Marika 4 - Vakavakadewa Vou kei na iVola tale eso

Na Vosa Vakatautauvata ni Daukabukaburaki

¹ A sa tekivu me veivakatavulici o Jisu ena baravi mai Kalili. Era lewe vuqa sara era soqoni vata yani vua ka sa la'ki vodoka kina o koya e dua na waqa, ka la'ki dabe kina. Ia era a tu ga mai matasawa o ira na lewe vuqa.

² Sa qai vakatavulici ira o koya ena vuqa na ka ena vosa vakatautauvata; ia ni sa veivakatavulici tiko, sa kaya vei ira o koya:

³ “Ni rogoca mada! Sa dua na dauteitei sa la'ki kabukaburaki.

⁴ Ni sa kabukaburaki voli, sa qai lutu eso na i tei ni kau ena tutu ni sala, ka ra lako mai na manumanu vuka ka kania.

⁵ Era a lutu eso tale ena vanua veivatu, ka sega soti ni levu kina na qele, ka ra sa tubu cake sara vakatotolo, ni sega soti ni vavaku na kena qele.

⁶ Ni sa cabe na siga era sa malai mai, ia ni sa sega na wakadra era sa raqosa sara.

⁷ E a lutu eso tale ena maliwa ni veiwavakavotona, ka ra sa tubu cake na veiwavakavotona ka vakaruguti ira, ka ra mani sega kina ni vua.

⁸ Ia a lutu eso tale ena qele vinaka, era a tubu cake me levu mai ka mani yaco me ra vua, ka sa vua i tolusagavulu eso, ka onosagavulu eso, ka mani drau sara eso.”

⁹ Sa qai tinia o Jisu ena vosa oqo, “O koya sa vakadaligana, ia me rogoca sara!”

Na Kedra i Naki na Vosa Vakatautauvata

¹⁰ Ia ni sa tiko taudua ga o koya, era sa qai tarogi koya o ira na tiko vata kaya kei iratou na lewe tinikarua me baleta na vosa vakatautauvata.

¹¹ Sa qai kaya o koya vei ira, “Sa soli vei kemuni mo ni kila na ka vuni ni matanitu ni Kalou; ia, vei ira ga e taudaku, sa tukuni na ka kecega ena vosa vakatautauvata,

¹² me rawa kina, ‘Ni ra vakararai voli ka sega ni kunea, Era rogoca tiko ka lecava ga na kena i balebale. Ni kevaka era sa kitaka vakakina, era na saumaki mai vua na Kalou, Ka na vosoti ira o koya.’ ”

Sa Vakamacalataka o Jisu na Vosa Vakatautauvata ni Daukabukaburaki

¹³ Sa qai kaya tale vei ira o Jisu, “O ni sega ni kila na vosa vakatautauvata oqo? O ni na qai kila vakacava na vosa vakatautauvata tale eso?

¹⁴ Sa kaburaka na vosa ni Kalou na dauteitei.

¹⁵ Eso na tamata era vaka na i tei ni kau ka kaburaki ena tutu ni sala; ni ra sa rogoca oti, sa qai lako sara mai o Setani ka kauta tani na vosa ka a kaburaki vei ira.

¹⁶ E vakakina na kena ka ra kaburaki ena vanua veivatu, ni ra sa rogoca na vosa era sa vakabauta sara ena reki;

¹⁷ ia me vaka ni sega na wakadra e lomadra, era mani tu dei vakalailai ga. Ia, ni sa qai tubu na rarawa se na veivakacacani ena vuku ni vosa, era sa tarabe sara.

¹⁸ Eso tale ka kaburaki ena veiwavakavotona sai ira ka ra rogoca na vosa,

¹⁹ ia sa qai curu yani na lomaocaoca ni vuravura oqo, na domona na i yau, kei na veimataqali gagadre tale e vuqa, ka vakaruguta na vosa ka sega kina ni vua.

²⁰ Ia na kena ka ra kaburaki ena qele vinaka, sai ira ka ra sa rogoca na vosa, ka vakabauta, ka ra la'ki vua sara; e tolusagavulu eso, ka onosagavulu eso, ka mani drau sara eso.”

