Marika 12 - Vakavakadewa Vou kei na iVola tale eso

Na Vosa Vakatautauvata ni Tamata ena Loganivaini

¹ Sa qai vakatekivu me vosa vei ira o koya ena vosa vakatautauvata: “E a tea e dua na loganivaini e dua na tamata ka viribai wavokita, ka kelia e dua na i keli ni loba waini, ka tara na vale ni kena i vakatawa, ka lisitaka vei ira eso tale na dauteitei, a sa qai lako yani ki na dua na vanua tani.

² Ni sa yaco mai na gauna me tamusuki kina na qerepi, a sa tala sara o koya e dua na nona dauveiqaravi vei ira na lisitaka na i teitei, me la'ki kauta mai na nona i votavota ni veika sa tamusuki.

³ Era sa qai tauri koya ka mokuta, ka vakatalai koya lesu wale tale.

⁴ Sa qai tala tale o koya e dua na dauveiqaravi, ia era sa qai vakamavoataka na uluna, ka vakayacora vua na i tovo veivakamaduataki.

⁵ Sa qai tala tale e dua o koya, ia era a vakamatea talega; era sa kitaka vakakina ki na lewe vuqa tale; eso era mokuta ka so era vakamatea.

⁶ Sa qai vo ga vua e dua, o ya, na luvena lomani. Sa qai talai koya duadua sara e muri vei ira, ka kaya, ‘Era na doka na luvequ.’

⁷ Ia era sa qai veikayaka vakai ira na lisitaka na i teitei, ‘Sa i koya oqo ena i sosomi kei tamana e muri. Me da vakamatea, me na qai noda na veika ena taukena.’

⁸ Era sa qai tauri koya ka vakamatea, ka viritaka na yagona ki na taudaku ni veivaini.

⁹ “Na cava beka ena cakava na i taukei ni loganivaini? Ena lako mai ka vakamatei ira na lisitaka na i teitei ka solia na loganivaini vei ira tale eso.

¹⁰ O ni sa sega li ni wilika na tiki ni Vola Tabu oqo? ‘Na vatu sara ga era a cata na dautara vale Sa qai yaco me i vakadei ena tutu ni vale.

¹¹ Oqo na cakacaka ni Turaga, Ka sa veivakurabuitaki e matada!’ ”

¹² Era sa qai via vesuki Jisu, ni ra sa kila rawa ni a tukuna o koya na vosa vakatautauvata o ya me baleti ira; ia era sa rerevaki ira ga na lewe vuqa, ka ra sa mani biuti koya tu ga e kea ka lako.

Na Vakatarotaro me Baleta na Saumi ni Vakacavacava

¹³ Era sa qai tala vei Jisu eso na Farisi kei na so na i tokani i Eroti me ra coriti koya ena nona vosa.

¹⁴ Era sa lako ka kaya vua, “Vakavuvuli, keimami sa kila ni o ni sa dau tukuna na ka dina. O ni sa sega ni rerevaka na ka era nanuma na tamata, se mo ni kauwaitaka sara na i tutu vakatamata. Ia o ni sa dau vakatavuvulitaka ga na veika dina vakalou. Ni tukuna mada mai, e cala li ena noda Lawa me da sauma na i vakacavacava vei Sisa? E dodonu li me da saumi vakacavacava vei Sisa, se segai?

¹⁵ Me da sauma se me da kakua ni sauma?” Ia ni sa kila o koya na nodra veivakaisini, sa qai kaya vei ira, “A cava o ni via veretaki au kina? Kauta mai vei au e dua na i lavo siliva, me'u mai raica mada.”

¹⁶ Era sa qai solia vua e dua na i lavo. Sa qai kaya vei ira o koya, “Na ulu i cei kei na yaca i cei e tabaki toka oqo?” Era sa kaya vua, “A nei Sisa.”

¹⁷ Sa qai kaya vei ira o Jisu, “Ni solia vua na Sisa na veika sa nona na Sisa, vua talega na Kalou na veika sa nona na Kalou.” Era sa kurabuitaki koya vakalevu.

Na Taro me Baleta na Tu Cake Tale mai na Mate

¹⁸ Era sa qai lako vei Jisu na Setoki, o ira era kaya ni sega na tucake tale mai na mate, ka tarogi koya vakaoqo,

¹⁹ “Na i Vakavuvuli, sa vola tu vei keda o Mosese ni kevaka sa mate na tuakana se tacina e dua na tagane, ka laiva tu mai na watina, ka sega na luvena, me qai taura na nona yada, me vakaluveni kina, me qai wili na gone ki vua sa mate.

²⁰ E dua na mataveitacini tagane e ratou lewe vitu; sa vakawati o koya e qase duadua, ia sa mani mate ka sega na luvena.

²¹ Sa mani taura na nona yada o koya ka tarava, ka sa mani mate talega, ka sega na luvena; sa vaka talega kina vua na kena i katolu, kei iratou na kena vo.

²² E a sega ni dua vei iratou na lewe vitu me vakaluveni. Sa qai mate duadua sara e muri o koya na yalewa.

²³ Ni sa yaco na tucake tale mai na mate, ena qai wati cei vei iratou o koya? Ni ratou a sa vakawatitaki koya kece na lewe vitu.”

