Malakai 2 - Vakavakadewa Vou kei na iVola tale eso

¹ A sa kaya vei ira na matabete o Jiova ni lewevuqa, “Oqo na i vakaro me baleti kemuni:

² E dodonu mo ni dau vakarokorokotaki au ena veika o ni sa vakayacora. Kevaka o ni sa sega ni vakarorogo ki na veika au sa tukuna, au na cudruvi kemuni. Au na vagolea na noqu cudru ki na veika o ni sa dau vakararavi kina. Ia na kena dina, o ya ni'u sa cudruva oti na veika oqori, baleta ni o ni sa dau taura tu ga vakamamada na noqu i vakaro.

³ Au na vakanakuitaki ira na luvemuni, ka'u na soloraka na matamuni ena nodra benu na manumanu o ni dau vakacabora mei soro, ka o ni na qai viritaki laivi ki na tikina e bini kina na deni manumanu.

⁴ O ni na qai kila ni'u a sa solia oti vei kemuni na i vakaro oqo, me kakua kina ni voroki na noqu veiyalayalati au a cakava vei ira na bete, na kawa i Livai.

⁵ “Ena noqu vosa ni veiyalayalati, au a yalataka kina vei ira na bula kei na tiko sautu, au a solia vei ira na ka kece oqo me rawa kina ni ra rokovi au. Era a mani rokovi au ka rerevaki au ena gauna o ya.

⁶ Era a vakatavuvulitaka na ka dodonu, ka sega ni ka cala. Era bula veimaliwai vinaka kei au; era a dau cakava ga na veika dodonu ka vukei ira na lewe vuqa me ra muduka na nodra caka ca tiko.

⁷ Sa nodra i tavi ga na bete me ra vakatavuvulitaka na i vakavuvuli dina me baleta na Kalou. E dodonu me ra lako na tamata ka la'ki vulica mai vei ira na ka au sa vinakata, baleta ni sai ira oqo na i talatala i Jiova ni lewevuqa.

⁸ “Ia ena gauna oqo, ni sa gole tani ga mai na sala dodonu oi kemuni na matabete. Na nomuni i vakavuvuli sa vagolei ira e lewe vuqa me ra caka ca. O ni sa voroka na veiyalayalati ka'u a vakayacora vata kei kemuni.

⁹ O koya oqo, au na vakayacora kina me ra cati kemuni na Isireli baleta ni o ni sa sega ni muria na lomaqu; kei na gauna o ni sa dau vakatavulici ira na noqu tamata, o ni sa dau ia ga na veivakaduiduitaki.”

Na Nodra Sega ni Yalodina Vua na Kalou na Tamata

¹⁰ A sega li ni sa dua vata ga na tamada? A sega beka ni buli keda kecega na Kalou e duabau? Ia na cava ga eda dauvoroka tiko kina na noda veiyalayalati vakai keda, ka cava eda beca kina na vosa ni yalayala sa cakava na Kalou vata kei ira na noda qase e liu?

¹¹ Era sa voroka oti na kai Juta na nodra yalayala vua na Kalou, ka ra sa cakava na ka vakasisila sara mai Jerusalemi kei na veivanua raraba. Era sa vakadukadukalitaka na Valenisoro sa dau lomana o Jiova. Era sa veiwatini na nodra tagane kei ira na yalewa sa dau qarava na veikalou tani.

¹² Me vakarusa mada ga o Jiova mai na nodra i soqosoqo na Isireli o ira vakayadua sa cakava na ka oqo, ka me ra kakua sara ni vakatarai vakadua me ra vakaitavi ena vakacaboisoro ka sa dau cakava na noda matanitu kivei Jiova ni lewevuqa.

¹³ Oqo tale e dua na ka o ni sa cakava. Sa sinai na i cabocabonisoro i Jiova ena wai ni matamuni, ni o ni sa dautagi ka qoqolou baleta ni sa sega ni qai ciqoma o koya na nomuni madrali mo ni cabora vua.

¹⁴ O ni qai vakataroga na vuna sa sega kina ni ciqoma. Ia sa baleta ga ni sa kila o koya na nomu sa voroka o iko na tagane vakawati na nomu yalayala vua na watimu o a vakamautaka ni o a se cauravou. A nomu i tokani o koya, o sa voroka na nomu vosa ni yalayala vua, ka dina ga ni o a sa yalataka ena mata ni Kalou ni o na dau yalodina vua na watimu.

¹⁵ A sega beka li ni cakava na Kalou mo drau sa dua bauga ena yago kei na yalo vata kei na watimu? Na cava beka e nona i naki ena ka oqo. A nona i naki ga mo drau vakaluveni ka me ra yaco na gone me ra sa nona na Kalou. O koya mo ni qai qarauna kina me kakua ni dua vei kemuni e voroka na nona yalayala vua na watina.

¹⁶ “Au sa cata sara na veibiu,” a sa kaya na Kalou ni Isireli o Jiova. “Au cata sara ga ni dua vei kemuni e cakava na ka rarawa vakaoqo vua na watina. Mo qarauna mo kakua ni voroka na nomu yalayala ni o na dina tikoga vua na watina.”

Sa Voleka na Siga ni Lewa

¹⁷ O ni sa vakaocai Jiova ga ena veika o ni sa dautukuna. Ia o ni a taroga ga, “Keimami sa vakaocai koya vakacava?” O ni sa vakaocai koya ga ena nomuni sa kaya vakaoqo, “Sa nanuma ga o Jiova ni lewevuqa ni ra sa vinaka kecega na tamata i valavala ca; io, sa dau vinakati ira sara talega o koya.” Se ni o ni sa dautaroga, “Sa evei na Kalou ka sa dodonu me daulewa vakadodonu?”