Marika 3 - Vakavakadewa Vou kei na iVola tale eso

Na Tamata Liga Mate

¹ E a qai curu tale o Jisu ki na valenilotu ka tiko kina e dua na tamata e sa paralasi tu e dua na ligana.

² Era sa qai vakaraici koya matua toka eso ka ra tiko e kea se na vakabula na tamata o ya ena Siga ni Vakacecegu se sega, ka me ra na qai beitaki koya kina.

³ Sa qai kaya o Jisu vua na tamata liga mate, “Lako cake mai, ka mai duri tu e matadra na tamata!”

⁴ Sa qai vuki tale o koya ka kaya vei ira na tamata, “E tara li me caka na ka vinaka ena Siga ni Vakacecegu, se me caka kina na ka ca?; me caka kina na veivakabulai se na veivakamatei?” Ia era a mani sega ni kaya e dua na ka.

⁵ Sa qai vakawadravi ira kece ena cudru o Jisu, ni sa rarawataka na kaukauwa ni lomadra. A sa qai kaya vua na tamata o ya, “Dodoka cake mai na ligamu!” Sa qai dodoka mai na ligana ka sa mani vakabulai sara kina.

⁶ Era sa mani curu ki tautuba na Farisi ka la'ki bosea vata kei ira na i lawalawa i Eroti, se me ra na vakamatei koya vakacava.

E Dua na i Lala Levu e Bati ni Drano

⁷ E ratou sa qai lako vakatikitiki vaka ki na bati ni drano o Jisu kei iratou na nona tisaipeli, ka ra sa muri iratou e dua na i lala levu mai Kalili, kei Jutia talega,

⁸ kei Jerusalemi, kei Itumia, kei na tai kadua ni Joritani, kei ira na lewe vuqa sara mai na veiyasana vaka-Taia kei Saitoni. Era sa lako vua ni ra sa rogoca na veika kece sa cakava.

⁹ Era sa rui lewe levu sara na tamata, sa mani kaya kina o Jisu vei iratou na nona tisaipeli me ratou vakarautaka toka e dua na waqa de ra qai drigilaki koya vakaca na tamata.

¹⁰ A sa vakabulai ira oti e lewe vuqa o koya, ka ra sa veidrigidrigi yani ki vua o ira kece era tauvi mate tu me ra tarai koya.

¹¹ Ia ni ra sa raici koya talega na yalo velavela, era sa cuva e matana ka qoqolou ka kaya, “Oi kemuni na Luve ni Kalou!”

¹² Sa qai vakaroti ira matua na yalo velavela o koya me ra kakua sara ni vakatakilai koya.

Sa Digitaki Iratou na i Apositolo e Tinikarua o Jisu

¹³ Sa qai cabe cake ki na dua na delana o Jisu, ka kacivi ira yani vua eso na tamata sa vinakati ira o koya; ka ra sa lako yani vua.

¹⁴ Sa qai digitaka e lewe tinikarua, ka vakatoka me ratou apositolo, ka kaya vei iratou, “Au na talai kemudou talega yani mo dou la'ki vunau,

¹⁵ ka dou na rawata na kaukauwa mo dou vakasavi ira tani kina na tevoro.”

¹⁶ Sa i iratou oqo na lewe tinikarua sa digitaka o koya: o Saimoni (sa vakatoka o Jisu me yacana o Pita);

¹⁷ o Jemesa kei na tacina o Joni, oi rau na luve i Sepeti (sa vakatokai rau o Jisu me yacadrau o Ponijese, a kena i balebale, “Luve ni Kurukuru”);

¹⁸ o Adriu, kei Filipe, kei Pacolomiu, kei Maciu, kei Tomasi, kei Jemesa na luve i Alifio, kei Cateo, kei Saimoni na Gumatua,

¹⁹ kei Jutasa Isikarioti, o koya ka a bukiveretaki Jisu.

O Jisu kei Pielisepupi

²⁰ Sa qai lako o Jisu ki na dua na vale; ka ra sa soqoni vata tale yani kina na lewe vuqa, ka sa sega ni dua na gauna me kana kina kei iratou na nona tisaipeli.

²¹ Ia ni ratou sa rogoca na wekana, e ratou sa mani lako me ratou la'ki tarovi koya, baleta ni ra sa kaya tiko na tamata, “Sa lialia o koya oqo!”

²² Era sa qai kaya eso na daunilawa ka ra lako sobu mai Jerusalemi, “Sa curumi koya tiko o Pielisepupi, ka vakasavi ira na tevoro ena kaukauwa ni nodra turaga na tevoro.”

²³ Sa qai kacivi ira vua o Jisu, ka kaya vei ira ena vosa vakatautauvata, “E rawa vakaevei vei Setani me vakasavi Setani tani?

²⁴ Kevaka sa veisei vakai koya e dua na matanitu, ena sega ni tudei rawa na matanitu o ya.

²⁵ Kevaka sa veisei vakai koya e dua na vuvale, ena sega ni tudei rawa na vuvale o ya.

²⁶ Ia kevaka sa veivorati ka veisei vakai koya na matanitu i Setani, ena sega ni tudei rawa, ia ena bale ga ka oti yani.

²⁷ “Ena sega ni rawa vua e dua na tamata me na curuma rawa na vale ni dua na qaqa ka kauta tani na veika e taukena, ka vakavo ga kevaka sa vesuki koya na qaqa taumada e liu; ka sa na qai rawa kina vua me taura emuri na veika sa taukena.

²⁸ “Au sa kaya vakaidina vei kemudou, ena rawa me bokoci na nodra i valavala ca kecega na tamata, kei na nodra vosavakacacataka na Kalou.

²⁹ Ia o koya sa vosa vakacacataka na Yalo Tabu, ena sega ni bokoci na nona i valavala ca, baleta ni sa kitaka na cala sa tawamudu.”

³⁰ Sa tukuna na ka oqo o Jisu baleta ni ra sa kaya, “E tiko vua e dua na yalo velavela.”

Na Tina i Jisu kei Iratou na Tacina

³¹ E ratou sa qai lako mai na tina i Jisu kei iratou na tacina, ka ratou mai tu e tautuba ka vakauta vua e dua na i tukutuku me lako yani vei iratou.

³² Era a dabe wavoliti koya tiko na lewe vuqa, ka ra mani kaya vua, “Raica, e ratou sa tiko e tautuba na tinamu kei iratou na tacimu; e ratou sa mai vakasaqarai iko.”

³³ Sa qai sauma o Jisu ka kaya, “O cei na tinaqu? Se o cei soti na taciqu?”

³⁴ Sa qai vakaraici ira kece na tamata era sa dabe wavokiti koya, ka kaya, “Sa i ira oqo na tinaqu kei na taciqu!

³⁵ O koya ga e cakava na loma ni Kalou, sa taciqu, sa ganequ, ka sa tinaqu.”