ira ka vakararavi vei ira Era sa vakataki ira ga na matakau era bulia!

⁹ Kemuni na Isireli, ni vakadinati Jiova! Sa vukei kemuni ka taqomaki kemuni o koya.

¹⁰ Kemuni na bete ni Kalou ni vakadinati Jiova! Sa vukei kemuni ka taqomaki kemuni o koya.

¹¹ Ni vakadinati Jiova oi kemuni kece o ni rerevaki koya. Sa vukei kemuni ka taqomaki kemuni o koya.

¹² Sa nanumi keda o Jiova ka na vakalougatataki keda; Ena vakalougatataki ira na Isireli o koya, Kei ira kece na bete ni Kalou.

¹³ Ena vakalougatataki ira kece era rerevaki koya o Jiova, O ira era lelevu kei ira era lolovira.

¹⁴ Ena solia vei kemuni o Jiova me so na luvemuni, Vei kemuni kei ira na nomuni kawa.

¹⁵ Me vakalougatataki kemuni o Jiova, O koya sa bulia na lomalagi kei na vuravura.

¹⁶ Sa nei Jiova taudua ga na lomalagi Ia, sa solia na vuravura vei ira na tamata.

¹⁷ Sa sega ni vakacaucautaki o Jiova mai vei ira era sa mate, Se mai vua e dua sa lako sobu ki na nodra vanua era sa galu kina.

¹⁸ Ia, oi keda eda sa bula, eda na vakavinavinaka ga vua, Ena gauna oqo kei na veigauna kecega. Ni vakacaucautaki Jiova!