Na Cina ena Ruku ni Bilo

²¹ Sa qai kaya tale vei ira o Jisu, “E dua beka li sa dau kauta na cina ka ubia ena bilo se biuta ki na ruku ni mocemoce? E sega li ni dau la'ki biu ga ki na kena i tutu?

²² Ni sega na ka e tabogo me na sega ni vakaraitaki mai, ka sega na ka vuni, me na sega ni vakavotui.

²³ Mo ni rogoca vinaka sara oqo, kevaka e tiko na daligamuni!”

²⁴ Sa qai kaya tale vei ira o koya, “Ni qarauni kemuni ena ka o ni rogoca; na i vakarau ga o ni vakarautaka, ena vakarautaki tale vei kemuni, ka na vakaikuritaki talega.

²⁵ O koya sa tu vua eso na ka ena soli vakalevu tale vua, ia o koya e segai na ka e tu vua ena kau tani mai vua na ka e sa bau toka vua.”

Na Vosa Vakatautauvata ni Kau sa Tubu Tiko

²⁶ Sa qai kaya tale o Jisu, “Na matanitu ni Kalou sa vaka e dua na tamata sa kaburaka na i tei ni kau ena nona i teitei.

²⁷ A sa la'ki moce o koya ena bogi, ka sa yadra cake ka veilakoyaki voli ena siga, ia ena gauna kece oqori sa rovu ka tubu tikoga kina na kau sa teivaki. Ia sa sega ni kila o koya se yaco tiko beka vakacava na ka oqo.

²⁸ Ni sa vakavuna na qele me tubu na kau ka me vuataka na vuana; me na liu taumada na drauna, ka tarava na sena, qai muri na vuana.

²⁹ Ia ni sa matua mai na vuana, sa vakayagataka sara o koya na kena i sele me musulaka kina, ni sa gauna ni tatamusuki.”

Na Vosa Vakatautauvata ni Sore ni Musita

³⁰ Sa qai kaya tale o Jisu, “Me da vakatautauvatataka mada kei na cava na matanitu ni Kalou, se na vosa vakatautauvata cava beka me vakamacalataki kina?

³¹ Sa vaka e dua na sore ni musita, ni sa kaburaki e dela ni qele, sa ka lailai duadua vei ira na i tei ni kau kecega e vuravura;

³² ia ni sa tubu cake ka yaco me ka levu duadua vei ira na kau lalai kecega, a sa yaco me lelevu sara na tabana ka ra sa vakaitikotiko kina na manumanu vuka ena kena rurugu.”

³³ Sa dau vosa vei ira o koya ena vuqa na vosa vakatautauvata vakaoqo, me vaka na ka e rawa ni ra kila.

³⁴ Sa dau vosa ga vei ira o koya ena vosa vakatautauvata, ia ni ratou sa tiko vakai iratou ga sa qai dau vakamacalataka vei iratou na nona tisaipeli na veika kecega.

Sa Vakamaravutaka na Cava o Jisu

³⁵ Ena siga o ya ni sa yakavi mai, sa qai kaya vei iratou na nona tisaipeli o Jisu, “Tou lako mada ki tai kadua.”

³⁶ E ratou sa qai laivi ira tu na lewe vuqa, ka ratou kauti koya sara ena waqa ga ka a tiko kina; era sa lako vata kei iratou eso tale na waqa.

³⁷ Sa qai tubu mai e dua na cagi ca levu sara ka sa seva na waqa na biau, ka sa tekivu kina me sinai mai na waqa ena wai.

³⁸ Ia sa tiko o koya ena mua i muri, ka moce koto ena i lokoloko. E ratou sa qai vakayadrata ka kaya vua, “Na i Vakavuvuli, o ni sega beka ni kauwaitaka ni datou sa voleka ni mate?”

³⁹ Sa qai tucake o koya ka vunauca na cagi, ka kaya, “Mo ruru mai!” ka kaya ki na ua ni wasawasa, “Mo maravu mai!” A sa ruru sara na cagi, ka mai lutu yani e dua na maravu levu.

⁴⁰ Sa qai kaya vei iratou, “A cava dou sa rere kina? E se segai tikoga vei kemudou na vakabauta?”

⁴¹ Sa qai tuburi iratou e dua na rere levu, ka ratou sa veikayaka vakai iratou, “O cei beka na tamata oqo, ni sa talairawarawa vua na cagi kei na ua ni wasawasa?”