NA SAME 109 - Vakavakadewa Vou kei na iVola tale eso

¹ Au sa vakacaucautaki kemuni na Kalou; Ni kakua ni galu!

² Era sa vakacacani au na tamata ca kei ira na tamata lasulasu; Era sa tukuna na veika lasu me baleti au.

³ Era sa tukuna na veika rerevaki me baleti au, Ka sega ni dua na vuna era vakacacani au kina.

⁴ Era sa saqati au veitalia ga na noqu lomani ira ka masulaki ira.

⁵ Era sa sauma lesu mai na noqu vinaka ena veika ca Kei na noqu loloma ena veicati.

⁶ Ni digitaka mada e dua na tamata ca me lewai koya na kequ meca Ka me beitaki koya ga e dua na kena meca.

⁷ Me lewai o koya, ka me kunei ni sa cala dina; Na nona masu sara mada ga me okata me i tovo ca.

⁸ Me tini dole mada ga na nona bula, Me dua tale na tamata me taura na nona cakacaka.

⁹ Me ra yaco na luvena me ra luveniyali, Ka yaco na watina me yada.

¹⁰ Me ra qai yaco na luvedra me ra veilakoyaki voli ka vakatakekere; Ka me ra vakasavi tani mai na nodra i tikotiko rusa.

¹¹ Me ra kauta kece na ka e taukena o ira ka dinau tu kina o koya, Ka me ra kauta tani kece na vua ni nona cakacaka na kai tani.

¹² Me kakua ni dua me yalovinaka vua, Ka me kakua ni dua e raici ira na nona gone era sa luveniyali.

¹³ Me ra mate kece na nona kawa, Ka na guilecavi na yacana ena i tabatamata ka tarava.

¹⁴ Me nanuma tiko o Jiova na nodra ca na nona qase Ka kakua ni bokoca na i valavala ca i tinana.

¹⁵ Me nanuma tikoga o Jiova na nodra i valavala ca, Ia, o ira me ra guilecavi sara ga vakadua!

¹⁶ E sega ni bau nanuma na tamata o ya me i tovo vinaka, A sa ia ga na veivakararawataki kei na veivakamatei Vei ira na dravudravua, na vakaloloma, kei na malumalumu.

¹⁷ Sa dau taleitaka me dau veivakacudrui, Ia, me qai tau vakalevu ga vua na cudru; A sa sega ni vinakata na vosa ni veivakalougatataki, Ia, me qai kakua ga ni vosa vakalougatataki.

¹⁸ Na kena rawarawa na nona veivakacudrui sa vaka na nona dau vakasulumi koya; Me qai curuma na yagona na nona cudru me vaka na wai sa vakasuasuataki koya, Ka curuma talega na nona sui me vaka na waiwai!

¹⁹ Me ra qai ubi koya me vaka na i sulu, Ka me ra vauci tikoga e tolona me vaka na beleti.

²⁰ I Jiova, mo ni totogitaki ira na kequ meca me vakaoqo, Vei ira era kaya na veika ca me baleti au!

²¹ Ia oqo, kemuni Jiova na noqu Kalou, Mo ni qai vukei au mada me vaka na nomuni vosa ni yalayala. Ni sereki au ena nomuni yalovinaka kei na nomuni loloma tudei.

²² Au sa dravudravua ka vakaloloma; Ka sa mavoa sara na yaloqu mai loma.

²³ Au sa vakarau takali yani me vaka na rurugu ni yakavi; Ka'u sa cagina tani yani me vaka na vodre.

²⁴ Sa malumalumu mai na duruqu ni sa sega na kakana; Ka sa lila mai na yagoqu ka malumalumu.

²⁵ Ni ra raici au na tamata, era sa vakalialiai au, Era kureitaka na uludra ena veibeci.

²⁶ Ni vukei au Jiova, na noqu Kalou, Ni vakabulai au ena vuku ni nomuni loloma tudei!

²⁷ Ni vakatakila vei ira na kequ meca Ni sai kemuni o ni vakabulai au.

²⁸ Era na vosa cati au, ia o ni na vosa vakalougatataki au. Me ra vakadrukai na kequ meca, Ka me'u marau oi au na nomuni dauveiqaravi.

²⁹ Me ra qai ubi ga ena vakaloloma o ira na noqu meca; Ka me ra daramaka me vaka na kote balavu na nodra madua.

³⁰ Au na vakavinavinaka vakadomoilevu vei kemuni Jiova, Au na vakacaucautaki koya ena nodra soqoni na tamata,

³¹ baleta ni sa taqomaka na tamata dravudravua o koya, Me vakabula mai vei ira era vakacacani koya me mate. A nei Tevita. A Same.