NA SAME 104 - Vakavakadewa Vou kei na iVola tale eso

Na Kalou Dauveibuli ka Dauveivakarautaki

¹ Mo vakacaucautaki Jiova na yaloqu! Kemuni Jiova na noqu Kalou, o ni sa cecere sara! O ni sa vakaisulu ena lagilagi kei na veika vakaturaga.

² O ni sa vakaisulutaki kemuni ena rarama me vaka na i sulu. O ni sa tevuka yani na lomalagi me vaka e dua na valelaca.

³ O ni sa tara na nomuni i tikotiko ena dela ni wai ena maliwa lala. O ni sa vakayagataka na o me nomuni kareti Ka lako voli ena taba ni cagi.

⁴ O ni sa cakava na cagi me nomuni dau kau i tukutuku Kei na tibi ni livaliva me nomuni talai.

⁵ O ni sa vakataudeitaka na vuravura ena kena yavu, Ka sa na sega ni yavalati rawa.

⁶ O ni sa ubia ena wasawasa me vaka ena i sulu, Ka sa ubia na veiulunivanua na wai.

⁷ Ia, o ni sa vunauca na wai, era sa dro tani yani; Ni ra sa rogoca na domo ni nomuni vakaro era sa lako vakatotolo tani yani.

⁸ Era sa drodro sobu mai na veidelana ki na veibuca Na vanua o ni a cakava me nodra;

⁹ O ni sa cakava e dua na i yalayala era na sega ni rawa ni sivita, Me tarova na nodra ubia tale na vuravura.

¹⁰ O ni sa cakava na mata ni wai me tovure ena veibuca Kei na uciwai me ra drodro ena maliwa ni veidelana,

¹¹ Era sa gunu kina na veimanumanu kila; Ka sa oti kina na nodra karamaca na asa kila.

¹² Era sa tara na nodra sova na manumanu vuka Ka ra laga sere ena veikau volekata.

¹³ O ni sa vakatauca mai na uca mai lomalagi ki na veiulunivanua, Ka sa sinai na vuravura ena nomuni veivakalougatataki.

¹⁴ O ni sa vakatubura na co me kedra na bulumakau, Kei na kau eso me yaga vua na tamata, Me tea kina na kena kakana,

¹⁵ Ka cakava na waini me vakamarautaki kina, Kei na waini me lumisa kina na matana, Kei na madrai me solia vua na kaukauwa.

¹⁶ Sa tau e levu sara na uca ki na veisitari mai Lepanoni, Na kau nei Jiova, sa tea o koya.

¹⁷ Era sa tara mai kea na nodra sova na manumanu vuka, Ka ra cakava na nodra i tikotiko na belo ena veidamanu.

¹⁸ Era sa tiko voli na me kila ena veiulunivanua cecere Ka ra vuni voli na koli ena veiqara vatu.

¹⁹ O ni sa bulia na vula me vakatakilakilataka na gauna, Ka sa kila na matanisiga na gauna me dromu kina.

²⁰ O ni sa cakava na bogi ena kena buto era sa veilakoyaki Kece mai kina na manumanu kila.

²¹ Era sa tagi na luve ni laione ni ra vakasasa voli; Ni ra vaqara na kakana e solia vei ira na Kalou.

²² Ia, ni sa cabe cake na siga era sa lesu tale Ka la'ki davo tale ena dui nodra qara.

²³ Era sa qai lako yani na tamata me ra cakava na nodra cakacaka, Ka cakacaka tiko me yacova sara na yakavi.

²⁴ I Jiova, sa levu sara na ka o ni sa bulia! Era sa caka vakavuku kecega; Sa sinai na vuravura ena veika o ni sa bulia.

²⁵ Sa tu kina na wasawasa levu ka raraba! Ka ra tu kina na veika buli e sega ni wili rawa, Na veika lelevu kei na veika lalai.

²⁶ Sa veisokoyaki kina na waqa, ka qito voli talega kina o Livaiacani Na manumanu vakaitamera ni wasawasa o ni a bulia.

²⁷ Era sa vakararavi na veika kece vei kemuni, Mo ni solia vei ira na kakana, ni ra sa viakana.

²⁸ O ni sa solia vei ira era sa qai kania, O ni sa solia na kakana ka ra sa mamau kina.

²⁹ Ni o ni sa gole tani era sa rere; Ni o ni sa tarova na nodra i cegu era sa mate Ka suka tale ki na qele era a buli mai kina.

³⁰ Ia ni o sa solia vei ira na i cegu era sa bula; O ni sa solia na bula vou ki na vuravura.

³¹ Me tudei tu ga na lagilagi i Jiova ka sega ni mudu! Me marautaka o Jiova na veika sa bulia!

³² A sa raica na vuravura, ka sa sautaninini; Sa tara na veiulunivanua o koya ka sa kubou mai.

³³ Au na laga sere vei Jiova ena noqu gauna ni bula taucoko. Au na laga sere ni vakacaucautaka na noqu Kalou ena gauna kecega au na bula kina.

³⁴ Me na taleitaka o koya na noqu sere, Ena vuku ni noqu sa dau rekitaki Jiova.

³⁵ Me ra vakarusai na i valavala ca e vuravura, Me ra qeyavu sara vakadua na tamata ca! Mo vakacaucautaki Jiova, na yaloqu! Me vakacaucautaki ga o Jiova!