Marika 14 - Vakavakadewa Vou kei na iVola tale eso

Sa Bukiveretaki o Jisu

¹ A sa vo tiko e rua na siga me vakayacori kina na Solevu ni Lakosivia kei na Madrai Sega ni Vakatubu. Era sa saga tiko o ira na bete levu kei ira na daunilawa me ra vesuki Jisu lo, ka vakamatea.

² Era sa kaya, “Me da kakua ni cakava ena gauna ni soqo, de qai yaco kina e dua na tiko yavavala.”

Sa Lumuti o Jisu mai Pecani

³ E a tiko o Jisu mai Pecani ena vale nei Saimoni na vukavuka; ia ena gauna sa kana tiko kina, sa mani lako yani e dua na yalewa ka kauta voli yani e dua na tavaya waiwai boi vinaka, sau dredre ka caka mai na narita dina. Sa qai voroka o koya na tavaya ka livia na waiwai ki na ulu i Jisu.

⁴ Ia era sa qai veikayaka ena cudru eso vei ira ka tiko e kea, “Na cava e vakamaumautaki walega kina na waiwai oqo?

⁵ E a rawa ni volitaki na waiwai oqo ena tolu na drau vakacaca na tiki ni siliva, ka qai soli na kena i lavo vei ira na dravudravua!” Era sa vosa kudrukudrutaka sara vakalevu na yalewa o ya.

⁶ Ia sa qai kaya o Jisu, “Laivi koya ga! A cava dou sagai koya kina? Sa cakava vei au o koya e dua na cakacaka vinaka.

⁷ Era na tiko vata ga kei kemuni ena veigauna kece o ira na dravudravua, ka rawa ni o ni caka vinaka vei ira ena gauna o ni vinakata kina; ia oi au, au na sega ni tikotiko ga kei kemuni.

⁸ Sa cakava o koya na ka sa rawata: sa lumuta rawa oqo na yagoqu ka me qai bulu.

⁹ Au sa kaya vakaidina vei kemudou, ena veivanua kecega ena vunautaki kina na i tukutuku vinaka ena vuravura taucoko, ena tukuni kina na ka sa cakava na yalewa oqo, me kena i divi.”

Sa Vakadonuya o Jutasa me Bukiveretaki Jisu

¹⁰ Sa qai lako o Jutasa Isikarioti, e dua vei iratou na lewe tinikarua, kivei ira na bete levu me la'ki bukiveretaki Jisu vei ira.

¹¹ Ia ni ra sa rogoca era sa marau, ka yalataka me ra soli i lavo vua. Sa qai vakasaqara sara o koya e dua na gauna vinaka me vakatakilai Jisu kina vei ira na nona meca.

E ratou sa Kania na Kakana ni Lakosivia o Jisu kei Iratou na Nona Tisaipeli

¹² Ena i matai ni siga ni Solevu ni Madrai Sega ni Vakatubu, na siga me ra vakamatea kina na lami ni Lakosivia, e ratou sa qai kaya vua na nona tisaipeli, “Evei na vanua o ni vinakata me keitou la'ki vakarautaka kina vei kemuni na kakana ni Lakosivia?”

¹³ Sa qai tala e lewe rua vei iratou na nona tisaipeli, ka kaya vei rau, “Drau lako ki na koro ka drau na sota kaya e dua na tamata ka colata tiko e dua na saqa wai; drau muri koya sara.

¹⁴ Ia na vale ena la'ki curu kina, drau kaya vua na i taukei ni vale, ‘E kaya mai na i Vakavuvuli, Evei na tiki ni vale ni vulagi me keitou na vakayagataka kina na kakana ni Lakosivia kei iratou na noqu tisaipeli?’

¹⁵ Ena qai vakaraitaka vei kemudrau e dua na tiki ni vale levu e cake, sa vakaiyaya ka vakarau tu. Drau vakarautaka kina na kedatou.”

