NA SAME 107 - Vakavakadewa Vou kei na iVola tale eso

Ai Kalima ni i Vola ( Same 107–150 ) Vakacaucautaki na Vinaka ni Kalou

¹ Ni vakavinavinaka vei Jiova, ni sa rui vinaka o koya; Ni sa sega ni mudu na nona loloma tudei.

² Me ra qai kaya vakakina o ira sa vakabulai ira o Jiova, O ira sa vakabulai ira o koya mai vei ira na meca,

³ Ka kauti kemuni lesu mai na veimatanitu tani, Mai na tokalau, na ra, na vualiku kei na ceva.

⁴ Eso era a veilakoyaki voli ena vanua dravuisiga, Ka sega ni kunea na sala me ra lako kina ki na koro me ra la'ki tiko kina;

⁵ Era sa viakana ka viagunu, Ka sa oti na veika kece era vakanuinui kina.

⁶ Era sa qai masu vei Jiova ena nodra leqa, Ka sa vakabulai ira o koya.

⁷ A liutaki ira yani o koya, Ki na koro me ra la'ki tiko kina.

⁸ Sa dodonu me ra vakavinavinaka vei Jiova, ena vuku ni nona loloma tudei, Baleta na veika veivakurabuitaki sa cakava vei ira.

⁹ Sa vakaotia na nodra viagunu, Ka vakamamautaki ira era via kania na veika vinaka.

¹⁰ Eso era tiko ena vanua ni rarawa ka butobuto, O ira na kai vesu era sa vakararawataki ena sinucodo,

¹¹ Baleta ni ra saqata na i vakaro ni Kalou Kaukauwa, Ka cata na nona i vakasala.

¹² Era sa malumalumu mai ena cakacaka kaukauwa, Era sa bale ka sega e dua e via vukei ira.

¹³ Era sa qai tagi ga vei Jiova ena vuku ni nodra leqa, Ka sa vakabulai ira mai kina o koya.

¹⁴ Sa kauti ira tani mai na vanua ni rarawa ka butobuto, Ka musulaka na kedra sinucodo.

¹⁵ Sa dodonu me ra vakavinavinaka vei Jiova ena vuku ni nona loloma tudei, Ena vuku ni ka veivakurabuitaki sa vakayacora vei ira.

¹⁶ A sa vorolaka na katuba varasa, Ka sa musulaka na bai lawalawa kaukamea.

¹⁷ Eso era tauvi mate ena vuku ni nodra i valavala ca Era sa vakararawataki baleta na nodra ca.

¹⁸ Sa cata na lomadra na kakana, Ka ra sa voleka sara ni mate.

¹⁹ Era sa qai kaci ga vei Jiova ena vuku ni nodra leqa, Ka sa vakabulai ira o koya mai na nodra vakararawataki.

²⁰ Sa vakabulai ira ga o koya ena nona i vakaro, Ka vakabulai ira mai na i bulubulu.

²¹ Sa dodonu me ra vakavinavinaka vei Jiova ena vuku ni nona loloma tudei, Me baleta na veika veivakurabuitaki sa cakava vei ira.

²² E dodonu me ra vakacabora vua na i soro ni vakavinavinaka, Ka ra seretaka ena marau na veika kece sa cakava o koya.

²³ Eso era veisokoyaki e wasawasa ena waqa, Ka ra sa qarava na veika me ra bula kina ena nodra veisokoyaki voli;

²⁴ Era sa raica na ka sa cakava o Jiova, Na nona cakacaka veivakurabuitaki e wasawasa.

²⁵ Ni sa veivakaroti, sa liwa mai na cagi kaukauwa, Ka yavalata na wasawasa.

²⁶ Era sa laveti cake ki lagi na waqa, Ka coka sobu yani ki na vanua titobu. Ena leqa vakaoqo era sa domobula kina na kaiwaqa;

²⁷ Era sa suaigelegele ka tataivatia me vaka na mateni, Ka sa sega ni yaga na nodra kila vakacakacaka.

²⁸ Era sa qai tagi vei Jiova ena nodra leqa, Ka sa vakabulai ira mai na nodra leqa o koya.

²⁹ Sa qai tarova o koya na cagi, Ka vakamaravutaka na ua ni wasawasa.

³⁰ Era sa marau ni sa maravu na wasawasa. Ka sa kauti ira bula mai o koya ki na vanua era via lako kina.

³¹ Sa dodonu me ra vakavinavinaka vei Jiova ena vuku ni nona loloma tudei. Me baleta na veika veivakurabuitaki sa cakava vei ira.

³² Sa dodonu me ra vunautaka na nona qaqa ena nodra soqoni na nona tamata, Ka vakacaucautaki koya ena nodra bose na qase.

³³ Sa vakamacara sara ga vakadua na veiuciwai o Jiova, Ka sa tarova na vure mai ni veitobu wai.

³⁴ Sa vukica na vanua bulabula me vanua dravuisiga, Me baleta na nodra ca na tamata era tiko kina.

³⁵ Sa vukica na vanua dravuisiga me veitobu wai Kei na vanua mamaca me vanua veimata ni wai.

³⁶ Sa lewa o koya me ra tiko e kea na tamata sega na kedra kakana, Ka ra sa tara e dua na koro me ra tiko kina.

³⁷ Era sa teivaka na buca ka tea na veivaini, Ka sa levu sara na vuana.

³⁸ Sa vakalougatataki ira na nona tamata ka sa levu na luvedra, Ka sa maroroya na nodra bulumakau o koya, me kakua ni lailai sobu na kedra i wiliwili.

³⁹ Ena gauna era sa vakadrukai ka vakamalumalumutaki kina na tamata ni Kalou, Io, ena vuku ni veivakasaurarataki kei na veika rarawa,

⁴⁰ A sa qai vakaraitaka na nona beci ira era vakararawataki ira, Ka vakavuna me ra veiseseyaki ena vanua dravuisiga sa sega kina na gaunisala.

⁴¹ Ia, sa sereki ira ga na vakaloloma mai na nodra rarawa, Ka vakalevutaka na nodra vuvale me vaka na qele ni sipi.

⁴² Era sa raica na ka oqo na tamata yalododonu, Ka ra sa marau ka ra galu kece na tamata ca.

⁴³ Na tamata yalomatua me vakasamataka sara na ka oqo, Ka vakananuma ga na loloma tudei i Jiova. A Sere. A Same i Tevita.