NA SAME 105 - Vakavakadewa Vou kei na iVola tale eso

Na Kalou kei Ira na Nona Tamata

¹ Ni vakavinavinaka vei Jiova, Ka masuta na yacana; Ni vakatakila vei ira na veimatanitu na veika sa cakava.

² Ni sere vua, ni sere ni vakacaucautaki koya: Ni tukuna tikoga na veika veivakurabuitaki sa cakava!

³ Me vakalagilagia na yacana tabu; Me ra marau o ira kecega era qaravi Jiova.

⁴ Ni kerea na veivuke vei Jiova, Ka tiko voli ga e matana.

⁵ Ni nanuma na cakacaka veivakurabuitaki sa cakava o koya, Na nona cakacaka mana, kei na nona lewa a vakatauca.

⁶ Oi kemuni na kawa i Epara-ama na nona dauveiqaravi, Oi kemuni na kawa i Jekope na nona tamata digitaki.

⁷ Sa i Jiova ga na noda Kalou Sa baleta na vuravura taucoko na nona lewa.

⁸ Ena maroroya o koya na nona veiyalayalati ka sega ni mudu, Kei na nona vosa ni yalayala me yacova e udolu na veitabatamata;

⁹ Na veiyalayalati sa cakava o koya vata kei Epara-ama, Kei na nona vosa ni yalayala vei Aisake.

¹⁰ A sa cakava o Jiova na veiyalayalati tawa mudu kei Isireli, Io, na veiyalayalati sa sega ga ni mudu.

¹¹ “Au na solia vei iko na vanua o Kenani, Me nomu i votavota ni vanua.”

¹² Era a lewe vica wale ga na tamata ni Kalou Ka vulagi talega ena vanua o ya.

¹³ Era a veilakoyaki voli mai na dua na vanua ki na dua tale na vanua, Mai na dua na matanitu ki na dua tale na matanitu.

¹⁴ Ia, sa sega ni laiva o koya e dua me vakacacani ira, Ka sa vunauci ira na tui ena vukudra.

¹⁵ Sa kaya o koya, “Ni kakua ni tarai ira na noqu tamata digitaki, Kakua ni vakamavoataki ira na noqu parofita!”

¹⁶ A sa vakavuna o Jiova na dausiga ki na nodra vanua, Ka sa kauta tani kece na kedra kakana,

¹⁷ Sa talai Iosefo yani me liu vei ira, Ka a volitaki me vaka e dua na bobula.

¹⁸ E a mavoa na yavana ena sinucodo, Ka sa vakacolati e dua na i vua kaukamea e domona,

¹⁹ Me yacova ni sa yaco na ka sa yalataka. Na vosa i Jiova sa vakadinadinataki koya ni dodonu.

²⁰ Ia, sa qai sereki koya na tui Ijipita; Sa sereki koya na i liuliu ni veimatanitu.

²¹ Sa lesi koya me liutaka na nona matanitu, Ka digitaki koya me lewa na nona vanua taucoko.

²² Sa lewai ira kece sara ga na vakailesilesi ni tui, Kei na kaukauwa me vakavulici ira na nona daunivakasala.

²³ Ia, sa qai lako o Jekope ki Ijipita, Ka la'ki vakaitikotiko ena vanua o ya.

²⁴ Sa qai solia o Jiova me levu na luvedra na nona tamata, Ka cakava me ra kaukauwa cake mai vei ira na kedra meca.

²⁵ A sa vakavuna o koya me ra cati ira na nona tamata na kai Ijipita, Ka ra cakacaka vakaveivakaisini vei ira na nona tamata.

²⁶ A sa qai tala yani o koya na nona tamata o Mosese, Kei Eroni, o koya ka sa digitaka.

²⁷ E rau a cakava na nona cakacaka veivakurabuitaki, Ka cakava na cakacaka mana e Ijipita.

²⁸ Na Kalou sa tala na butobuto me buto kina na vanua, Ia, o ira na Ijipita era sa beca ga na nona i vakaro.

²⁹ Sa vukica o koya na nodra veiuciwai me dra Ka vakamatea kece na kedra ika.

³⁰ Sa sinai sara na nodra vanua ena boto, Ka bau la'ki vakasinaita na valenitui.

³¹ Ni sa vosa na Kalou, na lago kei na kutu Sa robota na nodra vanua taucoko.

³² Sa vakatauca na uca cevata me i sosomi ni uca, Ka tibika na nodra vanua ena livaliva.

³³ Sa vakarusa na nodra veivaini kei na veilolo Ka musulaka sobu na kau ni nodra vanua.

³⁴ A sa vosa, ka ra lako mai na vodre, Era sa sega ni wiliki rawa;

³⁵ Era sa kania na kakana draudrau kecega ni vanua; Ka vakayagataka na veivuata mai na nodra i teitei.

³⁶ A sa vakamatei ira na ulumatua tagane Ni veivuvale kece mai Ijipita.

³⁷ Ia sa qai kauti ira yani na Isireli; Era sa kauta yani na siliva kei na koula, Ka ra sa kaukauwa ka bulabula kece.

³⁸ O ira na Ijipita era sa rerevaki ira, Ka sa tuburi ira na marau ni ra sa lako yani.

³⁹ Sa vakarautaka na Kalou na o me veivakarurugi Kei na bukawaqa ena bogi me solia na rarama.

⁴⁰ Era sa kerekere, ka sa solia vei ira na kueli; Ka sa solia vakaiyauyau vei ira na kakana mai lomalagi.

⁴¹ A sa vida e dua na vatu levu, ka sa coka mai kina na wai, Ka drodro yani ena vanua dravuisiga me vaka na uciwai.

⁴² Sa nanuma o koya na nona veiyalayalati tabu Kei Epara-ama na nona tamata.

⁴³ A sa qai liutaki ira yani na nona tamata ena marau, O ira na nona digitaki ena lagalaga sere.

⁴⁴ A sa solia vei ira na nodra vanua na veimatanitu, Ka ra sa taukena na nodra vua ni cakacaka na tamata;

⁴⁵ Me ra muria kina na nona tamata na nona lawa Ka vakayacora na nona i vakaro. Dou ia vei Jiova na vakavinavinaka!