¹⁶ E rau sa mani lako na tisaipeli, ka yaco ki na koro o ya ka kunea na veika kece me vaka ga sa tukuna vei rau o koya. E rau sa mani vakarautaka kina na kakana ni Lakosivia.

¹⁷ Ni sa yakavi mai na vanua, e ratou sa qai lako o Jisu kei iratou na lewe tinikarua ki na vale o ya.

¹⁸ Ni ratou sa kana tiko, sa qai kaya o Jisu, “Au sa kaya vakaidina vei kemudou, e dua vei kemudou ena soli au yani, e dua ga ka sa kana vata tiko oqo kei au.”

¹⁹ Sa qai rarawa sara na lomadratou, ka ratou dui kaya vakaveitaravi yani vua, “Oi au beka?”

²⁰ Sa qai kaya vei iratou o Jisu, “E dua ga vei kemudou na lewe tinikarua, o koya sa tonia vata kei au na kena madrai ena bilo.

²¹ Ni sa na lako ga na Luve ni Tamata me vaka sa volai tu ena vukuna, ia sa na vakadomobula na ka ena yaco vua sa vakaraitaki koya vei ira na nona meca! E vinaka cake vua na tamata o ya me a kakua ga ni sucu mai!”

Na i Vakayakavi ni Turaga

²² Ni ratou sa kana tiko, sa qai taura na madrai o Jisu ka masulaka, ka dovia, ka solia vei iratou na tisaipeli, ka kaya, “Dou taura, ka kania; oqo na yagoqu.”

²³ Sa qai taura na bilo, ia ni sa vakavinavinakataka oti sa qai solia vei iratou, ka ratou sa gunu kece sara kina.

²⁴ Sa qai kaya vei iratou, “Oqo na noqu dra ni veiyalayalati vou, sa liviraki ena vukudra na lewe vuqa.

²⁵ Au sa kaya vakaidina vei kemudou, au na sega tale ni gunuva na waini me yacova na siga au na gunuva tale kina ena matanitu ni Kalou.”

²⁶ Ia ni ratou sa lagata oti e dua na sere, e ratou sa qai lako ki na Ulunivanua ni Veiolive.

Sa Tukuna Rawa tiko o Jisu ni na Cakitaki Koya o Pita

²⁷ Sa qai kaya vei iratou na tisaipeli o Jisu, “Dou na tarabe kece oi kemudou ena vukuqu ena bogi edaidai, ni sa volai tu, ‘Au na mokuta na i vakatawanisipi, ka ra na dui veiseyaki na sipi.’

²⁸ Ia ni'u sa na vakaturi cake tale, au sa na liu vei kedatou ki Kalili.”

²⁹ Sa qai kaya vua o Pita, “Kevaka e ratou na biuti kemuni kece o iratou oqo, oi au ga ena sega.”

³⁰ Sa qai kaya vua o Jisu, “Au sa kaya vakaidina vei iko, ena bogi ga edaidai, ni bera ni tagi vakarua na toa, o sa na cakitaka vakatolu ni o kilai au.”

³¹ Sa qai kaya o Pita ena yalo katakata, “Ke daru mani mate vata sara ga, au na sega ga ni cakitaki kemuni.” E ratou a kaya kece vakakina na tisaipeli.

Na Masu nei Jisu mai Kecisemani

³² E ratou sa qai lako kece sara ki na vanua e vakatokai o Kecisemani; ka sa kaya vei iratou na nona tisaipeli o Jisu, “Dou dabe toka eke, me'u la'ki masu mada.”

³³ A sa kauti Pita o koya, vata kei rau o Jemesa kei Joni, ka sa tekivu me tarai koya mai na rarawa titobu kei na lomabibi.

³⁴ Sa qai kaya vei iratou o koya, “Na rarawa levu ni yaloqu sa voleka sara ga ni vakamatei au. Dou tiko ga eke, ka vakatawa tiko.”

