Marika 15 - Vakavakadewa Vou kei na iVola tale eso

O Jisu ena Mata i Pailato

¹ Ia ni sa kida na mataka era sa qai bose vata sara o ira na matabete e cake, kei ira na qase kei ira na daunilawa kei ira kece na lewe ni Bose. Era sa qai vesuki Jisu ena sinucodo ka kauti koya tani mai kea ka soli koya vei Pailato.

² Sa qai tarogi koya o Pailato, ka kaya, “O iko li na nodra tui na Jiu?” E a sauma vua o koya, ka kaya, “Oqori na ka o sa kaya.”

³ Era sa qai beitaki koya o ira na matabete e cake ena vuqa sara na ka.

⁴ Sa qai tarogi koya tale o Pailato, ka kaya, “E sega beka na ka o kaya rawa ena levu ni ka era sa beitaki iko tiko kina o ira oqo?”

⁵ Ia sa sega ga ni bau sauma o Jisu; ka sa kurabui kina o Pailato.

Sa Tauci na Lewa me Mate o Jisu

⁶ A sa dau nona i valavala o Pailato me dau sereka e dua na kaivesu era dau kerea mai na lewenivanua me sereki ena veigauna kece ni Solevu ni Lakosivia.

⁷ E a tiko ena valeniveivesu ena gauna o ya e dua na tamata ka yacana o Parapa, kei ira talega eso na tamata i valavala kaukauwa era a laba vata kaya ena gauna ni vakacaca.

⁸ Era sa qai lako cake na lewe vuqa ka vakatekivu cikevi Pailato me sereka vei ira e dua na kaivesu me vaka na kena i vakarau.

⁹ A qai sauma vei ira o koya, ka kaya, “O ni vinakata me'u sereka vei kemuni na nodra Tui na Jiu?”

¹⁰ A sa kila vinaka tu o Pailato ni ra a soli Jisu yani vua na i liuliu ni matabete baleta ni ra sa vuvutaki koya.

¹¹ Ia era a qai vakauqeti ira na lewe vuqa o ira na i liuliu ni matabete me ra kerea vei Pailato me sereki Parapa ga vei ira.

¹² Sa qai kaya tale o Pailato vei ira, “Ia na cava ga me'u qai cakava vei koya o ni sa vakatoka me nodra Tui na Jiu?”

¹³ Era sa qai kailavaka yani, “Vakota ki na kauveilatai!”

¹⁴ Sa qai taroga tale o Pailato vei ira, “Ena vuku ni cava? Na cala cava sa cakava o koya?” Era sa qai qoqolou vakalevu cake ga kina, ka kaya, “Vakota ki na kauveilatai!”

¹⁵ Ia ni sa vinakata ga o Pailato me vakayalovinakataki ira na lewe vuqa, sa mani sereki Parapa kina vei ira. Sa qai vakanakuitataki Jisu ka soli koya yani me vakoti ki na kauveilatai.

Era sa Vakalialiai Jisu na Sotia

¹⁶ Era sa qai kauti Jisu na sotia ki na loma ni bai ni kovana, ka ra sa soqoni vata kina na vo ni lewe ni mataivalu o ya.

¹⁷ Era sa qai vakasulumi koya ena i sulu roka lokaloka, na roka ni sulu vakatui, ka ra talia e dua na i sala wavakavotona ka ra vakatokara vua.

¹⁸ Era sa qai vakatekivu me ra kidavaki koya, ka kaya, “Me bula balavu na nodra Tui na Jiu!”

¹⁹ Era sa qai mokuta na uluna ena dua na kuita, ka ra vakasiviti koya, ka ra tekiduru ka cuva vua.

²⁰ Ni sa oti na nodra vakalialiai koya, era sa qai luvata laivi mai vua na i sulu lokaloka, ka vakadarama vua na nona i sulu dina. Era sa qai kauti koya me vakoti ki na kauveilatai.

Sa Vakoti ki na Kauveilatai o Jisu

²¹ Ia ni ra sa lako tiko era sa sota sara kei na dua na tamata, a yacana o Saimoni. E lako tiko mai loma ni vanua o koya. E kai Kirini, ka tamadrau o Alekisada kei Rufo. Era sa qai vakasaurarataki koya me colata na kauveilatai i Jisu.

²² Era sa qai kauti Jisu sara ki na vanua e vakatokai o Kolikoca (a kena i balebale na vanua ni qavokavoka).

²³ Era sa qai solia vua na waini ka veiwaki tu kei na mura, o ya na drega ni kau ka dau vakamalumalumutaka na momosi ni yago, ia sa bese ni gunuva o koya.

