NA SAME 10 - Vakavakadewa Vou kei na iVola tale eso

Masu ni Veivagalalataki mai na Meca

¹ Na cava o ni sa rui yawa kina Jiova? A cava o ni dau vunitaki kemuni kina ena veigauna ni leqa?

² Era sa dokadoka ni vakararawataki ira na dravudravua o ira na tamata i valavala ca; Me ra coko tale mada ga ena dai era a viria.

³ Sa dokadokataka voli na tamata ca na nona gagadre ca; Sa vosacataka ka cati Jiova na tamata kocokoco.

⁴ Sa kaya ena nona dokadoka na tamata i valavala ca, “Ena sega ni totogitaki au na Kalou! Sa sega ni kauwaitaki o koya!” Sa i koya oqori na ka e nanuma na tamata ca.

⁵ Sa toso cake na ka kecega e cakava. Sa sega ni vakasamataka rawa na veilewai ni Kalou; Ka sa beci kina na kena meca.

⁶ Sa kaya e lomana o koya, “Ena sega na ka ena yavalati au rawa, Au na sega sara ni sotava e dua na leqa.”

⁷ Sa vosataka na gusuna na veivakasewasewani, na lasu kei na veivakararawataki; la sa dau totolo me vosataka na vosa vakasisila kei na vosa ca.

⁸ Sa vunitaki koya voli ena veikoro, Sa wawa voli e kea me labati ira na tamata dodonu. A sa dau vakaraici ira lo voli na malumalumu me vakacacani ira;

⁹ Sa wawa koto ena nona i vunivuni me vaka na laione. Sa davo koto me waraka na dravudravua ka sa mavoa vakaca sara, A sa vesuki koya ena nona dai ka kauta tani yani.

¹⁰ Sa davo koto na tamata dravudravua ka sa mavoa vakaca sara; Sa vakadrukai koya na kaukauwa tawa loloma.

¹¹ A sa kaya e lomana na tamata ca, “Sa sega ni kauwaitaki na Kalou. Sa vunia na matana ka na sega ni raici au!”

¹² Ni lako mai Jiova ka mai vakabulai au! Kemuni na Kalou ni kakua ni guilecavi koya sa vakalolomataki.

¹³ A cava sa beca kina na Kalou na tamata ca Ni sa kaya e lomana, “Ena sega ni totogitaki au o koya?”

¹⁴ Ia, o ni sa raica; O ni sa kunea na rarawa kei na vutugu, Ka vakarau tu mo ni veivuke. Sa soli koya taucoko na tamata malumalumu vei kemuni Baleta ni o ni sa dau vukei ira tikoga na dravudravua.

¹⁵ Ni tamusuka na nona kaukauwa na tamata loma ca ka i valavala ca; Me ra totogitaki ena vuku ni nodra i tovo ca, Me yacova sara ni ra sa muduka vakadua.

¹⁶ Sa Tui na Turaga ka tawa mudu, Ka ra sa takali yani na veimatanitu mai na nona vanua.

¹⁷ I Jiova, o ni na rogoca na nodra masu na malumalumu, O ni na qai solia vei ira na kaukauwa.

¹⁸ O ni na rogoca na nodra tagi o ira sa vakararawataki kei ira na luveniyali; Ka vakatauca na lewa vinaka ena vukudra, Me ra kakua tale kina ni veivakarerei o ira na tamata era na mate talega. Vua na i liuliu ni sere. A nei Tevita.