³⁵ Sa qai lako vakalailai ki liu o koya ka la'ki tekiduru, ka masulaka de rawa me kakua ni sotava na gauna dredre o ya.

³⁶ A sa masu ka kaya, “Tamaqu, sa rawarawa vei kemuni na veika kecega; ni kauta tani mada vei au na bilo ni rarawa oqo; ia me kakua ni vaka na lomaqu; me vakayacori ga na lomamuni.”

³⁷ Sa qai lesu tale o koya ka raici iratou ni ratou sa moce tu. Sa qai kaya vei Pita, “Saimoni, o a moce? E sega beka ni rawa ni o yadra tiko me dua ga na aua?

³⁸ Dou yadra tiko ka masu, mo dou kakua kina ni rawai ena vere. E dina ga ni sa gu na yalo, ia sa malumalumu ga na yago.”

³⁹ Sa qai lako tale o Jisu ka masu, ka cavuta tale na qaqa ni masu ga ka a cavuta e liu.

⁴⁰ Ia ni sa lesu tale vei iratou na nona tisaipeli, sa raica ni ratou sa moce tu; ni sa sivia na nodratou via moce. E ratou a sega ni kila se cava me ratou kaya vua.

⁴¹ Sa qai lako tale o koya vei iratou ena i katolu ni gauna, ka kaya vei iratou, “Dou se moce tikoga ka vakacegu tiko? Sa rauta mada! Raica, sa yaco mai na kena gauna me soli yani kina na Luve ni Tamata ki na ligadra na tamata i valavala ca.

⁴² Dou tu, me datou lako! Raica, sa voleka mai oqo o koya ka bukiveretaki au.”

Na Vesu nei Jisu

⁴³ Ni sa vosa tikoga o Jisu, sa lako sara o Jutasa, e dua vei iratou na lewe tinikarua, kei na dua na i lala levu era vakaiseleiwau, ka vakaiwau. Era a talai mai vei ira na bete levu kei ira na daunilawa kei ira na qase.

⁴⁴ A sa solia tu na daubukivere e dua na i vakatakilakila vei ira, ni a kaya, “O koya ga au na reguca, sai koya sara ga o ya; dou tauri koya ka qarauna vakavinaka me kakua ni dro.”

⁴⁵ Ia ni sa yaco yani o Jutasa, sa lako vakadodonu sara vei Jisu, ka kidavaki koya ka kaya, “Vakavuvuli!” ka reguci koya sara.

⁴⁶ Era sa qai tauri koya ka vesuka.

⁴⁷ Ia sa qai ucuna na nona i seleiwau e dua vei iratou ka tu voleka e kea, ka taya laivi kina na daligana e dua na tamata ni Bete Levu.

⁴⁸ Sa qai kaya vei ira o Jisu, “Oi au beka e dua na tamata daubutako ka dauvakacaca mo ni vakaiseleiwau ka vakaiwau tu mai kina ena nomuni mai vesuki au?

⁴⁹ Au a dau tiko vata voli ga kei kemuni ena veisiga ena Valenisoro, ka'u vakatavuvuli tiko, ia o ni a sega ga ni vesuki au. Ia sa yaco ga na ka oqo me vakayacori kina na vosa ni Vola Tabu.”

⁵⁰ E ratou sa qai laivi koya kece na tisaipeli ka dro.

⁵¹ Ia sa muri koya tiko yani e dua na cauravou, ka ovici koya wale voli sara ga yani ena dua na i sulu lineni. Era sa qai via vesuki koya o ira o ya.

⁵² Ia, sa qai laiva tu mai na i tutuvi lineni o koya ka dro luvawale yani.

Sa Lewai o Jisu

⁵³ Era sa qai kauti Jisu sara ki na i tikotiko ni Bete Levu, ena vanua era sa soqoni vata kece tiko yani kina o ira na matabete e cake, kei ira na qase kei ira na daunilawa.

