NA SAME 103 - Vakavakadewa Vou kei na iVola tale eso

¹ Mo vakacaucautaki Jiova, na yaloqu, Io, na ka kecega ena noqu bula taucoko, Mo vakacaucautaka na yacana tabu.

² Mo vakacaucautaki Jiova, na yaloqu, Ka kakua ni guilecava ni sa yalovinaka o koya.

³ Sa bokoca o koya na noqu i valavala ca kece sara, Ka vakabulai au mai na kequ mate kecega;

⁴ Sa vakabulai au o koya mai na i bulubulu, Ka vakalougatataki au ena nona loloma tudei kei na yaloveivosoti.

⁵ Sa vakasinaiti na noqu bula ena veika vinaka, Ka'u sa cauravou tikoga kina ka kaukauwa me vaka na ikeli.

⁶ Sa totaki ira era vakacacani Jiova, Ka solia vei ira na nodra dodonu.

⁷ Sa tukuna na nona i naki vei Mosese o koya, Ka laiva vei ira na Isireli me ra raica na nona cakacaka veivakurabuitaki.

⁸ Sa yalododonu ka dau lomasoli o Jiova, Sa berabera ni cudru ka sa sinai ena loloma tudei.

⁹ Sa sega ni dau ia tikoga na veivunauci o koya, Ena sega ni cudru tikoga ka sega ni mudu.

¹⁰ Sa sega ni vakatauca vei keda na i totogi e veirauti kei na noda i valavala ca, Ka sega tale ni cudruvi keda me vaka na noda ca.

¹¹ Me vaka na cecere ni lomalagi mai vuravura, Sa levu vakakina na loloma tudei ni Kalou vei ira era sa rerevaki koya.

¹² Me vaka na yawa ni tokalau mai na ra ni vanua, Sa yawa vakakina na vanua e biuta laivi kina na Turaga na noda i valavala ca mai vei keda yadua.

¹³ Me vaka na nona yalovinaka e dua na tama ni gone vei ira na luvena, Sa yalovinaka vakakina o Jiova vei ira era sa rerevaki koya.

¹⁴ Sa kila na Turaga na keda i bulibuli Ka sa kila tu ni da sa kuvu ni soso.

¹⁵ Ia na tamata sa vaka ga na co na nona bula, Sa tubu ka se me vaka e dua na senikau ni veikau.

¹⁶ Ia ni sa liwava na cagi, sa cagina tani yani Ka sa na sega sara ni kune tale.

¹⁷ Ia, na loloma tudei ga i Jiova vei ira era sa rerevaki koya sa ia tikoga ka sega ni mudu, Ka sa na vakataudeitaki na nona yalovinaka vei ira me yacova na veitabatamata kecega,

¹⁸ Io, ki vei ira ga sa dinata na nona veiyalayalati, Ka ra sa muria ena yalodina na nona i vakaro.

¹⁹ Sa vakatikori o Jiova ena nona i tikotiko vakatui mai lomalagi; Ka sa liutaka na veika kecega na nona matanitu.

²⁰ Ni vakacaucautaki Jiova, oi kemuni na agilosi kaukauwa ka qaqa, Oi kemuni o ni sa muria na nona i vakaro, Ka rogoca na nona vosa.

²¹ Ni vakacaucautaki Jiova, na kaukauwa kecega mai lomalagi, Oi kemuni na tamata o ni cakava na ka kecega e vinakata o koya!

²² Ni vakacaucautaki Jiova, na ka kecega e bulia o koya Ena veivanua kecega e lewa! Mo vakacaucautaki Jiova, na yaloqu.