²⁴ Era sa qai vakoti koya na sotia ki na kauveilatai, ka ra vota na nona i sulu ena vakawirimadigi, me ra dui kila kina na nodra i votavota.

²⁵ Sa ciwa na kaloko ena mataka ena gauna era vakoti koya kina ena kauveilatai.

²⁶ A sa volai toka e cake na ka e beitaki kina, “Na Nodra Tui Na Jiu”.

²⁷ Era sa vakota vata kaya e rua na daubutako, e dua ena yasana i matau, ka dua ena i mawi;

²⁸ a sa vakayacori kina na i Vola Tabu, ni sa kaya, “Sa okati vata o koya kei ira na tamata cala.”

²⁹ Era sa kuretaka na uludra ena nodra vakalialiai koya o ira era veilakoyaki tiko e kea, ka kaya, “O iko! O iko o a via vakarusa na Valenisoro ka tara tale ena tolu na siga,

³⁰ vakabulai iko mada, ka lako sobu mai na kauveilatai!”

³¹ Era vakalialiai koya vakakina o ira na matabete e cake kei ira na daunilawa, ka ra veikayaka vakai ira, “O koya sa dau vakabulai ira na tani, e sega mada ga ni vakabulai koya rawa!

³² Me lako sobu mada mai na kauveilatai ena gauna sara ga oqo na Mesaia, na nodra Tui na Isireli, ka keimami na qai vakabauti koya.” Erau a bau vosa vakacacataki koya talega oi rau na lewe rua sa lauvako vata kaya ena kauveilatai.

Na Mate i Jisu

³³ Ni sa sigalevu tutu, sa qai butobuto na vanua taucoko ka tolu na aua na kena balavu.

³⁴ Ena tolu na kaloko ena yakavi, sa qai kaci o Jisu ena domo levu, ka kaya, “Ilai, Ilai, lama sapakacani?” E kena i balebale, “Noqu Kalou, noqu Kalou, o ni sa biuti au ena vuku ni cava?”

³⁵ Era a rogoca eso vei ira ka tucake tu e kea, ka ra kaya kina, “Raica, sa kacivi Ilaijia tiko o koya.”

³⁶ Sa qai cici e dua ka tonisua e dua na vutovuto ena wai wiwi, ka vakacobara kina e dua na gasau, ka dulaka vua me gunuva, ka kaya, “Laiva mada me da raica se na sobu mai o Ilaijia me kauti koya mai ki ra se sega.”

³⁷ Sa qai kaci ena domo levu o Jisu, mai cavuka sara yani na nona i cegu.

³⁸ A sa kasei rua na i lati ni Valenisoro, mai cake ka kauta ki ra.

³⁹ Ni sa raica na turaganivalu ka tu donui koya na i vakarau ni nona mate, sa kaya, “Sa Luve ni Kalou dina ga na tamata oqo!”

⁴⁰ Era a rai tale tu ga mai vakayawa eso na yalewa ka ratou tiko ena kedra maliwa o Salome kei Maria na yalewa ni Makitala, kei Maria na tinadrau o Jemesa lailai kei Josese.

⁴¹ O iratou o ya, e ratou a dau muri Jisu ka qaravi koya ena gauna e se tiko voli kina mai Kalili. Era a tiko talega e kea e vuqa vei ira na yalewa ka lako vata mai kei Jisu ki Jerusalemi.

Sa Bulu o Jisu

⁴² A sa yakavi mai na vanua. Ia me vaka ni siga tiko ni vakavakarau na siga o ya, o ya na siga ni se bera na Siga ni Vakacecegu;

⁴³ sa mani lako kina vakadoudou vei Pailato o Iosefo na kai Arimacea, ka la'ki kerea na yago i Jisu. O Iosefo oqo e lewe ni Matabose, ka tamata dokai, ka dau namaka tale tikoga na yaco mai ni Matanitu ni Kalou.

⁴⁴ E a kidacala o Pailato ena totolo ni mate i Jisu. Sa qai kaciva o koya na turaganivalu, ka taroga vua se sa dede na nona mate, se segai.

⁴⁵ Ia ni sa qai kila mai vua na turaganivalu ni sa mate dina sara o Jisu, sa qai vakadonuya vei Iosefo me kauta na yagona.

⁴⁶ A sa volia oti tu o Iosefo e dua na i sole lineni. Sa qai la'ki kauta sobu mai ki ra na yago i Jisu, ka solega ena i sulu lineni, ka la'ki vakotora ena dua na i bulubulu ka ta ena vatu. Sa qai vaqiqica kina e dua na vatu levu me sogota na katuba ni bulubulu.

⁴⁷ E rau a raica tu o Maria na yalewa ni Makitala, kei Maria na tina i Josese, na vanua e vakotori kina na yago i Jisu.