Malakai 3 - Vakavakadewa Vou kei na iVola tale eso

¹ A sa sauma vakaoqo o Jiova ni lewevuqa, “Au sa na tala yani na noqu i talai me la'ki vakarautaka vei au na sala. Ena qai basika vakasauri yani ki na nona Valenisoro na Turaga o ni vakasaqara tiko. Na i talai o ni gadreva tiko mo ni raica ena lako yani ka kacivaka na noqu veiyalayalati.”

² Ia o cei na tamata ena yalodei rawa ena siga sa lako mai kina? O cei ena tudei rawa e matana ni sa rairai mai o koya? Ena vakataka e dua na sovu kaukauwa o koya, ka vaka na bukawaqa sa dauvakasavasavataka na kaukamea.

³ Ena lako mai o koya me mai daunilewa me vakataki koya e daulewa na vakasavasavataki kei na vakabutai ni siliva. Me vaka na nona dau vakasavasavataki siliva kei na koula na daucaka kaukamea, ena mai vakasavasavataki ira vaka talega kina na bete o koya na i talatala ni Turaga, me rawa kina ni ra mai vakacabora vua na Turaga na i madrali e dodonu.

⁴ Ena qai yaco me marautaka tale na Turaga na vei madrali era na kauta vua o ira na lewe i Jerusalemi kei Juta, me vaka ena veigauna e liu.

⁵ Sa qai kaya na Turaga na Kalou Levu, “Au na rairai mai vei kemudou me ia na veilewai, ka'u na kusarawa ni tukuna na nodra ca na daucakaisausau, na dauveibutakoci, na daububului vakailasu, o ira era daubutakoca na i sau ni tamata cakacaka, o ira era dau vakasaurarataki ira na yada, na luveniyali, na kai tani, kei ira era sa sega ni vakarokorokotaki au.”

Soli ni Dua na i Katini

⁶ A sa kaya na Kalou kaukauwa, “Oi au o Jiova, ka'u sa sega ni dauveivukiyaki. O koya oqo, dou sa sega kina ni vakayali vakadua na kawa i Jekope.

⁷ O kemuni, o ni sa vakataki ira na nomuni qase era liu vei kemuni, ni o ni sa vuki tani mai na noqu lawa ka sega ni muria. Ni lesu tale mai vei au, ka'u na qai lesu yani vei kemuni. Ia o ni sa taroga, ‘A cava me keimami cakava me keimami lesu yani kina vei kemuni?’

⁸ Me'u tarogi kemuni mada, e dodonu beka vua e dua na tamata me butakoca na Kalou? Sa segai sara, ia o ni sa dau butakoci au tikoga. O ni sa taroga, ‘Keimami sa butakoci kemuni vakacava?’ Ena i katini ga kei na i madrali.

⁹ O ni sa cudruvi taucoko tiko baleta ni sa vakaisini au tiko na vanua raraba ena butako vakaoqo.

¹⁰ Ni kauta kece mai na nomuni i katini ki na Valenisoro, me rawa ni sinai sara kina ena kakana. Ni vakatovolei au mada ka o ni na qai raica kina ni'u na dolava na katuba ni lomalagi ka sovaraka vakayauyau mai vei kemuni na veika vivinaka.

¹¹ Au na tarovi ira na manumanu meca ni teitei me ra kakua ni vakacacana na ka o ni sa tea, ka ra na vuavuai vinaka sara na nomuni veivaini.

¹² Era na qai kaya na veimatanitu kecega ni o ni sa tamata kalougata, baleta ni sa rui vanua vinaka ni vakaitikotiko na nomuni vanua.”

Na Yalayala ni Kalou

¹³ A sa qai kaya o Jiova, “Sa levu na veika ca o ni sa tukuna me baleti au. Ia o ni qai kaya, ‘A cava sara mada keimami sa kaya me baleti kemuni?’

¹⁴ O kemuni o ni sa kaya, ‘Sa sega na betena na qaravi Kalou. A cava na kena yaga me da cakava kina na veika sa tukuna, se me da vakaraitaka vei Jiova ni lewevuqa na noda sa veivutunitaka na veika eda sa vakayacora?

¹⁵ Me vaka eda sa raica tiko oqo, o ira na tamata dokadoka sai ira ga ka sa dau marau voli. Io, sa sega wale ga ni toso vinaka tale tikoga na nodra bula na tamata ca, ia era sa dau vakatovolea ga na yalovinaka i Jiova mai na nodra i tovo ca, ka ra sa sega ni bau cudruvi kina.’ ”

¹⁶ Era sa qai veivosaki vakai ira o ira na tamata sa rerevaka na Turaga, ka sa vakarorogo o Jiova ka rogoca na veika era sa veivosakitaka. A sa volai e dua na vola ni vakananumi ena mata i Jiova me maroroi kina na yacadra vakayadua era sa rerevaki Jiova ka dokai koya.

¹⁷ Sa qai kaya o Jiova ni lewevuqa, “Oqo o ira na noqu. Ena siga ni noqu cakacaka, sai ira ga oqo era na noqu vakaidina. Au na yalololoma vei ira me vaka sa yalololoma e dua na tama vua na luvena sa dauqaravi koya.

¹⁸ Era na qai raica tale na noqu tamata na duidui ni veika ena yaco vua na tamata dodonu kei koya e ca, vei koya sa qaravi au vata kei koya sa segai.”