²⁴ Sa qai kaya vei ira o Jisu, “E sega li ni ka oqo o ni cala kina; o ni sa lecava na i Vola Tabu, ka sega talega ni kila na kaukauwa ni Kalou?

²⁵ Ni ra sa na tucake tale mai na mate era na sega tale ni vakawati, se veimusumusuki me ra vakawati, era sa na vaka ga na agilosi mai lomalagi.

²⁶ Ia ena vuku ni nodra vakaturi cake tale na mate, o ni sega li ni wilika ena vosa i Mosese, ena i talanoa me baleta na kau ka a kama tiko, na nona a kaya na Kalou vua, ‘Oi au na Kalou i Epara-ama, na Kalou i Aisake, kei na Kalou i Jekope.’

²⁷ O koya, e sega ni nodra Kalou na mate, e nodra Kalou ga na bula. O ni sa cala sara ga vakalevu!”

Na i Vakaro Bibi Duadua

²⁸ Sa qai lako mai e dua vei ira na qasenivuli ni lawa ka rogoca ni ra veileti tiko vakai ira; ia ni sa rogoca na vinaka ni saumi taro nei Jisu, sa qai tarogi koya, “Na i vakaro cava e bibi duadua vei ira kece na i vakaro?”

²⁹ A sauma o Jisu ka kaya, “Sa i koya oqo na i vakaro bibi duadua, ‘Mo ni rogoca na Isireli, na Turaga na noda Kalou, na Turaga sa dua bauga.

³⁰ Mo ni lomana na Turaga na nomuni Kalou ena lomamuni taucoko, kei na yalomuni taucoko, kei na nomuni nanuma kecega, kei na nomuni kaukauwa taucoko.’

³¹ Na kena i karua oqo, ‘Mo lomana na kai nomu me vaka o sa lomani iko.’ Sa sega tale ni dua na i vakaro e bibi cake mai vei rau oqo.”

³² Sa qai kaya vei Jisu na qasenivuli ni lawa, “Vakavuvuli, sa donu vinaka oqori. Sa dina sara na nomu vosa ni sa dua bauga na Kalou, ka sa sega tale ni dua me rau lewe rua kaya, sai koya duadua ga;

³³ ka me da lomani koya ena lomada taucoko, kei na noda vakasama taucoko kei na noda kaukauwa taucoko, ka lomana na kai noda me vakataki keda. Sa bibi cake oqo mai na i soro kama taucoko kei na i soro kecega.”

³⁴ Ni sa raica o Jisu na nona sauma vakavuku, sa qai kaya vua, “O sa sega ni yawa mai na matanitu ni Kalou.” Ni sa oti o ya, sa sega tale ni dua e doudou me taroga vua e dua na taro.

Na Taro me Baleta na Mesaia

³⁵ Ni sa veivakatavulici tiko o Jisu ena Valenisoro, sa kaya, “Era kainaka rawa ga vakacava na qasenivuli ni lawa ni luve i Tevita na Mesaia?

³⁶ O Tevita mada ga vakaikoya sa kaya ena kaukauwa ni Yalo Tabu, ‘Sa kaya na Turaga ki vua na noqu Turaga, Mai dabe ena yasaqu i matau, Me yacova ni'u sa vakatikori ira na nomu meca me ra i tutu ni yavamu.’

³⁷ Me vaka ni sa vakatokai koya vakaikoya o Tevita me ‘Turaga’; ia me na qai wili me kawa i Tevita vakacava na Mesaia?” Era sa lewe vuqa sara na tamata era sa marautaka na nodra vakarogoci Jisu voli.

Sa Veivakasalataki o Jisu Baleti Ira na Qasenivuli ni Lawa

³⁸ Ena nona veivakatavulici tiko, sa kaya kina vei ira, “Ni qarauni kemuni mai vei ira na qasenivuli ni lawa, era dau vinakata me ra lako voli ena nodra kote balavu, ka me ra kidavaki vakaturaga ena veivanua ni veivoli,

³⁹ era dau vinakata na i dabedabe digitaki e cake ni valenilotu, kei na veitikotiko vakaturaga ena gauna ni kana magiti.

⁴⁰ Era dau vakalolomataki ira na yada ka kovea na nodra vale, ka ra qai dau vakaraitaki ira ena veivakaisini mai na nodra masu balabalavu. Ena bibi vakalevu sara na nodra cudruvi!”

Na Nona i Solisoli na Yada Dravudravua

⁴¹ Ni dabe volekata tiko na kato ni lavo ni valenisoro o Jisu, a sa vakaraici ira na lewe vuqa ni ra la'ki biuta kina na nodra i solisoli. Sa ka levu sara na i lavo era solia o ira na tamata vutuniyau.

⁴² Ia sa qai lako yani e dua na yada dravudravua, ka solia kina e rua na i lavo lalai sara, ka rauta ni dua na pene na kena levu.

⁴³ Sa qai kacivi iratou mai na nona tisaipeli o Jisu, ka kaya vei iratou, “Au sa kaya vakaidina vei kemudou, e levu cake na ka e solia na yada dravudravua o ya mai na ka era solia na kena vo.

⁴⁴ O ira kece o ya era a soli ka mai na nodra vutuniyau, ia na marama o ya, ena dela ni nona dravudravua, a solia na ka kece sara ga e tu vua, me bula kina.”