⁵⁴ A muri vakayawa tikoga yani o Pita, ka yaco sara ki na loma ni bai ni Bete Levu; ka la'ki dabe vata kei ira na yadra, ka tatalai ena buka.

⁵⁵ Era sa qai vakasaqara o ira na matabete e cake kei ira kece na lewe ni Bose Lawa e dua na cala me ra beitaki Jisu rawa kina me vakamatei; ia era mani sega ga ni kunea rawa e dua na ka.

⁵⁶ Era sa lewe vuqa era beitaki koya vakailasu, ia sa duidui na nodra i tukutuku.

⁵⁷ E ratou sa tucake eso na tamata ka beitaki koya vakailasu, ka ratou kaya,

⁵⁸ “Keitou a rogoci koya ni kaya, ‘Au na vakarusa na Valenisoro oqo ka caka ena liga, ka'u na tara e dua tale ka sega ni caka ena liga ni sa oti e tolu na siga.’ ”

⁵⁹ E a duidui talega na nodratou i tukutuku.

⁶⁰ Sa qai tucake na Bete Levu ena kedra maliwa, ka tarogi Jisu ka kaya, “E sega beka na ka mo kaya ena vuku ni ka era beitaki iko kina o ira oqo?”

⁶¹ Ia sa galu tu ga o koya, ka sega ni sauma. A tarogi koya tale na Bete Levu, ka kaya, “Sa i iko li na Mesaia, na Luve ni Kalou Cecere?”

⁶² Sa qai kaya o Jisu, “Io sai au sara ga oqo; ka o ni na raica na Luve ni Tamata ni sa dabe tiko ena liga i matau i Koya na Kaukauwa, ka ni na lako talega mai ena o ni lomalagi.”

⁶³ Sa qai dresulaka na nona i sulu na Bete Levu, ka kaya, “Na i vakadinadina cava tale eda sa qara tiko?

⁶⁴ O ni sa rogoca na nona sa vosa vakacacataka na Kalou. A cava o ni sa lewa kina?” Era sa qai lomavata kece ni sa dodonu me mate.

⁶⁵ Era sa qai kasiviti koya eso, ka ubia na matana, ka vakavacuki koya, ka kaya vua, “Tukuna mada mai o cei soti e vacuki iko!” Era sa qai tauri koya talega na yadra ka sabalaka.

Sa Cakitaka o Pita ni Kilai Jisu

⁶⁶ E a tiko ga e ra o Pita ena rara ni loma ni bai, sa qai lako yani kina e dua na vada ni Bete Levu.

⁶⁷ Ia ni sa raici Pita ni tatalai tiko, sa qai vakaraici koya vakavinaka sara, ka kaya, “O iko talega oqo o dau tiko vata kei Jisu na kai Nasareci.”

⁶⁸ Ia sa qai cakitaka o koya, ka kaya, “A cava o tukuna tiko mai oqori? Au sega ni kila kina e dua na ka!” Sa qai lako vaka ki na matamata o Pita; ka sa tagi sara na toa.

⁶⁹ A raici koya tale e kea na vada, ka tukuna vei ira ka tu voleka kina, ka kaya, “Oqo e dua vei iratou!”

⁷⁰ Ia sa qai cakitaka tale o koya. Ia ni sega so ni dede, era sa kaya tale vei Pita o ira ka tu voleka e kea, “O iko dina sara ga e dua vei iratou, ni o iko na kai Kalili.”

⁷¹ Sa qai bubului o Pita ka kaya, “Me totogitaki au mada ga na Kalou kevaka au lasu; au sa sega ni kila na tamata o ni tukuna tiko oqori!”

⁷² Sa qai tagi vakarua na toa ni oti o ya. A sa qai nanuma sara o Pita na vosa ka a kaya vua o Jisu, “Ni se bera ni tagi vakarua na toa, o sa na cakitaki au vakatolu.” A sa luluvu vakalevu na lomana ka tagi.